ދިވެހި ރައްޔިތުންގެ ބޯހިޔާވަހިކަމަށް ބުނެ ދައުލަތުގެ ބަޖެޓުން ޚަރަދުކޮށްގެން ހިއްކަމުންދާ ކ. ފުށިދިއްގަރު ފަޅު (ރަސްމާލެ) އަބޫދާބީގެ އީގަލް ހިލްސް ކުންފުންޏަށް ދިނުމަށް ވެފައިވާ އެއްބަސްވުމާ ގުޅޭ ރަސްމީ ހުރިހާ ލިޔެކިޔުންތައް ހާމަކުރުމަށް ގޮވާލައި ޕީޕަލްސް ނެޝަނަލް ފްރަންޓް (ޕީއެންއެފް) އިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ސިޓީއެއް ފޮނުވައިފިއެވެ.
ޕީއެންއެފްއިން ރައީސް މުޢިއްޒަށް ފޮނުވި ސިޓީގައި ފާހަގަކޮށްފައިވާ ގޮތުގައި، ރަސްމާލޭގެ ވެލިފުކެއް ވެސް ރާއްޖެއިން ބޭރު ބަޔަކަށް ކުއްޔަށް ނުވަތަ އެނޫންވެސް ގޮތަކަށް ނުދެއްވާނެ ކަމަށް ރައީސް ވަނީ މީގެ ކުރިން ވިދާޅުވެފައެވެ.
އެހެން ނަމަވެސް، ގާތްގަނޑަކަށް 20 ބިލިއަން އެމެރިކާ ޑޮލަރުގެ މި މަޝްރޫއުގެ ދަށުން 500 ހެކްޓަރުގެ ބިން އީގަލް ހިލްސްއަށް ކަނޑައަޅައި، އެއްބަސްވުމުގައި ސޮއިކޮށްފައިވާކަމަށް ސިޓީގައި ފާހަގަކޮށްފައިވެއެވެ. އަދި މި މުޢާމަލާތުގެ ޙަގީގީ ކެޕިޓަލް ކޮމިޓްމަންޓާއި ފައިނޭންސިންގެ ތަފްސީލުތަކާއި ބިން ދިނުމުގެ ސީދާ ޝަރުތުތައް ސަރުކާރުން ހާމަކޮށްފައި ނުވާ ކަމަށް ވެސް ބަޔާންކޮށްފައިވެއެވެ.
އީގަލް ހިލްސް އާއި ދިވެހި ސަރުކާރާ ދެމެދު ރާއްޖޭގައި 20 ބިލިއަން ޑޮލަރު ނުވަތަ ގާތްގަނޑަކަށް 308 ބިލިއަން ރުފިޔާގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް ސޮއިކުރުން -- ފޮޓޯ: ހައުސިން މިނިސްޓްރީއެ ސިޓީގައި ޕީއެންއެފްއިން ވަނީ މި މުޢާމަލާތާ ގުޅިގެން މުހިންމު 15 ސުވާލަކަށް ސަރުކާރުން ސާފު ޖަވާބު ދިނުމަށާއި ގުޅުންހުރި ލިޔެކިޔުންތައް ހާމަކުރުމަށް އެދިފައެވެ. އޭގެ ތެރޭގައި ރަސްމާލެއިން ބިން ދިނުމަށް އާންމުކޮށް ހުޅުވާލިތޯއާއި، މި މުޢާމަލާތް ފެށުނު ގޮތާއި، ވަޒީރުންގެ މަޖިލީހަށާއި އިކޮނޮމިކް ކައުންސިލަށް ހުށަހަޅައި މަޝްވަރާކުރެވުނުތޯ އަދި އީގަލް ހިލްސްގެ ޑިއު ޑިލިޖެންސް ހަދާފައިވޭތޯ ހިމެނެއެވެ.
މީގެއިތުރުން، 500 ހެކްޓަރުގެ ބިން ދޫކުރި އަގާއި މުއްދަތު، މުއްދަތު އިތުރުކުރެވޭނެ އުސޫލުތައް، އެ ބިން އެހެން ފަރާތްތަކަށް މިލްކުކޮށްދެވޭނެތޯ އަދި އިޒްރޭލުގެ ރައްޔިތުންނަށް ނުވަތަ ޒަޔަނިސްޓުންނަށް މި މުޢާމަލާތުގައި ބައިވެރިނުވެވޭނެ ފަދަ ޝަރުތެއް އޮތްތޯ ސާފުކުރުމަށް ވެސް އެދިފައިވެއެވެ. އަދި މި މަޝްރޫޢުން ދައުލަތަށް ލިބޭނެ ކަމަށް ލަފާކުރާ ރެވެނިއުގެ ތަފްސީލާއި، މިހާތަނަށް ފައިސާއެއް ލިބިފައިވާނަމަ އެކަމުގެ ތަފްސީލު ހާމަކުރުމަށް ވަނީ ގޮވާލާފައެވެ.
ރަސްމާލެ ހިއްކުމުގެ މަސައްކަތް ކުރަނީ -- ފޮޓޯ: އެމްއޭސީއެލްމީގެ އިތުރުން ބޭރުގެ ފަރާތްތަކުން އެތަނުން ތަންތަން ގަންނައިރު އެ ފަރާތްތަކުގެ ޙައްޤުތައް ރައްކާތެރިކުރެވޭނެ ގޮތްތަކާއި، މައްސަލައެއް ޖެހިއްޖެނަމަ ބެލުމުގެ އިޚްތިޞާޞް (ޖޫރިސްޑިކްޝަން) ލިބޭ ގައުމަކާއި، ރައްޔިތުންގެ މަޖިލީހުގެ ރުހުން ހޯދާފައި ނުވާ ސަބަބު ހާމަކުރުމަށްވެސް ވަނީ އެދިފައެވެ. އަދި ކުރިން އެ ފަޅާ ގުޅޭގޮތުން ހެދިފައިވާ އެއްބަސްވުންތަކުގެ ސަބަބުން މި މަޝްރޫޢަށް ކޮށްފާނެ އަސަރާއި، ދައުލަތުގެ އެއްވެސް މުއައްސަސާއަކުން މި މަޝްރޫޢާ ގުޅޭ ލިޔެކިޔުންތަކެއް ގެއްލިގެން އުޅޭތޯވެސް ވަނީ ސުވާލު އުފައްދާފައެވެ.
ޕީއެންއެފްގެ ސިޓީގައި އިތުރަށް އެދިފައި ވަނީ މި މުޢާމަލާތުގެ ސަބަބުން ދައުލަތުން އުފުލަންޖެހޭ މާލީ ބުރަތަކާއި އެކަންކަން ކުޑަކުރުމަށް ރާވާފައިވާ ގޮތްތަކާއި، ކޮރަޕްޝަން ހުއްޓުވުމަށް އެޅި ފިޔަވަޅުތަކުގެ އިތުރުން އެ ބިން ހިއްކުމަށް ދައުލަތުން ކުރި ޖުމްލަ ޚަރަދު ހާމަކުރުމަށެވެ. އަދި މިކަމާ ގުޅިގެން ސޮއިކުރަންޖެހޭ އިތުރު އެއްބަސްވުންތަކާއި، މި މުޢާމަލާތަށްޓަކައި ޤާނޫނުއަސާސީ އަދި ޤާނޫނުތަކަށް ގެންނަންޖެހޭ އިޞްލާޙުތަކާ ގުޅޭގޮތުން ސުވާލުކުރަމުން، މި މުޢާމަލާތުގައި ގޮތް ނޭނގޭ އެތައް ކަމެއް ހުރުމުން ދައުލަތުގެ މިނިވަންކަމާއި އިސްތިޤްލާލަށް ނުރައްކާ އޮތް ކަމަށް ބެލެވޭތީ ޙަޤީޤީ ތެދު މައުލޫމާތު ރައްޔިތުންނަށް ހާމަކޮށްދޭން ޖެހޭ ކަމަށް އެ ޕާޓީން ވަނީ ފާހަގަކޮށްފައެވެ.