މީސްމީޑިއާ ހުޅުވާލާއިރަށް ފެންނަނީ، 20 ޑޮލަރުގެ ކޮޕީ ނޫޓުތަކާއި ކީއްވެ ޖަހާފައިވާ ގަނޑުކޮޅުތަކެެވެ. އެހެންވެ، މި ކަމުގެ ހަގީގަތް ހޯދުމަށް އިތުރަށް ބަލައި، ތަހުގީގުކޮށްލީމެވެ. އެ ކަމުން އެނގުނު ގޮތުގައި، މިއީ ދިވެހި ފިލްމަކަށް ކިޔާ ނަމެކެވެ.
މިއީ ސްލޭމް ސްޓޫޑިއޯއާއި ސެޓާން ސްޓޫޑިއޯއާއި ނޫރު އެން މޫވީސްއާއި ކިޑް ޕްރޮޑަކްޝަން ގުޅިގެން ނެރޭ " ކީއްވެ؟" އެވެ.
މި ފިލްމުގެ ޕްރޮޑިއުސަރެއް ކަމަށްވާ ހުސައިން މުނައްވަރު (ކިޑު) ބުނި ގޮތުގައި، މިއީ އެ ފިލްމު ރިވީލް ކުރުމަށް ކުރާ ކަމެކެެވެ. އެ ފިލްމަށް ކިޔަނީ 'ކީއްވެ'އެވެ.
އަސްލަމް ރަޝީދު ޕްރޮޑިއުސްކުރާ މި ފިލްމުގެ ޑައިރެކްޓަރަކީ ތަޖުރިބާކާރު ޑައިރެކްޓަރު އީސާ ޝަރީފެވެ. އަދި، މި ފިލްމުގެ އެގްޒެކްޓިވް ޕްރޮޑިއުސަރުންނަކީ ހުސައިން ނޫރައްދީން އާއި ޢަލީ ޝާނިޒްގެ އިތުރުން މުނައްވަރެވެ.
ވަރުގަދަ ހަތަރު ސްޓޫޑިއޯ ގުޅިގެން ގެނެސްދޭ މި ފިލްމުގެ ގިނަ މައުލޫމާތު ފިލްމުގެ ޓީމުން އަދި ހާމައެއް ނުކުރެއެވެ.
އަންނަ މަހު 25ގައި އޮލިމްޕަހުގައި ޕްރިމިއާ ކުރާ މި ފިލްމުގެ ޝޫޓިން މި އަހަރުގެ ކުރީކޮޅު ވަނީ ނިންމާފައެވެ.