ތިން އަހަރު ވަންދެން ބަޖެޓުން ރައްކާކުރި ފައިސާއިން ށ. ފީވަކު ކައުންސިލުން ގެސްޓްހައުސެއް އަޅައި، އެ ތަން ހިންގުމަށް އިއްޔެ ބަޔަކާ ހަވާލުކޮށްފިއެވެ.
'ސަން'އަށް މައުލޫމާތު ދެއްވަމުން ފީވަކު ކައުންސިލުގެ ރައީސް އަލީ ރަޝީދު ހަސަން ވިދާޅުވީ، އެއީ ދައުލަތުން ކައުންސިލަށް ދޭ ބަޖެޓުން ބައެއް ރައްކާކޮށްގެން ކުރި މަސައްކަތެއް ކަމަށެވެ.
އެ ގެސްޓްހައުސް އެޅުމަށް ނިންމީ ރަށަށް ޒިޔާރަތްކުރާ ފަތުރުވެރިންނަށް ތިބެވޭނެ ތަނެއް ރަށުގައި ނެތުމާއި ލޯކަލް ޓުއަރިޒަމްގެ ވިޔަފާރި ފުޅާކުރުމުގެ މަގުސަދުގައި ކަމަށް އޭނާ ވިދާޅުވިއެވެ.
ފީވަކު ކައުންސިލުން އިމާރާތްކުރި ގެސްޓްހައުސް ---- ފޮޓޯ/ ފީވަކު ކައުންސިލުއެ މަގުސަދުގައި އެ ކައުންސިލުން އެންމެ ފުރަތަމަ އެޅީ ރެސްޓޯރަންޓެކެވެ. އެއަށްފަހު، ބޮޑު ޓެރަހެއް ހިމެނޭހެން ފަސް ކޮޓަރީގެ ގެސްހައުސެއް ފީވަކު ކައުންސިލުން ވަނީ އަޅާފައެވެ. އެ ތަން ހިންގުމަށް ބީލަމަށް ހުޅުވާލުމުން ގިނަ ބަޔަކު ކުރިމަތިލި ކަމަށާއި މިހާރު ބަލްމާ ސަންސެޓް ރެސްޓޯރެންޓާ އެ ގެސްޓްހައުސް ހިންގުމަށް ހަވާލުކޮށްފައިވާ ކަމަށް އަލީ ވިދާޅުވިއެވެ.
ފީވަކު ކައުންސިލަކީ ދައުލަތުން ދޭ ބަޖެޓު ފިޔަވައި އެހެން އާމްދަނީއެއް ލިބޭ ކައުންސިލަކަށް ނުވާއިރު، އެ ފައިސާ އެއްކޮށްހެން ޚަރަދުވަނީ ރިކަރަންޓު ޚަރަދަށެވެ. އެ ޚަރަދުތައް ކުޑަކޮށް، ތިން އަހަރު ވަންދެން ފީވަކު ކައުންސިލުން ވަނީ އެ ބަޖެޓުން ބައެއް ރައްކާކޮށްފައެވެ.
ގެސްޓްހައުސް އިމާރާތްކުރީ އެ ފައިސާއިން ކަމަށްވާއިރު، ތަން ހިންގުމަށް ހަވާލުކުރީ މަހަކު 22،500 ރުފިޔާ ކައުންސިލަށް ލިބޭ ގޮތަށްކަން އޭނާ ފާހަގަކުރެއްވިއެވެ. އަދި، ރެސްޓޯރަންޓުން ވެސް މަހަކު 11،000 ރުފިޔާ ލިބެއެވެ.
ފީވަކު ކައުންސިލުން އިމާރާތްކުރި ގެސްޓްހައުސް ---- ފޮޓޯ/ ފީވަކު ކައުންސިލުއެ ތަންތަން ކައުންސިލުގެ އެކަނި ފައިސާއިން އިމާރާތްކުރެވޭނެ ކަމަށް އެހެން ކައުންސިލުތަކާ ރައްޔިތުން ވެސް ގަބޫލުނުކުރާކަން އޭނާ ވަނީ ފާހަގަކުރައްވާފައެވެ.
އޭނާ ވިދާޅުވި ގޮތުގައި، ގެސްޓްހައުސްއަށް އިތުރު ދެ ކޮޓަރި އިތުރުކޮށް، އިތުރަށް ތަރައްގީކުރުމަށް 1.5 މިލިއަން އިންވެސްޓުކުރުމަށް އެ ތަން ހަވާލުކުރި ކުންފުނިން ވަނީ ނިންމާފައެވެ.
އަލީ ފާހަގަކުރެއްވި ގޮތުގައި، އެ ތަންތަނުން ލިބޭ ފައިސާ ޚަރަދުކުރާނީ ރަށުގެ ތަރައްގީއަށެވެ.
އެންމެ ފަހުގެ ބޯހިމެނުމުން ދައްކާގޮތުގައި، ފީވަކުގައި ދިރިއުޅެނީ 700އެއްހާ މީހުންނެވެ. އެ ރަށުގެ މީހުން އާންމު ގޮތެއްގައި އާމްދަނީ ހޯދަނީ ދަނޑުވެރިކަން ކޮށްގެނެވެ.