ބައިނަލްއަގުވާމީ މެޗުތަކުގެ މި ފަހަރުގެ ބްރޭކުގައި ރާއްޖޭގެ ގައުމީ ފުޓުބޯޅަ ޓީމު ކުޅުނު ތިންވަނަ މެޗުގައި ލުބުނާން އަތުން 6-0 ގެ ބޮޑު ތަފާތަކުން ބަލިވެއްޖެއެވެ.
ކުރު މުއްދަތެއްގެ ތެރޭގައި ކުޅުނު އެކުވެރިކަމުގެ ތިން މެޗުންވެސް ބަލިވި އިރު، ފަހު މެޗުގައި ކިރްގިސްތާނުގެ ބިޝްކެކުގައި ހުންނަ ޑޮލޮން އޮމުރުޒަކޯވް ސްޓޭޑިއަމްގައި ލުބުނާން އަތުން ރާއްޖެ ބަލިވީ 6-0 އިންނެވެ.
މި މެޗު ފެށިގެން ތިންވަނަ މިނެޓުގައި، ރާއްޖޭގެ ޑިފެންޑަރު ހުސައިން ސިފާއު ޔޫސުފް (ކުރޯ) އަތުން ބޯޅަ ގެއްލުމުގެ ފައިދާ ނަގައި ލުބުނާނުގެ ހުސައިން ޗަކްރޯން ވަނީ އެ ޓީމަށް ލީޑު ނަގައިދީފައެވެ.
ރާއްޖެއަށް އިތުރު ގޮންޖެހުންތަކަކާ ކުރިމަތިލާންޖެހުނީ މެޗުގެ 11 ވަނަ މިނެޓުގައި ލުބުނާނުގެ ލެއޮނާޑޯ ޝާހީނަށް ކުރި ފައުލަކާ ގުޅިގެން ރާއްޖޭގެ ކެޕްޓަން ސަމޫހު އަލީ (ސަމުއްޓެ) އަށް ސީދާ ރަތް ކާޑެއް ދެއްކުމުންނެވެ. 10 ކުޅުންތެރިންނާއެކު ކުޅެންޖެހުނު ރާއްޖޭގެ ކޮޅަށް ލުބުނާނުން ވަނީ ފުރަތަމަ ހާފުގައި އިތުރު ދެ ލަނޑު ޖަހާފައެވެ.
އެއީ 36 ވަނަ މިނެޓުގައި ޖިމޭ ކަޒާން ފޮނުވާލި ހަމަލާއެއް ކުޅުންތެރިއެއްގެ ގައިގައި ޖެހިފައި މިސްރާބު ބަދަލުވެގެން ވަން ލަނޑާއި، 42 ވަނަ މިނެޓުގައި ޗަކްރޫން ކާމިޔާބުކުރި އޭނާގެ ދެވަނަ ލަނޑެވެ.
ދެވަނަ ހާފު ފެށިގެން ހަތްވަނަ މިނެޓުގައި ރާއްޖޭގެ އަހުމަދު މާއިޝް ރަޝީދު އަތުން ބައިކޮޅަށް ވަން ލަނޑާއެކު ލުބުނާނުން ލީޑު އިތުރަށް ފުޅާކުރިއެވެ. އަދި މެޗުގެ 83 ވަނަ މިނެޓާއި އިތުރު ވަގުތުގެ ދެވަނަ މިނެޓުގައި އަލީ ކައްސާސް ޖެހި ދެ ލަނޑާއެކު، ލުބުނާނުން ވަނީ 6-0 އިން މެޗު ނިންމާލާފައެވެ.
މި މެޗާއެކު ލުބުނާނާ ދެކޮޅަށް ކުޅުނު ހަ މެޗުންވެސް ރާއްޖެ ބަލިވެފައިވާއިރު، އެ މެޗުތަކުގައި ލުބުނާނުން 21 ލަނޑު ޖެހިއިރު ރާއްޖެއަށް ކާމިޔާބުކުރެވުނީ އެންމެ 3 ލަނޑެވެ.
މި ފަހަރުގެ ބްރޭކުގައި ކުޅުނު އެއްވެސް މެޗެއްގައި ރާއްޖެއަށް އިދިކޮޅު ޓީމުގެ ގޯލު ފުރާނާލެވިފައެއް ނުވެއެވެ. ޗައިނާ އަތުން 3-0 އިން އަދި ކިރްގިސްތާން އަތުން 5-0 އިން ބަލިވެފައިވާއިރު، މި ތިން މެޗުގައި ރާއްޖޭގެ ކޮޅަށް ޖުމްލަ 14 ލަނޑު ވަނީ ވަދެފައެވެ.
12 އަހަރަށްފަހު ގައުމީ ޓީމާ އަލުން ހަވާލުވި ހަންގޭރީގެ ކޯޗު އިސްތަވާން އުރްބާނީގެ އިރުޝާދުގެ ދަށުން ކުޅުނު 10 މެޗުގެ ތެރެއިން ރާއްޖެއަށް މޮޅެއް ހޯދިފައިވަނީ އެންމެ މެޗަކުންނެވެ. އެއީ މިދިޔަ މާޗު މަހު މާލޭގައި ޓިމޯ ލެސްޓޭއާ ދެކޮޅަށް ކުޅުނު މެޗުންނެވެ. ބާކީ މެޗުތަކުގެ ތެރެއިން ހަ މެޗުން ބަލިވިިއިރު، ތިން މެޗު ވަނީ އެއްވަރުވެފައެވެ.