އާޖެންޓީނާގެ ފުޓުބޯޅަ ތަރި ލިއޮނެލް މެސީއަށް، ޔުނިވާސިޓީ އޮފް ބުއެނޯސް އައިރިސްއިން ދޭ އެންމެ މަތީ ޝަރަފު ކަމަށްވާ 'ޑޮކްޓަރ އޮނޮރިސް ކޯސާ' އެރުވުމަށް އެ ޔުނިވާސިޓީން ނިންމައިފިއެވެ.
އުމުރުން 39 އަހަރުގެ މެސީއަށް މި ޝަރަފު އެރުވުމަށް ހަމަޖެހިފައިވަނީ އަންނަ އަންގާރަ ދުވަހުއެވެ. މިއީ އޭނާ އާޖެންޓީނާގެ ގައުމީ ޓީމަށް ކުޅެދޭ ފަހު މެޗު ކުޅުމަށް ހަމަޖެހިފައިވާ ދުވަހެވެ.
އެ ޔުނިވާސިޓީގެ ސުޕީރިއާ ކައުންސިލްގެ އިއްތިފާގުން މިގޮތަށް ނިންމާފައިވަނީ، މެސީގެ މޮޅުކަމާއި، ހިތްވަރާއި، މަޑުމައިތިރިކަމުގެ އިތުރުން އާޖެންޓީނާ ތަމްސީލުކުރުމަށް އޭނާ ދީފައިވާ އަހައްމިއްޔަތުކަން ފާހަގަކުރުމުގެ ގޮތުންނެވެ. ޔުނިވާސިޓީގެ އިސްވެރިޔާ ރިކާޑޯ ގެލްޕީ ވިދާޅުވި ގޮތުގައި، މެސީއަކީ އާޖެންޓީނާގެ ސަގާފަތާއި ގައުމީވަންތަކަމުގެ ނަމޫނާއެކެވެ. އަދި މިއީ ހަމައެކަނި އޭނާ ހޯދާފައިވާ ކާމިޔާބީތަކާއި ތަށިތަކަށް ބަލައި ދޭ ޝަރަފެއް ނޫން ކަމަށް ވެސް އޭނާ ފާހަގަކުރެއްވިއެވެ.
ޑޮކްޓަރުކަމުގެ ޝަރަފާ ހަވާލުވުމަށްފަހު، އެ ދުވަހު މޮނިއުމެންޓަލް ސްޓޭޑިއަމްގައި ބެނިންއާ ދެކޮޅަށް ކުޅޭ މެޗަކީ މެސީގެ ބައިނަލްއަގުވާމީ ކެރިއަރުގެ ފަހު މެޗެވެ. މިއީ އޭނާ ގައުމީ ޓީމަށް ކުޅެދޭ 208 ވަނަ މެޗެވެ. އާޖެންޓީނާ ފުޓްބޯލް އެސޯސިއޭޝަން (އޭއެފްއޭ) ގެ ރައީސް ކްލައުޑިއޯ ޓަޕިއާ ވިދާޅުވި ގޮތުގައި، މި މެޗު ރާވާފައިވަނީ މެސީއަށް ހައްގުވާ ފަދަ ފުރިހަމަ ވަދާއީ މެޗެއް ދިނުމުގެ ގޮތުންނެވެ.
ވިހި އަހަރަށް ވުރެ ދިގު މުއްދަތެއްގައި އާޖެންޓީނާގެ ގައުމީ ޓީމަށް ކުޅެދީފައިވާއިރު، މެސީ ވަނީ އެ ޓީމާއެކު 2022 ވަނަ އަހަރުގެ ވޯލްޑް ކަޕާއި، 2021 އަދި 2024 ވަނަ އަހަރުގެ ކޮޕާ އެމެރިކާގެ އިތުރުން 2022 ވަނަ އަހަރުގެ ފައިނަލިސިމާ ކާމިޔާބުކޮށްފައެވެ.