މެލޭޝިއާގައި ހިނގި އެކްސިޑެންޓެއްގައި، ދިވެހި އަންހެނަކު މިއަދު މަރުވެއްޖެއެވެ.
ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފް (މުންދު) ވަނީ، މެލޭޝިއާގައި ހިނގި އެކްސިޑެންޓެއްގައި ދިވެހި ދަރިވަރަކު މަރުވެފައިވާކަން ކަށަވަރުކޮށްދެއްވައިފައެވެ. އެ އެކްސިޑެންޓުގައި އިތުރު ދިވެއްސަކު ވެސް ޝާމިލުވާކަން އެނގިފައިވާ ނަމަވެސް، އިތުރު މައުލޫމާތު ކަށަވަރު ކުރުމުގެ މަސައްކަތް އަދި ދަނީ ކުރިއަށް ކަމަށް އޭނާ ވިދާޅުވިއެވެ.
"ސަން"އަށް މައުލޫމާތު ލިބިފައިވާ ގޮތުގައި އެ ހާދިސާގައި މަރުވެފައި ވަނީ، އައްޑޫ ސިޓީގެ ހިތަދޫއަށް ނިސްބަތްވާ 21 އަހަރުގެ، އާމިނަތު އިމީލީ ނާޒިމެވެ. އަދި އެކްސިޑެންޓް ހިނގީ، މޯލްއަކަށް ދިޔުމަށް ފަހު އެނބުރި ގެޔަށް ދިޔަ މަގުމަތީގައި ކަމަށް ވަނީ މައުލޫމާތު ލިބިފައެވެ.
އެކްސިޑެންޓުވި އުޅަނދު: އެ އުޅަނދުގައި އިން ދިވެހި ދަރިވަރަކު ވަނީ މަރުވެފައި -- އެ ހާދިސާގައި މަރުވި ދަރިވަރާއި، އަނިޔާވި މީހާއާ ގުޅޭ އިތުރު މައުލޫމާތެއް މިހާތަނަށް ކަށަވަރުވެފައިނުވެއެވެ.
މެލޭޝިއާއަކީ ގިނަ އަދަދެއްގެ ދިވެހީން ދިރިއުޅޭ އަދި ތައުލީމު ހާސިލުކުރުމަށާއި ޗުއްޓީ ހޭދަކުރުމަށް ވެސް ގޮސް އުޅޭ ގައުމެކެވެ.