ޖަޕާނު ސަރުކާރުން ރާއްޖެއަށް ފުރަތަމަ ފަހަރަށް ރަސްމީކޮށް ސެކިއުރިޓީ އެހީތެރިކަން (އޮފިޝަލް ސެކިއުރިޓީ އެސިސްޓެންސް) ފޯރުކޮށްދިނުމަށް ވިސްނަމުންދާ ކަމަށާއި، މިއީ ދެ ގައުމުގެ ދެމެދުގައި އޮތް ގުޅުން އައު ހަރުފަތަކަށް ގެންގޮސްދޭނެ މުހިންމު ފިޔަވަޅެއް ކަމަށް ޚާރިޖީ ވަޒީރު އިރުތިޝާމް އާދަމް މިއަދު ވިދާޅުވެއްޖެއެވެ.
ޚާރިޖީ ވަޒީރު މިހެން ވިދާޅުވީ، ރާއްޖޭގައި ޖަޕާނުގެ އެމްބަސީ ގާއިމުކުރިތާ10 އަހަރު ފުރުން ފާހަގަކުރުމަށް މިއަދު ހޮޓެލް ޖެންގައި ބޭއްވި ޚާއްސަ ހަފުލާ ޝަރަފުވެރިކޮށްދެއްވައި ވާހަކަދައްކަވަމުންނެވެ.
ވަޒީރުގެ ވާހަކަފުޅުގައި، ރާއްޖެއާއި ޖަޕާނަކީ ކަނޑުގެ ސަރަޙައްދު ބޮޑު ދެ ގައުމަށް ވުމާއެކު، އިންޑޯ-ޕެސިފިކް ސަރަޙައްދުގެ އަމާންކަމާއި މިނިވަންކަން ދެމެހެއްޓުމަށް ދެ ގައުމުން ވެސް އިސްކަންދޭ ކަމަށް ވިދާޅުވިއެވެ. އަދި ސެކިއުރިޓީ ދާއިރާއިން ޖަޕާނުން އެހީތެރިކަން ފޯރުކޮށްދޭން ނިންމުމަކީ ދެ ޤައުމުގެ އެއްބާރުލުން އިތުރަށް ފުޅާވެ، ދެމެހެއްޓެނިވި ގޮތެއްގައި ގުޅުން ބަދަހިވުމަށް އެޅޭ ބާރަކަށް ވާނެ ކަމަށް ފާހަގަކުރެއްވިއެވެ.
ޖަޕާނު ސަރުކާރުން ރާއްޖެއަށް ފުރަތަމަ ފަހަރަށް ރަސްމީކޮށް ސެކިއުރިޓީ އެހީތެރިކަން (އޮފިޝަލް ސެކިއުރިޓީ އެސިސްޓެންސް) ފޯރުކޮށްދިނުމަށް ވިސްނަމުންދާ ޚަބަރު އަޑުއެހީ ވަރަށް ބޮޑު އުފަލަކާއެކު. މިއީ އަޅުގަނޑުމެންގެ އެއްބާރުލުން އިތުރަށް ފުޅާކޮށް، ދެ ޤައުމުގެ ރައްޔިތުންގެ މެދުގައިވާ ގުޅުން އައު އުސްމިންތަކަކަށް ގެންދިއުމަށް އެޅޭ ވަރަށް މުހިންމު ފުރަތަމަ ފިޔަވަޅެއް ކަމުގައި އަޅުގަނޑުމެން ދެކެން
ޚާރިޖީ ވަޒީރު އިރުތިޝާމް އާދަމް
މީގެއިތުރުން، އދ. ގެ އާންމު މަޖިލީހުގެ ހަވާސާގައި ޖަޕާނުގެ ޚާރިޖީ ވަޒީރާ ބައްދަލުކުރައްވައި، ކުރިއަށް އޮތް އަހަރުތަކުގައި ދެ ގައުމުގެ ގުޅުން އިތުރަށް ވަރުގަދަކުރުމަށް މަޝްވަރާކުރެވުނު ކަމަށް ވަޒީރު ވިދާޅުވިއެވެ. އަދި އަންނަ އަހަރަކީ ރާއްޖެއާއި ޖަޕާނާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރޭ އަހަރު ކަމަށްވާތީ، އެ މުނާސަބަތާއެކު ދެ ގައުމުގެ ގުޅުން އިތުރު ހަރުފަތަކަށް އުފުލިގެންދާނެ ކަމަށް އުންމީދުކުރައްވާ ކަމަށްވެސް ވަޒީރު އިރުތިޝާމް ވިދާޅުވިއެވެ.
މި ހަފުލާގައި ވާހަކަދައްކަވަމުން ވަޒީރު ވަނީ މާލޭގެ ބޮޑުތަކުރުފާނު މަގުގެ ތޮށިގަނޑު ހެދުމާއި، ސްކޫލްތައް ބިނާކުރުމާއި، ކާރިސާތަކުން އަރައިގަތުމަށް ޖަޕާނުން ވެދީފައިވާ އެހީތައް ޝުކުރުވެރިކަމާއެކު ފާހަގަކުރައްވާފައެވެ.
ވޭތުވެދިޔަ 10 އަހަރު ދުވަހުގެ ތެރޭގައި ރާއްޖޭގައި ހުންނަ ޖަޕާން އެމްބަސީން ދެ ގައުމުގެ ރައްޔިތުން ގުޅުވައިދިނުމަށާއި،ރާއްޖޭގެ އިގްތިޞާދީ އަދި އިޖުތިމާޢީ ތަރައްޤީއަށް ކޮށްދެއްވާފައިވާ ޚިދުމަތްތަކަށް ސަފީރު އިޝިގާމީ ރުމީކޯއަށާއި އެމްބަސީގެ ޓީމަށް ވަޒީރު ޝުކުރު އަދާކުރެއްވިއެވެ.