އެޑްވެންޗާ އަޕްއިން އިންތިޒާމުކޮށްގެން ބާއްވާ އައިލެންޑް ކާނިވަލްގެ ދެވަނަ އެޑިޝަން "ބޮޑުތިލަދުންމަތީ ބޮޑު ބާޒާރު" އާއި އެކު ހދ. ކުޅުދުއްފުށި ސިޓީގައި މިއަދު ފަށައިފިއެވެ.
ބޮޑުތިލަދުންމަތި ބޮޑު ބާޒާރާއި އެކު ބާއްވާ އައިލެންޑް ކާނިވަލް ރަސްމީކޮށް ހުޅުވައިދެއްވީ އެކަމަށްޓަކާ މިއަދު ހަވީރު ބޭއްވި ރަސްމިއްޔާތެއްގައި ކުޅުދުއްފުށީ ސިޓީ ކައުންސިލް މޭޔަރު މުހައްމަދު އާތިފެވެ.
ޚާއްސަ ރަސްމިއްޔާތަކާއެކު މިއަދު ފެށި މި ކާނިވަލާއި ބާޒާރުގެ ހަރަކާތްތައް އަންނަ މަހުގެ ހަތަރުވަނަ ދުވަހުގެ ނިޔަލަށް ކުރިއަށްދާނެއެވެ.
އައިލެންޑް ކާނިވަލްގެ ހަރަކާތްތައް ފެށުމުގެ ރަސްމިއްޔާތުގައި ވާހަކަދައްކަވަމުން ކުޅުދުއްފުށީ މޭޔަރު މުޙައްމަދު އާތިފް ވިދާޅުވީ، މިއަދު މި ފެށުނީ ކުޅިވަރާއި ވިޔަފާރި އަދި މުނިފޫހިފިލުވުމުގެ ބޮޑު އީދެއް ކަމަށެވެ. އަދި ސިޓީ ކައުންސިލްގެ އަމާޒަކީ ކުޅުދުއްފުއްޓަކީ ވިޔަފާރިއަށް ފަހި މާހައުލަކަށް ހެދުމާއި، ވިޔަފާރިތައް ފުޅާކޮށް އަލަށް ފަށަން ބޭނުންވާ ފަރާތްތަކަށް ފުރުސަތުތައް ހޯދައިދިނުން ކަމަށާއި، މި ބާޒާރަކީ އޭގެ މުހިންމު އެއް ފިޔަވަޅު ކަމަށް މޭޔަރު ފާހަގަކުރެއްވިއެވެ.
ކުޅުދުއްފުށި ސިޓީގައި މިއަދު ފެށުނު އައިލެންޑް ކާނިވަލްގެތެރެއިން... ފޮޓޯ/ ކުޅުދުއްފުށި ސިޓީ ކައުންސިލް"މިއަދު މި ފެށެނީ ކުޅިވަރާއި ފިޔަފާރިއާއި ނުވަތަ މުނިފޫހި ފިލުމުގެ ބޮޑު ޢީދެއް. ޚާއްސަކޮށް ކުޅުދުއްފުށި ސިޓީ ކައުންސިލްގެ ފަސް އަހަރުގެ ދައުރުގެ ޕޮލޭން އެކުލަވާލަމުން ދާއިރު، ސިޓީ ކައުންސިލްގެ އެއް އަމާޒަކީ ކުޅުދުއްފުށީގެ ވިޔަފާރިތަކަށް ފަހި މާހައުލެއް ނުވަތަ ކުޅުދުއްފުއްޓަކީ ވިޔަފާރިއަށް ފަހި މާހައުލެއް ކަމުގައި ހެދުން." މޭޔަރު އާތިފް ވިދާޅުވިއެވެ.
މީގެ އިތުރުން އާތިފް ވިދާޅުވީ ކުޅުދުއްފުށީގެ ވިޔަފާރިތައް ފުޅާކުރުމާއި އަލަށް ވިޔަފާރި ފަށަން ބޭނުންވާ ފަރާތްތަކަށް އިތުރު ފުރުސަތުތަކެއް ފަހިކޮށްދިނުމަކީ މިއަދު ފެށިގެން ދިއަ އިވެންޓުގެ އަމާޒެއް ކަމަށެވެ. އެގޮތުން މިއަދު ހުޅުވިގެން މިދާ ބާޒާރާއި ކާނިވަލް އަކީ އޭގެ މުހިންމު އެއް ބިންގާކަމަށް މޭޔަރު ވިދާޅުވިއެވެ.
ކުޅުދުއްފުށި ސިޓީގައި މިއަދު ފެށުނު ބޮޑު ބާޒާރާއި އައިލެންޑް ކާނިވަލްގެ ރަސްމިއްޔާތު ފެށުމުގެ ތެރެއިން މޭޔަރު އާތިފް ވާހަކަދައްކަވަނީ... ފޮޓޯ/ ކުޅުދުއްފުށި ސިޓީ ކައުންސިލްމުޅި ބޮޑުތިލަދުންމައްޗަށް އަމާޒުކޮށްގެން "ބޮޑުތިލަދުންމަތީ ބޮޑު ބާޒާރު" ގެ ނަމުގައި ކުރިއަށް ގެންދާ މި ބާޒާރަކީ މި ސަރަހައްދުގެ ވިޔަފާރިތަކުން ޚާއްސަކޮށް ކުޅުދުއްފުށީ ވިޔަފާރިތަކުގެ މުޢާމަލާތްތައް އިތުރު ކުރުމަށް އަދި ވިޔަފާރިތައް އިސްތިހާރުކުރުމަށް ފަހިކޮށްދޭ ފުރުސަތެއް ކަމަށް މޭޔަރު އާތިފް ވިދާޅުވިއެވެ.
ހަމައެއާއެކު މި ބާޒާރުގެ ޚާއްސަކަމަކީ އެޑްވެންޗާ އަޕްގެ ޓީމުން ބައިވެރިވެ ކުޅުދުއްފުށީގައި އައިލެންޑް ކާނިވަލްގެ ނަމުގައި ޒަމާނީ ކުޅިވަރުތަކާއެކު ކާނިވަލެއް އިންތިޒާމުވެގެންދާކަން ކަމަށް މޭޔަރު ވިދާޅުވިއެވެ. އަދި އުންދީދަކީ މި ކާނިވަލްގެ ތެރެއިން ކުޑަކުދިންނާއި ބޮޑެތި މީހުންނަށް ވެސް މި ކާނިވަލްގެ ތެރެއިން މީގެ ކުރިން ތަޖުރިބާކޮށްލަން ނުލކިބޭފަދަ ޒަމާނީ ގޭމުތަކެއް ތަޖުރިބާކޮށްލަން ލިބިގެން ދިއުންކަމަށް ވިދާޅުވިއެވެ.
ކުޅުދުއްފުށި ސިޓީގައި މިއަދު ފެށުނު ބޮޑު ބާޒާރާއި އައިލެންޑް ކާނިވަލްގެ ރަސްމިއްޔާތު ފެށުމުގެ ތެރެއިން އެޑްވެންޗާ އަޕްގެ ޗީފް ކޮމާޝަލް އޮފިޝަ ހަނޫން މުޙައްމަދު އިބުރާހީމް ވާހަކަދައްކަވަނީ... ފޮޓޯ/ ކުޅުދުއްފުށި ސިޓީ ކައުންސިލްމި ރަސްމިއްޔާތުގައި އައިލެންޑް ކާނިވަލްގެ ފަރާތުން ވާހަކަދެއްކެވި އެޑްވެންޗާ އަޕްގެ ޗީފް ކޮމާޝަލް އޮފިސާ ހަނޫން މުޙައްމަދު އިބްރާހީމް ވިދާޅުވީ ކުޅުދުއްފުށީގެ ބޮޑު ބާޒާރާއެކު އައިލެންޑް ކާނިވަލް ބާއްވަން ފުރުސަތު ދެއްވުމަކީ ކުޅުދުއްފުށީ ސިޓީ ކައުންސިލަށް ޝުކުރު އާދާކުރަން ޖެހޭކަމެއް ކަމަށެވެ.
ހަނޫން ވިދާޅުވީ މިއީ މީގެ ކުރިން އެއްވެސް ކައުންސިލަކުން ނުދޭފަދަ ފުރުސަތެއް ކަމަށާއި ކުޅުދުއްފުށީ ސިޓީ ކައުންސިލުން ވަރަށް ބޮޑު އެއްބާރުލުމަކާއި އެހީތެރިކަމެއް ލިބުނުކަމަށެވެ.
ހަނޫން ވިދާޅުވީ މިއަދު ފެށިގެންދިއަ އައިލެންޑް ކާނިވަލް މެދުވެރިކޮށް މުޖުތަމައުއަށް ޒަމާނީ ކުޅިވަރުތައް ގެނެސްދެވޭނެ ކަމަށާއި މި ކުޅިވަރުތަކުގެ އެންމެ ބޮޑު އަމާޒަކީ ރަށުގައި ދިރިއުޅޭ ޒުވާނުން އެއްތަނަކަށް ޖަމާވެ، ޚާއްސަކޮށް ރަށުން ބޭރަށް ނުގޮސް ކުރެވޭނެ އިންތިޒާމެއް ގާއިމްކުރުން ކަމަށް އޭނާ ވިދާޅުވިއެވެ.
އެޑްވެންޗާ އަޕްއިން ހާމަކުރި ގޮތުގައި، މި ކާނިވަލުގައި އިންފްލޭޓަބަލްސް، ލޭޒާޓެގް، ބެޓަލް ޒޯން އަދި ލައިވް ހުށަހެޅުންތައް ފެންނާނެ ކަމަށާއި މި ފަހަރުގެ ކާނިވަލް ވެގެންދާނީ އެންމެ ފުރިހަމަ ކާނިވަލަށް ކަމަށެވެ. އަދި ކާނިވަލުގައި ޖުމްލަ 12 ކުޅިވަރެއް ހިމެނޭއިރު، ބޮޑުބެރާއި މިއުޒިކް ބޭންޑްތަކުގެ ހުށަހެޅުންތަކުގެ އިތުރުން "ބިރުވެރި ހޮހޮޅަ" ތަޖުރިބާކުރުމުގެ ފުރުސަތު ވެސް ވަނީ ހުޅުވާލާފައެވެ.
ކުޅުދުއްފުށި ސިޓީގައި މިއަދު ފެށުނު އައިލެންޑް ކާނިވަލްގެތެރެއިން... ފޮޓޯ/ ކުޅުދުއްފުށި ސިޓީ ކައުންސިލްއަތޮޅުތެރޭގައި ބާއްވާ މިފަދަ އެންމެ ބޮޑު ބާޒާރުގެ ގޮތުގައި ކުރިއަށްދާ މި ހަރަކާތުގައި 22 ވިޔަފާރިއަކުން ބައިވެރ، ހެޔޮއަގުގައި މުދާ ވިއްކުމަށް ވަނީ ހަމަޖެހިފައެވެ.
މި ކާނިވަލުގެ އެއް ސްޕޮންސަރު ކަމަށްވާ އެސްއެމްއީ ޑިޖިޓަލް އިން ވެސް މި ހަރަކާތުގައި ބައިވެރިވެ، ކުދި އަދި މެދުފަންތީގެ ވިޔަފާރިތަކަށް ފައިނޭންސިންއާ ގުޅޭ މައުލޫމާތު ދިނުމާއި، އެޕްލިކޭޝަން ހުށަހެޅުމަށް ބޭނުންވާ އެހީތެރިކަން ފޯރުކޮށްދިނުމަށް ވަނީ ހަމަޖެހިފައެވެ.
އަދި ކޮންވެންޝަނަލް ލޯނުތައް އިސްލާމިކް ފެސިލިޓީތަކަށް ބަދަލުކުރުމުގެ އެހީތެރިކަން ވެސް އެ ފަރާތުން ފޯރުކޮށްދޭނެއެވެ. މި ފަހަރުގެ އައިލެންޑް ކާނިވަލްގެ މީޑިއާ ޕާޓްނަރަކީ އެސްއެސް މީޑިއާއެވެ.