ގަރާޖެއް ނެތި ހަތަރު ފުރޮޅުލީ އުޅަނދު ރަޖިސްޓްރީ ނުކުރެވޭ ގޮތް ހެދުމުން، ވެހިކަލް އެތެރެކުރާ މިންވަރު ވަރަށް ބޮޑަށް ދަށްވެއްޖެ ކަމަށް އިކޮނޮމިކް އަދި ޓްރާންސްޕޯޓު މިނިސްޓަރު މުހައްމަދު ސައީދު މިރޭ ވިދާޅުވެއްޖެއެވެ.
ހަތަރު ފުރޮޅުލީ އުޅަނދު އެތެރެކުރުމުގެ ކުރިން, ގަރާޖު ސިޓީ ދައްކަން ޖެހޭ ގޮތަށް, އެއްގަމުގައި ދުއްވާ އިންޖީނުލީ އުޅަނދު ރަޖިސްޓްރީ ކުރުމުގެ ގަވައިދަށް ބަދަލު ގެނައީ، މީގެ އަހަރަކަށް ވުރެ ގިނަ ދުވަސްކުރިން މިދިޔަ އަހަރުގެ އޭޕްރީލް 13ގައެވެ.
އެ ގަވައިދުގައި ބުނާ ގޮތުގައި، އުޅަނދެއް ބާއްވާ ގަރާޖެއް ނުވަތަ ގުދަނެއްގެ ހުއްދައިގެ ސިޓީއެއް ހުށަހަޅަން ޖެހޭއިރު، ސިޓީގައި ބަޔާންކޮށްފައިވާ ތަނެއްގައި އުޅަނދު ބޭއްވުމުގެ ހުއްދަ މިނިސްޓްރީގައި އޮތް ކަން ކަށަވަރުކުރަން ޖެހެއެވެ.
އެ ކަމަށް އިޝާރަތްކުރައްވައި މިނިސްޓަރު ސައީދު ވިދާޅުވީ، އެ ބަދަލުގެ ސަބަބުން ޝަކުވާތައް އައި ނަމަވެސް ޓްރެފިކްގެ ޖުމުލަ މައްސަލައަށް ހައްލު ގެނައުމުގައި މުހިންމު ފިޔަވަޅެއް ކަމަށެވެ.
"އަޅުގަނޑުމެންގެ ހިސާބުތައް ދައްކާ ގޮތުގައި ވަރަށް ބޮޑުތަނުން ވެހިކަލްތަކުގެ އަދަދު ވެސް ދަށްވަމުން އެބަ އާދޭ އެ ނިންމުމާ ގުޅިގެން" ސައީދު ވިދާޅުވިއެވެ.
މިނިސްޓަރު ސައީދު މިރޭގެ އަހާ ފޯރަމުގައި ---- ފޮޓޯ/ރައީސް އޮފީސް މީގެ އިތުރުން، އެއް ގަރާޖަކަށް ގިނަ ވެހިކަލްތަކެއް ރަޖިސްޓްރީކޮށްފައި ހުންނަ ކަމަށާއި އެ ކަން ކޮށްފައި ހުންނަނީ މިނިސްޓްރީގެ ސިސްޓަމްތަކުގެ ތެރެއިން ކަމަށް ސައީދު ވިދާޅުވިއެވެ. މިގޮތުން، ގަރާޖެއް ނެތި ވެހިކަލެއް އެތެރެނުކުރެވޭ ގޮތް ހެދުމުން މިނިސްޓްރީގެ ވަކި ޓީމަކާއި ފުލުހުންނާ ގުޅިގެން މަސައްކަތްތަކެއް ކުރެވެމުން އަންނަކަން ސައީދު ފާހަގަކުރެއްވިއެވެ.
މިނިސްޓަރު ވިދާޅުވި ގޮތުގައި، މާލޭގެ 82 ޕަސެންޓު ފުރިފައި އޮންނަނީ ވެހިކަލްތަކުންނެވެ. މީހުން ހިނގުމަށް އޮންނަނީ 18 ޕަސެންޓެވެ.
ތަފާސްހިސާބުތައް ހިއްސާކުރައްމުން މިނިސްޓަރު ވިދާޅުވީ، މިހާތަނަށް 130،806 ވެހިކަލް ރަޖިސްޓްރީކޮށްފައިވާ ކަމަށެވެ. އޭގެތެރޭގައި ހިމެނެނީ، 14،911 ކާރާއި 115،896 ސައިކަލެވެ.
ސައީދު ވަނީ، ޓްރެފިކްގެ މައްސަލައަށް ހައްލެއް ހޯދުމަށް ފަސޭހައެއް ނުވާނެ ކަމަށް ވިދާޅުވެފައެވެ.
މާލެ ސަރަހައްދުގައި އުޅަނދުތައް ގިނަވެ، ތޮއްޖެހުމުގެ ޝަކުވާތައް ބޮޑުވެފައިވުމުން، އެ މައްސަލަ ހައްލުކުރަން ސަރުކާރުން އަންނަނީ މަސައްކަތް ކުރަމުންނެވެ.