ދައުލަތުގެ ޚަރަދުތައް އިތުރުވަމުން ގޮސް، މިދިޔަ އަހަރާ އަޅައިބަލާއިރު ދައުލަތް ހިންގުމަށް ކުރި ޚަރަދު 24.3 އިންސައްތަ އިތުރުވެފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ނިމިދިޔަ ސެޕްޓެންބަރު މަހުގެ ތިންވަނަ ދުވަހާ ހަމައަށް ދައުލަތުގެ ބަޖެޓުން ޚަރަދުވި ވަރު ހާމަކުރުމަށްފަހު، އެންމެ ފަހުގެ ތަފާސްހިސާބުތައް ފިނޭންސް މިނިސްޓްރީން އާންމުކުރީ މިއަދެވެ. އެ ތަފާސްހިސާބުތަކުގައިވަނީ ސެޕްޓެންބަރު މަހުގެ 24ވަނަ ދުވަހުގެ ނިޔަލަށް ކުރި ޚަރަދުތައް އާންމުކޮށްފައެވެ.
މިނިސްޓްރީގެ ތަފާސްހިސާބުތަކުގައިވާ ގޮތުން އިދާރީ އަދި ހިންގުމުގެ ޚަރަދަށް ސެޕްޓެންބަރު މަހުގެ 24ވަނަ ދުވަހުގެ ނިޔަލަށް ހިނގައިފައިވަނީ 18.12 ބިލިއަން ރުފިޔާއެވެ. އެއީ މިދިޔަ އަހަރުގެ އެ މުއްދަތުގައި އިދާރީ އަދި ހިންގުމަށް ޚަރަދުކުރި 14.58 ބިލިއަން ރުފިޔާއަށް ވުރެ 24.28 އިންސައްތަ އިތުރު އަދަދެކެވެ.
އެ ތަފާސްހިސާބުތަކުން ހާމަވާ ގޮތުގައި ސަރުކާރުން މިދިޔަ އަހަރަށް ވުރެ މި އަހަރު ސަބްސިޑީއަށް ކުރި ޚަރަދު 77.35 އިންސައްތަ އިތުރެވެ. އެގޮތުން ސެޕްޓެންބަރު 24ގެ ނިޔަލަށް ސަބްސިޑީއަށް 4.15 ބިލިއަން ރުފިޔާ ޚަރަދުކުރިއިރު މިދިޔަ އަހަރުގެ އެ މުއްދަތުގައި ސަބްސިޑީއަށް ޚަރަދުކުރީ 2.34 ބިލިއަން ރުފިޔާއެވެ.
ސަބްސިޑީއަށް މި އަހަރު ކޮށްފައިވާ ޚަރަދަކީ، ސަރުކާރުން މި އަހަރު އެކަމަށް ކަނޑައެޅި ބަޖެޓު ކަމަށްވާ 2.89 ބިލިއަން ރުފިޔާއަށް ވުރެ 43.6 އިންސައްތަ އިތުރު އަދަދެކެވެ.
ފިނޭންސް މިނިސްޓަރު ޙަސަން ޒަރީރު: ދައުލަތުގެ ހޭދަ އަދިވެސް އިތުރުވެ، ހިންގުމުގެ ޚަރަދު ވަނީ 24.3 އިންސައްތަ އުފުލިފައި -- ފޮޓޯ/ ފިނޭންސް މިނިސްޓްރީމީގެ އިތުރުން މިނިސްޓްރީގެ ތަފާސްހިސާބުތަކުން އެނގޭ ގޮތުގައި ސަރުކާރުން ސްޓޫޑެންޓް ލޯންތައް ހިމެނޭ ގޮތަށް، އެކި ފަރާތްތަކަށް ދީފައިވާ ފައިސާގެ އަދަދު ވަނީ 1.41 ބިލިއަން ރުފިޔާއަށް އަރައިފައެވެ. އެއީ އެކަމަށް މި އަހަރުގެ ބަޖެޓުން ކަނޑައެޅި އަދަދު ކަމަށްވާ 1.14 ބިލިއަން ރުފިޔާއަށް ވުރެ 23.68 އިންސައްތަ އިތުރު އަދަދެކެވެ. ނަމަވެސް އެއީ މިދިޔަ އަހަރުގެ ސެޕްޓެންބަރު މަހުގެ 24ވަނަ ދުވަހުގެ ނިޔަލަށް ޚަރަދުކުރި އަދަދު ކަމަށްވާ 2.36 ބިލިއަން ރުފިޔާއަށް ވުރެ 31.25 އިންސައްތަ ދަށް އަދަދެކެވެ.
ސަރުކާރުން މިހާތަނަށް ވަނީ ސެޕްޓެންބަރު 24ގެ ނިޔަލަށް 33.56 ބިލިއަން ރުފިޔާ ޚަރަދުކޮށްފައެވެ. އެހެންކަމުން މިދިޔަ އަހަރުގެ އެ މުއްދަތުގައި ޚަރަދުކުރި 28.25 ބިލިއަން ރުފިޔާއަށް ވުރެ ސަރުކާރުން މި އަހަރު ކުރި ޚަރަދު ވަނީ 18.8 އިންސައްތަ އިތުރުވެފައެވެ.
ފާހަގަކުރެވޭ ގޮތުގައި ދައުލަތުގެ ޚަރަދު ކުޑަކުރުމަށް މިދިޔަ އަހަރުގެ ބަޖެޓުގައި ހިމެނި ފިޔަވަޅުތަކުގެ ތެރޭގައި ކަރަންޓާއި ކާބޯތަކެތި އަގުހެޔޮ ކުރުމަށް އެންމެނަށް ދޭ ސަބްސިޑީ، އެހީ ބޭނުންވާ މީހުންނަށް ދިނުން ހިމެނެއެވެ. އެހެންނަމަވެސް، މިދިޔަ އަހަރުގެ ވަކި ހިސާބަކުން ރައީސް ޑރ. މުޙައްމަދު މުޢިއްޒު ވަނީ އެ އިސްލާހުތައް ތަންފީޒު ނުކުރުމަށް ނިންމަވައިފައެވެ. އެއީ، ރައްޔިތުންނަށް ދެމުން އައި އެއްޗެއް އުނިނުކުރުމުގެ ގޮތުން ކަމަށް އެ މަނިކުފާނު ވިދާޅުވިއެވެ.
ރައީސްގެ އެ ނިންމެވުމަށް އިގުތިޞާދީ މާހިރުންގެ ފާޑުކިޔުންތައް އަމާޒުވިއެވެ.
ރާއްޖޭގައި ދައުލަތުގެ ޚަރަދުތައް ކުޑަކުރަން ބޭރުގެ އިދާރާތަކުން ވެސް ލަފާ ދެމުން އަންނަތާ އަހަރުތަކެއް ވަނީ ވެފައެވެ. އޭޝިއަން ޑިވެލޮޕްމަންޓް ބޭންކް (އޭޑީބީ)ން އެންމެ ފަހުން ނެރުނު ރިޕޯޓުގައި ވަނީ، ސަރުކާރު ކުންފުނިތަކާއި ސަބްސިޑީ ސްކީމްތަކަށް ގެންނަން ޖެހޭ އިސްލާހުތައް ގެނައުން ލަސްވާތީ ގައުމުގެ އިގުތިސާދަށް އޮތް ނުރައްކާ ބޮޑު ކަމުގެ ކަންބޮޑުވުން ފާޅުކޮށްފައެވެ.