ސަރުކާރު ކުންފުނިތައް މެދުވެރިކޮށް ތަރައްގީކުރާ 10 ރިސޯޓުގެ މަޝްރޫއަކީ ދިވެހި ފަތުރުވެރިކަމުގެ ސިނާއަތަށް އަންނާނެ ބޮޑު ބަދަލެއް ކަމަށް, ރާއްޖެއަށް ފަތުރުވެރިކަން ތައާރަފު ކުރެއްވި އެއް ބާނީ އަދި ކްރައުން ގްރޫޕުގެ ޗެއާމަން ހުސައިން އަފީފް ރޭ ވިދާޅުވެއްޖެއެވެ.
ގައުމީ ފަތުރުވެރިކަމުގެ ދުވަހާ ގުޅިގެން ރޭ ބޭއްވި ޚާއްސަ ޖަލްސާގައި ވާހަކަދައްކަވަމުން އަފީފް ވިދާޅުވި ގޮތުގައި އާންމު ރައްޔިތުންނަށް ހިއްސާވެވޭ ގޮތަށް ހުޅުވާލައިގެން ތަރައްގީކުރާ މި ރިސޯޓުތަކަކީ ގިނަ ބަޔަކަށް ފަތުރުވެރިކަމުގެ ސިނާއަތުގެ ސީދާ މަންފާ ލިބިގެންދާނެ ކަމެކެވެ.
ރާއްޖޭގެ ފަތުރުވެރިކަމުގެ ދާއިރާ ފެށުނީންސުރެ އެ މަސައްކަތުގައި އުޅުއްވާ, އެތައް އަހަރެއްގެ ތަޖުރިބާ ހުންނެވި އަފީފް ވިދާޅުވީ، މިއީ އެބޭފުޅާ ވަރަށް ބޮޑަށް އުންމީދުކުރައްވާ ކަމެއް ކަމަށެވެ. އަދި މި މަޝްރޫއު ކާމިޔާބުކަމާއެކު ހިންގުމަށް ސަރުކާރަށް އެދިވަޑައިގަންނަވާ ކަމަށްވެސް އެބޭފުޅާ ވިދާޅުވިއެވެ.
"މިކަމަކީ އަޅުގަނޑު ވަރަށް އުންމީދު ކުރާ ކަމެއް. މިކަމުގައި ކާމިޔާބަށް އެދެން" އަފީފް ވިދާޅުވިއެވެ.
ރާއްޖޭގައި ފަތުރުވެރިކަން ފެށިތާ 54 އަހަރު ވެފައިވާއިރު، ސިނާއަތުން ލިބޭ އާމްދަނީ ސީދާ ރައްޔިތުންނަށް ފޯރުކޮށްދިނުމަށް ސަރުކާރުން ގެންގުޅޭ މި ސިޔާސަތަކީ ރާއްޖޭގެ އިގުތިސާދީ އޮނިގަނޑަށް އަންނާނެ ކުރިއެރުމެއް ކަމަށްވެސް އެބޭފުޅާ ފާހަގަކުރެއްވިއެވެ.
ކުރިއަށް އޮތް ތިން އަހަރުގެ ތެރޭގައި ސަރުކާރު ކުންފުނިތައް މެދުވެރިކޮށް މަދުވެގެން 10 ރިސޯޓު ތަރައްގީކުރުމަށް ކެބިނެޓުން ފާސްކޮށްފައިވާކަން ރައީސް ޑރ މުހައްމަދު މުއިއްޒު އިއުލާންކުރެއްވީ މި އަހަރުގެ ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި އިއްވެވި ރިޔާސީ ބަޔާނުގައެވެ. ރައީސް ވިދާޅުވި ގޮތުގައި މި ރިސޯޓުތަކުން ލިބޭ ފައިދާ ހުރިހާ ދިވެހި ރައްޔިތުންގެ އެކައުންޓަށް ބޭރު ފައިސާއިން ޖަމާކޮށްދޭނެއެވެ.
މި އިންވެސްޓްމަންޓުން ރައްޔިތުންނަށް ފައިސާ ލިބެން ފަށާނީ 2030 ވަނަ އަހަރުގައި ކަމަށާއި، އެވްރެޖުކޮށް ކޮންމެ ރައްޔިތަކަށް އަހަރަކު މަދުވެގެން 400 ޑޮލަރު ލިބޭނެ ކަމަށް ރައީސް ވިދާޅުވިއެވެ. އެހެންކަމުން ފަސް މީހުންގެ އާއިލާއަކަށް ބަލާއިރު، އެ އާއިލާގެ ކޮންމެ މީހަކު މަދުވެގެން 10 ރިސޯޓުގެ ހިއްސާދާރަކަށް ވުމުގެ އިތުރުން، އެ އާއިލާއަކަށް އަހަރަކު މަދުވެގެން 2،000 ޑޮލަރު ލިބޭނެ ކަމަށް އެމަނިކުފާނު ފާހަގަކުރެއްވިއެވެ. އަދި މިކަން ހަގީގަތަކަށް ހެދުމަށްޓަކައި ކުރަންޖެހޭ އެންމެހާ ކަންކަން ވަރަށް ހަލުވިކަމާއެކު ކުރިއަށްގެންދާނެ ކަމަށްވެސް ރައީސް ވިދާޅުވިއެވެ.
މި މަޝްރޫއު ކުރިއަށްގެންދިއުމަށްޓަކައި ސަރުކާރު ހިއްސާވާ ކުންފުނިތަކަށް ފަތުރުވެރިކަމުގެ ވިޔަފާރި ކުރެވޭނެ މަގުފަހިކުރުމަށް ގާނޫނަށް ވަނީ ބަދަލު ގެނެސްފައެވެ. ޓޫރިސްޓް ރިސޯޓެއް ނުވަތަ އިންޓަގްރޭޓެޑް ޓޫރިސްޓް ރިސޯޓެއް ތަރައްގީކުރުމަށް ރަށްރަށާއި ބިން ނުވަތަ ފަޅު ދޫކުރެވޭ ގޮތަށް ޓޫރިޒަމް ގާނޫނަށް ސަރުކާރުން ހުށަހެޅި އިސްލާހު ރައްޔިތުންގެ މަޖިލީހުން ފާސްކުރީ މިދިޔަ ޑިސެންބަރު މަހުގައެވެ. މި އިސްލާހާއެކު، ދައުލަތުގެ އާންމު މަންފާއަކަށްޓަކައި ހިންގާ މިފަދަ މަޝްރޫއުތަކަށް ސަރުކާރު ކުންފުނިތަކަށް ފަސޭހައިން ރަށްތައް ހަމަޖެހިގެންދާނެއެވެ. މީގެ ކުރިން ޓޫރިޒަމް ގާނޫނު އޮންނަ ގޮތުން ރަށްތައް ދޫކުރެވެނީ އާންމުކޮށް އިއުލާންކޮށްގެން ނުވަތަ ކަނޑައެޅިފައިވާ ހާއްސަ އުސޫލުތަކެއްގެ ދަށުންނެވެ. ނަމަވެސް މި ބަދަލާއެކު، ރައްޔިތުންނަށް ސީދާ މަންފާ ލިބޭނެ ގޮތަށް ފަތުރުވެރިކަމުގެ އާ މޮޑެލްއެއް ތައާރަފުކުރުމުގެ މަސައްކަތް ސަރުކާރުން މިހާރު ދަނީ ކުރަމުންނެވެ.