ރިބާތު (30 ސެޕްޓެމްބަރު 2026) : ހުޅަނގު އެފްރިކާގެ އަރަބި ގައުމެއްކަމަށްވާ މަޣްރިބުގައި ބޭއްވި އާންމު އިންތިޚާބުގައި އެންމެ ގިނަ ގޮނޑި ކާމިޔާބުކުރި އެ ގައުމުގެ "އަސާލާ ވަލްމުއާސިރާ" ޕާޓީގެ ރައީސާ ފާތިމަތުއް ޒަހްރާ އާ އެގައުމުގެ އައު ސަރުކާރު އެކުލަވާލުމުގެ މަސައްކަތް ރަސްގެފާނު މުޙައްމަދު ހަވަނަ ހަވާލު ކުރައްވައިފިއެވެ.
ރަސްގެފާނުގެ ދީވާން (އޮފީސް) އިން ނެރުނު ބަޔާނެއް ބުނާގޮތުން މުޙައްމަދު ހަވަނަ ވަނީ "އަސާލާ ވަލްމުއާސިރާ" ޕާޓީގެ ރައީސާ ފާތިމަތުއް ޒަހްރާ ގަނޑުވަރަށް ގެންނަވައި އެކަމަނާއާ ބައްދަލުކުރައްވައި އާންމު އިންތިޚާބުގެ ނަތީޖާ އާ އެއްގޮތަށް އައު ސަރުކާރެއް އެކުލަވާލުމުގެ މަސައްކަތް ހަވާލުކުރައްވައިފައެވެ.
މަޣްރިބުގެ ދަސްތޫރުގައިވާ ގޮތުން ރަސްގެފާނު ބޮޑުވަޒީރުކަމަށް އިޚްތިޔާރުކުރައްވަން ޖެހެނީ އާންމު އިންތިޚާބުގައި ޕާލަމެންޓްގެ އެންމެ ގިނަ ގޮނޑި ކާމިޔާބުކުރާ ސިޔާސީ ޕާޓީގެ ވެރިޔާއެވެ. ނޫނީ އެ ޕާޓީން އެކަމަށް ކަނޑައަޅާ ބޭފުޅެކެވެ.
މަޣްރިބުގެ ރަސްގެފާނު މުހައްމަދު ފަސްވަނަ، ގަނޑުވަރުގައި ފާތިމަތިއްޒަހްރާ އާ ބައްދަލުކުރައްވަނީ މިއީ މަޣްރިބުގެ ބޮޑުވަޒީރުކަމަށް އަންހެން ބޭފުޅަކު އައްޔަން ކުރާ ފުރަތަމަ ފަހަރެވެ. ފާތިމަތުއް ޒަހްރާ އަކީ ގާނޫނީ ވަކީލެކެވެ. އެކަމާނާ އަދާކުރައްވާފައިވާ ވަޒީފާ ތަކުގެ ތެރޭގައި ކުރީގެ ހައުސިންގް މިނިސްޓަރުކަމާއި މަރާކިޝް ސިޓީގެ ކުރީގެ މޭޔަރުކަން ހިމެނެއެވެ. މަޣްރިބުގެ ޕާލަމެންޓްގެ ދަށުގޭގައި 395 ގޮޑި ހިމެނޭއިރު އޭގެތެރެއިން ޒަހްރާގެ "އަސާލާ ވަލްމުއާސިރާ" ޕާޓީންވަނީ 97 ގޮނޑި ކާމިޔާބުކޮށްފައެވެ. މިއީ އެއް ޕާޓީއަކުން ޕާލަމެންޓްގެ އެންމެ ގިނަ ގޮނޑި ހޯދި ޕާޓީއެވެ.
އައްޒަހްރާއަށް ސަރުކާރެއް އެކުލަވާލެވޭނީ އެހެން ބައެއް ޕާޓީތަކާ ގުޅި ކޯލިޝަން ހަދައިގެންނެވެ. އެއީ އެ ޕާޓީއަށް އެކަނި ޕާލަމެންޓްގެ އަޣްލަބިއްޔަތު ލިބިފައި ނުވާތީއެވެ. ކޯލިޝަން ސަރުކާރެއް އެކުލަވާލުމުގެ މަޝްވަރާތައް ޕާޓީތަކާއެކު ކުރިއަށްގެންދަވާނީ އެކަމަނާއެވެ.
އައްޒަހްރާގެ ޒައާމަތުގައި މަޣްރިބުގެ އައު ސަރުކާރަށް ކުރިމަތިވާނެ މައްސަލަތައް ވަރަށް ގިނައެވެ. މީގެތެރޭގައި ވަޒީފާނެތް މީހުންގެ އަދަދު މަތިވަމުން ދިޔުމާއި ތަކެތީގެ އަގި ބޮޑުވާ މައްސަލަ ހިމެނެއެވެ. އަދި މަތީ ތައުލީމު ހާސިލް ކުރުމަށާއި އާއިލާތައް ބިނާކުރުމާ އަދި ބޯހިޔާވަހިކަން ހޯދުމަށް ޒުވާނުންނަށް ކުރިމަތިވާ ގޮންޖެހުންތަކާއި އެނޫންވެސް އިގްތިޞާދީ މައްސަލަތައް ހިމެނެއެވެ. މީގެއިތުރުން މަޣްރިބުގެ އަވަށްޓެރި ދެގައުމު ކަމަށްވާ ސްޕެއިންއާއި ޕޯޗުގަލްއާ ގުޅިގެން 2030 ވަނަ އަހަރު މަޣުރިބުގައި ބާއްވާ ވޯރލްޑް ކަޕަށް ތައްޔާރުވުމުގެ މަސައްކަތްވެސް ހިމެނެއެވެ. މިއީ 20 ބިލިޔަން ޑޮލަރުގެ މަޝްރޫއެކެވެ.