މޯލްޑިވްސް އިސްލާމިކް ބޭންކު (އެމްއައިބީ)ގެ ގެސްޓްހައުސް ސިމްޕޯސިއަމް މިފަހަރު ގެސްޓްހައުސް އެވޯޑާއެކު ބާއްވަން ނިންމައިފިއެވެ.
އާންމު ގޮތެއްގައި އެމްއައިބީގެ ގެސްޓްހައުސް ސިމްޕޯސިއަމާއި ގެސްޓްހައުސް އެވޯޑު ބާއްވަނީ ވަކިންނެވެ.
ނަމަވެސް އެމްއައިބީން ބުނީ މި އަހަރުގެ ގެސްޓްހައުސް ސިމްޕޯސިއަމް ރާއްޖޭގައި އާންމު ގޮތެއްގައި ބާއްވާ ސިމްޕޯސިއަމްތަކާ ތަފާތުވާނެ ކަމަށެވެ. އެގޮތުން މި އަހަރުގެ ސިންޕޯސިއަމްގައި އޮންނާނީ މުހިންމު މައުޟޫއުއަކަށް ބޭއްވޭ އެންމެ ޕެނަލް ޑިސްކަޝަނަކާއި ތަޖުރިބާކާރެެއްގެ ކީނޯޓް ސްޕީޗެއް ކަމަށާއި މި އަހަރުގެ ސިމްޕޯސިއަމް އޮންނާނީ ގެސްޓްހައުސް އެވޯޑާ އެކު ކަމަށް ވެސް އެމްއައިބީން ބުންޏެވެ.
އާންމުކޮށް އެމްއައިބީގެ ގެސްޓްހައުސް ސިމްޕޯސިއަމްތަކުގައި ތިން ޕެނަލް ޑިސްކަޝަނެއް ބާއްވައެެވެ. ނަމަވެސް މި އަހަރުގެ ސިމްޕޯސިއަމްގައި އެންމެ ޕެނަލް ޑިސްކަޝަނެއް ބާއްވަން ނިންމީ އެމްއައިބީން ބުނިގޮތުގައި، ގެސްޓްހައުސް ވިޔަފާރީގެ ސިނާއަތަށް ބޭނުންވާ މުހިންމު މައުޟޫއުއަކަށް ނުވަތަ މައުޟޫއުތަކަކަށް ތަފުސީލީ ނަޒަރަކުން އަލިއަޅުވައިލުމަށާއި ގިނަ ބަޔަކަށް ޚިޔާލު ހުށަހަޅަން ފުރުސަތު ދިނުމުގެ ގޮތުންނެވެ.
އެމްއައިބީ ގެސްޓް ހައުސް ސިމްޕޯސިއަމާއި އެވޯޑު ހަފްލާ މި އަހަރު ބޭއްވުމަށް ހަމަޖެހިފައިވަނީ ބާސެލޯ ނަސަންދުރާ ހޮޓެލުގައި މި އޮކްޓޯބަރު މަހުގެ 15 ވާ ބުރާސްފަތި ދުވަހެވެ.
ނޭޝަނަލް ގެސްޓްހައުސް އަދި ހޮޓެލް އެސޯސިއޭޝަންގެ އެހީތެރިކަމާއެކު އެމްއައިބީން އިސްނަގައިގެން ކޮންމެ އަހަރަކު ގެސްޓްހައުސް ސިމްޕޯސިއަމް ބާއްވަނީ ގެސްޓްހައުސް ދާއިރާއަށް ދިމާވާ ގޮންޖެހުންތަކާއި އެ ކަންކަމުން އަރައިގަނެވޭނެ މަގުތަކާމެދު މަޝްވަރާކޮށް ޚިޔާލު ބަދަލުކުރުމުގެ މަގުސަދުގައެވެ.
ވޭތުވެދިޔަ ސިމްޕޯސިއަމްތަކުގައި އެކި މައުޟޫއުތަކަށް ޕެނަލް ޑިސްކަޝަންތައް ގެންގޮސް ކުދި ވިޔަފާރިތަކަށް ވެސް ގެސްޓްހައުސް އޯނަރުންނާއި މެނޭޖަރުންނާއި ސީދާ ބައްދަލުވެ އެކި ފުރުސަތު ހޯދުމަށް މަގުފަހިކޮށްދެވިފައިވާ ކަމަށް އެމްއައިބީން ބުނެއެވެ.
މިއީ އެމްއައިބީން ބާއްވާ ތިންވަނަ ގެސްޓްހައުސް ސިމްޕޯސިއަމެވެ.