އިންޑިއާ ކަނޑުގެ ސަރަހައްދުގެ ސަލާމަތާއި ރައްކާތެރިކަމާ ގުޅޭގޮތުން މަޝްވަރާކުރުމަށް އިންޑިއާއިން އިންތިޒާމުކޮށްގެން ވާޗުއަލްކޮށް ބޭއްވި ކޮލަމްބޯ ސެކިއުރިޓީ ކޮންކްލޭވް (ސީއެސްސީ) ގެ ނުވަވަނަ ޑެޕިއުޓީ ނޭޝަނަލް ސެކިއުރިޓީ އެޑްވައިޒަރުންގެ ބައްދަލުވުމުގައި ދިވެހިރާއްޖެއިން ބައިވެރިވެއްޖެއެވެ.
އިއްޔެ ބޭއްވި މި ބައްދަލުވުމުގައި ރާއްޖޭގެ އިތުރުން ބަންގްލަދޭޝް، މޮރިޝަސް، ސްރީލަންކާ އަދި ސީޝެލްސްއިން ވަނީ ބައިވެރިވެފައެވެ. އިންޑިއާގެ މިނިސްޓްރީ އޮފް އެކްސްޓާނަލް އެފެއާޒުން ނެރުނު ބަޔާނެއްގައި ބުނެފައިވާ ގޮތުގައި، މި ބައްދަލުވުމުގައި ރާއްޖޭގެ ވަފުދުގެ އިސްކޮށް ހުންނެވީ ޑެޕިއުޓީ ނޭޝަނަލް ސެކިއުރިޓީ އެޑްވައިޒަރު މޭޖާ ޖެނެރަލް (ރިޓަޔާޑް) ހާމިދު ޝަފީގެވެ.
މި ބައްދަލުވުމުގައި މެންބަރު ގައުމުތަކުން ވަނީ މިދިޔަ އަހަރުގެ ނޮވެންބަރު މަހުގެ 20 ވަނަ ދުވަހު ނިއުދިއްލީގައި ބޭއްވި ސީއެސްސީގެ ހަތްވަނަ ނޭޝަނަލް ސެކިއުރިޓީ އެޑްވައިޒަރުންގެ ބައްދަލުވުމުގައި ނިންމާފައިވާ ނިންމުންތަކަށް އަމަލުކުރެވެމުންދާ މިންވަރު މުރާޖައާކޮށްފައެވެ. މީގެ އިތުރުން، 2025 އިން 2026 އަށް އެކުލަވާލާފައިވާ ކޯޕަރޭޝަން އެންޑް އެކްޓިވިޓީސް ރޯޑްމެޕްގެ ދަށުން ހޯދިފައިވާ ކުރިއެރުންތަކާ މެދުވެސް މަޝްވަރާކޮށްފައިވެއެވެ.
ސީއެސްސީގެ އެއްބާރުލުން ދިނުމުގެ މައިގަނޑު ފަސް ދާއިރާ ކަމަށްވާ ކަނޑުމަތީގެ ސަލާމަތާއި ރައްކާތެރިކަން، ޓެރަރިޒަމާއި ހަރުކަށި ފިކުރާ ދެކޮޅަށް މަސައްކަތްކުރުން، ޓްރެފިކިން އަދި ގައުމުތައް ހުރަސްކޮށް ހިންގާ ކުށްތައް ހުއްޓުވުން، ސައިބާ ސެކިއުރިޓީ އަދި މުހިންމު އުމްރާނީ ވަސީލަތްތައް ހިމާޔަތްކުރުން، އަދި އިންސާނީ އެހީތެރިކަން ފޯރުކޮށްދިނުމާއި ކާރިސާތަކުން ސަލާމަތްވުމުގެ ދާއިރާއިން ގުޅިގެން ހިންގާ ތަމްރީނު ޕްރޮގްރާމްތަކާއި ގާބިލުކަން އިތުރުކުރުމުގެ ހަރަކާތްތަކުގެ ކުރިއެރުމާ މެދު ބައިވެރިވި ގައުމުތަކުން ވަނީ ހިތްހަމަޖެހުން ފާޅުކޮށްފައެވެ.
އެކި ގައުމުތަކުގެ ވަފުދުތަކުގައި އިސްކޮށް ހަރަކާތްތެރިވެފައިވަނީ އެ ގައުމުތަކުގެ ސަލާމަތީ ދާއިރާގެ އިސް އޮފިޝަލުންނެވެ. އެގޮތުން އިންޑިއާގެ ވަފުދުގެ އިސްކޮށް ހުންނެވީ ޑެޕިއުޓީ ނޭޝަނަލް ސެކިއުރިޓީ އެޑްވައިޒަރު ޕަވަން ކަޕޫރެވެ. ބަންގްލަދޭޝްގެ ވަފުދުގެ އިސްކޮށް ބްރިގޭޑިއާ ޖެނެރަލް މުހައްމަދު އަލީ ހައިދަރު ސިއްދީގީ ހުންނެވިއިރު، މޮރިޝަސް ތަމްސީލުކުރެއްވީ ކޭ. ޖަޔަޕްރޮކާޝްއެވެ. އަދި ސީޝެލްސްގެ ފަރާތުން ޖޮއެލް މޯގަން ބައިވެރިވެވަޑައިގަތްއިރު، ސްރީލަންކާގެ ވަފުދުގެ އިސްކޮށް ހުންނެވީ ޕީ.ޑީ އިންޑިކާ އެލް. ވިޖެގުނަވަރުދަނާއެވެ. މީގެ އިތުރުން، ކޮލަމްބޯގައި ގާއިމުކޮށްފައިވާ ސީއެސްސީ ސެކްރެޓޭރިއަޓްގެ ފަރާތުން މި ބައްދަލުވުމުގައި ބައިވެރިވެވަޑައިގަތީ ދާދިފަހުން މަގާމާ ހަވާލުވެވަޑައިގަތް ސެކްރެޓަރީ ޖެނެރަލް ވައިސް އެޑްމިރަލް (ރިޓަޔާޑް) އެސް.އެން ގޯރްމާޑޭއެވެ.
އިންޑިއާ ކަނޑުގެ ގައުމުތަކުގެ މެދުގައި ސަލާމަތީ ގޮތުން އެއްބާރުލުން އިތުރުކުރުމަށް އަމާޒުކޮށްގެން ކޮލަމްބޯ ސެކިއުރިޓީ ކޮންކްލޭވް އުފައްދާފައިވަނީ 2020 ވަނަ އަހަރުއެވެ. މި ޖަމާއަތުގެ މެންބަރު ގައުމުތަކަކީ އިންޑިއާ، ސްރީލަންކާ، ދިވެހިރާއްޖެ، މޮރިޝަސް، ބަންގްލަދޭޝް އަދި ސީޝެލްސްއެވެ. ދިވެހިރާއްޖެއިން ސީއެސްސީގައި ބައިވެރިވުމުގެ މައިގަނޑު ބޭނުމަކީ ސަރަހައްދީ ސަލާމަތާ ގުޅޭ ކަންކަމުގައި އިންޑިއާ ކަނޑުގެ އެހެން ގައުމުތަކާއެކު ގުޅުން ބަދަހިކުރުމާއި، ގާބިލުކަން އިތުރުކުރުމާއި ތަމްރީނު ހޯދުމުގެ އިތުރުން ކާރިސާތަކުގައި އެހީތެރިކަން ފޯރުކޮށްދިނުމުގެ ދާއިރާއިން އެއްބާރުލުން ހޯދުމެވެ.