ދިވެހި ސިފައިން ތިބީ ގައުމަށް ދިމާވެދާނެ ކޮންމެ ނުރައްކަލަކަށް ވަރަށް ފުރިހަމައަށް ތައްޔާރުވެގެން ކަމަށާއި، ނޮވެމްބަރު 3، 1988 ގައި ރާއްޖެއަށް ދިން އުދުވާނީ ހަމަލާ ފަދަ ހަމަލާއެއް ދެން މި ގައުމަށް ކުރިމަތި ނުވާނެ ކަމުގެ ޔަގީންކަން ދެއްވާކަމަށް ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު މިރޭ ވިދާޅުވެއްޖެއެވެ.
"އަހާ" ފޯރަމްގައި އާންމު ފަރާތަކުން ކުރި ސުވާލަކަށް ޖަވާބުދެއްވަމުން ވަޒީރު ވިދާޅުވީ، ރާއްޖޭގެ ކަނޑުގެ ސަރަހައްދުން ވިޔަސް އަދި ވައިގެ ސަރަހައްދުން ވިޔަސް ދިމާވެދާނެ ކޮންމެ ނުރައްކަލަކަށް ދިވެހި ސިފައިން އަބަދުވެސް ތިބެނީ ތައްޔާރީ ޙާލަތުގައި ކަމަށެވެ.
ނޮވެމްބަރު 3، 1988ގައި ރާއްޖެއަށް ބޭރުގެ ބަޔަކު އަރައި ދިން ޓެރަރިސްޓް ހަމަލާއަށް އަލިއަޅުއްވާލައްވަމުން ވަޒީރު ވިދާޅުވީ، އެއީ ދިވެހިން ތަޖުރިބާކޮށްފައިވާ ނުރައްކާތެރި ހާދިސާއެއް ކަމަށާއި، ނަމަވެސް މިހާރު އެފަދަ ހަމަލާއެއް ނުދެވޭނެ ކަމުގެ ޔަގީންކަން އަރުވާ ކަމަށެވެ.
އަހާ ފޯރަމްގައި ވަޒީރު: ނޮވެމްބަރު 3ގައި ދިން ފަދަ ހަމަލާއެއް ދެން ރާއްޖެއަށް ނުދެވޭނެ ކަމަށް ވިދާޅުވި -- ފޮޓޯ/ ރައީސް އޮފީސް"އަޅުގަނޑުމެން ވާނެ ތަޖުރިބާ ކޮށްފަ 1988، ނޮވެމްބަރު މަހުގެ 3ގަ ދިވެހިރާއްޖެއަށް ދިން ޓެރަރިސްޓު ހަމަލާ. އަޅުގަނޑަށް ޔަގީންކަމާއެކު ދަންނަވަން ކެރޭ މިހާރު އެފަދަ ހަމަލާއެއް ނުދެވޭނެ ކަމަށް." ދިފާއީ ވަޒީރު ވިދާޅުވިއެވެ.
ވަޒީރު ފާހަގަކުރެއްވި ގޮތުގައި، ފުރިހަމަކަމާއެކު ސިފައިންގެ މަސައްކަތް ކުރެވޭނީ އެކަމަށް ބޭނުންވާ ވަސީލަތްތައް ހަމަޖައްސައިގެންނެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވި ފަހުން ގައުމީ ދިފާޢީ ބާރުގެ ވަސީލަތްތައް އިތުރުކުރުމަށް ގިނަ މަސައްކަތްތަކެއް ކުރައްވާފައިވާ ކަމަށް ވިދާޅުވިއެވެ.
މީގެ ތެރޭގައި ތުރުކީން މަނަވަރެއް ހޯއްދެވުމާއި، ވައިގެ ސަރަހައްދު ބެލެހެއްޓުމަށް އަސްކަރީ ޑްރޯން ބޭނުންކުރުމުގެ އިތުރުން އޮސްޓްރޭލިއާ ސަރުކާރުން ދެއްވި މަނަވަރު ފަދަ ވަސީލަތްތައް ހޯދުން ހިމެނޭކަން އޭނާ ފާހަގަކުރެއްވިއެވެ. އަދި ކޯސްޓްގާޑަށް ބޭނުންވާ ގިނަ އުޅަނދުތައް ހޯދުމުގެ މަސައްކަތް މިހާރު ވެސް ކުރިއަށްދާ ކަމަށާއި، މިހާތަނަށް ޕެޓްރޯލް ކުރުމަށް އިތުރު ތިން އުޅަނދު ހޯދާފައިވާ ކަމަށް ވަޒީރު ވިދާޅުވިއެވެ.
މީގެ އިތުރުން ކުރިއަށް އޮތްތަނުގައި އިތުރު 17 އުޅަނދު ގެންނާނެ ކަމަށާއި، އޭގެ ތެރެއިން ބައެއް އުޅަނދުތައް އަންނަ ނޮވެމްބަރު މަހު ރާއްޖެ ގެނެވޭނެ ކަމަށް ވެސް އޭނާ ހާމަކުރެއްވިއެވެ. އަދި 12 ސީއެމްބިއުލާންސް ބަނުމުގެ މަސައްކަތްވެސް މިހާރު ދަނީ ކުރިއަށް ކަމަށް ވަޒީރު ވިދާޅުވިއެވެ.
ރާއްޖޭގެ ބޮޑު ސަރަޙައްދަކީ ކަނޑުގެ ސަރަޙައްދު ކަމަށްވުމުން، ކަނޑުތައް ބެލެހެއްޓުމަށްޓަކައި ރާއްޖޭގެ ގާބިލުކަން އިތުރުކުރުމާއި ކަނޑުތަކުން ލިބޭ ނަފާ އިތުރުކުރުމަށް ސަރުކާރުން މަސައްކަތް ކުރަމުންދާ ދަނޑިވަޅެއްގައި، ބޭރުގެ ފަރާތަކުން ދީފާނެ ހަމަލާއަކަށް ދިވެހި އަސްކަރިއްޔާ އޮތީ ފުރިހަމައަށް ތައްޔާރަށް ކަމުގެ ޔަގީންކަން ވަޒީރު ވަނީ ދެއްވާފައެވެ.
ނޮވެންބަރު ތިނެއްގެ އުދުވާނީ ހަމަލާގައި ސިފައިންގެ ތެރެއިން އަށް ސިފައިން ޝަހީދުވިއިރު، އާންމުންގެ ތެރެއިން 11 މީހަކު ޝަހީދުވިއެވެ.