ފިޖީގެ ކޯޓެއްގައި ހެކީގެ ގޮތުގައި ރައްކާކޮށްފައި ހުރި 40 ކިލޯގްރާމްގެ ކޮކެއިން ވަގަށް ނަގައި، އޭގެ ބަދަލުގައި ފުށް އަޅާފައިވާކަން އެ ގައުމުގެ ފުލުހުން ހާމަކޮށްފިއެވެ.
މި ކޮކެއިންއަކީ 30 މިލިއަން ފިޖީ ޑޮލަރު (13.3 މިލިއަން އެމެރިކާ ޑޮލަރު) ގެ އަގުހުރި މަސްތުވާތަކެއްޗެވެ. މިއީ 2019 ވަނަ އަހަރު ފިޖީ އަދި ކެނެޑާއަށް ނިސްބަތްވާ ޖޯޝުއާ ރަހްމާން ނަމަކަށް ކިޔާ މީހެއްގެ އަތުން އަތުލައިގަތް ތަކެއްޗެވެ. ރަސްމީ ލިޔެކިޔުންތަކުން ދައްކާ ގޮތުގައި، އޭނާގެ މައްޗަށް ވަނީ ގާނޫނާ ހިލާފަށް މަސްތުވާތަކެތި ގެންގުޅުމުގެ ކުށް ސާބިތުވެފައެވެ. މި މައްސަލައިގެ އިސްތިއުނާފު މަރުހަލާ ކުރިއަށްދިޔައިރު، އަތުލައިގަތް މަސްތުވާތަކެތި ހުރީ ސުވާ ހައި ކޯޓުގައި ރައްކާކޮށްފައެވެ.
ފުލުހުން ބުނި ގޮތުގައި، މި ތަކެތި މަދުކަން ފާހަގަކުރެވުނީ މި މަހުގެ 15 ވަނަ ދުވަހު ކުރިއަށްގެންދިޔަ އިންސްޕެކްޝަނެއްގައެވެ. އެގޮތުން 39 ކޮކެއިން ބާރުގެ ތެރެއިން ހަތް ބާރު މަދުކަން ފުރަތަމަ ފާހަގަކުރެވުނެވެ. އެއަށްފަހު ކުރިއަށްގެންދިޔަ ތަހުގީގުން، ބާކީ ހުރި ހުރިހާ އެއްޗަކީވެސް އަސްލު ނޫންކަން ވަނީ ހާމަވެފައެވެ. އަދި އަތުލައިގަތް އަސްލު ކޮކެއިންގެ އެއްވެސް މިންވަރެއް ބާކީ ނެތްކަން ފުލުހުން ވަނީ ހާމަކޮށްފައެވެ.
އިއްޔެ ފިޖީ ފުލުހުން ނެރުނު ބަޔާނެއްގައި ބުނެފައިވަނީ، ބާކީ ހުރި ތަކެތި ފޮރެންސިކް ޓެސްޓުކުރުމުން ކޮކެއިންއަށް ނެގެޓިވް ވެފައިވާ ކަމަށެވެ. އަދި މި މައްސަލައިގެ ތަހުގީގު އަމާޒުކޮށްފައިވަނީ ހައި ކޯޓު ރަޖިސްޓްރީގައި މި ތަކެތި ބެލެހެއްޓުމާ ސީދާ ހަވާލުވެ ތިބި މީހުންނަށް ކަމަށްވެސް އެ ބަޔާނުގައި ބުނެފައިވެއެވެ.
ފުލުހުންގެ ކޮމިޝަނަރު ރޫސިއާޓޭ ޓުޑްރާވޫ މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވި ގޮތުގައި، މި ކޮކެއިން ހައި ކޯޓުގެ ވޯލްޓަށް ލާފައިވަނީ 2021 ވަނަ އަހަރުގެ މާޗު މަހުގައެވެ. ނަމަވެސް މިއީ ކޮން އިރަކު ހިނގި ވައްކަމެއްކަން އަދި ސާފެއް ނުވެއެވެ. އޭނާ ވިދާޅުވި ގޮތުގައި، ޝަރުއީ ދާއިރާގައި މަސައްކަތްކުރާ އަދި ވޯލްޓަށް ވަނުމުގެ ހުއްދަ އޮންނަ ހަ މީހަކު ފުލުހުން ވަނީ ފާހަގަކޮށްފައެވެ. މީގެ ތެރެއިން އެކަކު މިހާރު ހުރީ ގައުމުން ބޭރުގައެވެ.
މި މައްސަލައާ ގުޅިގެން، ކޯޓުގައި ރައްކާކޮށްފައި ހުރި އެހެނިހެން ހެކިތަކާއި ފައިސާވެސް ފުލުހުން ދަނީ އަލުން ޗެކްކުރަމުންނެވެ.
މި ހާދިސާއާ ގުޅިގެން ފިޖީގެ ޝަރުއީ ނިޒާމުގެ ސަލާމަތީ ކަންކަމާމެދު ވަނީ ސީރިއަސް ސުވާލުތަކެއް އުފެދިފައެވެ. އިދިކޮޅު ސިޔާސީ ފަރާތެއް ކަމަށްވާ ޖޯން އުސަމާޓޭ ގާނޫނުހަދާ މަޖިލީހުގައި ވާހަކަދައްކަވަމުން ވިދާޅުވީ، ކޮކެއިންގެ ބަދަލުގައި ފުށް އަޅާފައި ހުރުމަކީ ވަރަށް ހިތާމަހުރި ކަމެއް ކަމަށެވެ. އަދި ކޯޓުގައި ހުރި އެހެން ހެކިތަކާމެދުވެސް މިހާރު އިތުބާރު ކުޑަވެފައިވާ ކަމަށް އޭނާ ފާހަގަކުރެއްވިއެވެ.
ޖަސްޓިސް މިނިސްޓަރު ސިރޯމީ ޓުރާގާ ވިދާޅުވި ގޮތުގައި، މިކަމާ ގުޅިގެން އޭނާ ހުރީ ވަރަށް ބޮޑަށް ހައިރާންވެވަޑައިގެންފައެވެ. އަދި ހައި ކޯޓުގެ ސަލާމަތީ ކަންކަން ވަރުގަދަކުރުމާއި އުސޫލުތައް މުރާޖައާކުރުމުގެ މަސައްކަތް ކަމާބެހޭ ފަރާތްތަކުން މިހާރު ފަށާފައިވާ ކަމަށް އޭނާ ވިދާޅުވިއެވެ. ޓުރާގާ އިތުރަށް ވިދާޅުވި ގޮތުގައި، މި ކޮކެއިން ގެއްލިފައިވަނީ ގައުމުތައް ހުރަސްކޮށް ހިންގާ ކުށްތަކާ މެދު ވާހަކަދެކެވެމުންދާ ދަނޑިވަޅެއްގައެވެ. މިއީ ފިޖީއަށް ކުރިމަތިވެފައިވާ މައްސަލައިގެ ބޮޑުކަން އަންގައިދޭ ކަމެއް ކަމަށްވެސް އޭނާ ވިދާޅުވިއެވެ.
ފިޖީއަކީ އެމެރިކާ ބައްރުން އޮސްޓްރޭލިއާ، ނިއުޒީލެންޑް އަދި އޭޝިއާގެ ގައުމުތަކަށް މަސްތުވާތަކެތި އެތެރެކުރުމަށް ބޭނުންކުރާ މައިގަނޑު މަގަކަށް ވާއިރު، އެ ގައުމުގައި މަސްތުވާތަކެތީގެ މައްސަލަ ވަނީ ވަރަށް ބޮޑަށް އިތުރުވެފައެވެ. ކާޓެލްތަކުން އެ ގައުމަށް އެތެރެކުރާ ގިނަ އަދަދެއްގެ މެތަމްފެޓަމިންގެ ސަބަބުން މަސްތުވާތަކެއްޗަށް އެޑިކްޓްވުމުގެ މައްސަލަ ބޮޑުވެ، އެޗްއައިވީ ފެތުރުން ވަނީ އާންމުވެފައެވެ. މިކަމާ ގުޅިގެން ފިޖީން ދާދި ފަހުން ވަނީ ގައުމީ ކުއްލި ނުރައްކަލުގެ ހާލަތުވެސް އިއުލާންކޮށްފައެވެ.
މިއީ މި އަހަރުގެ ތެރޭގައި ފިޖީގައި މިފަދަ ކަމެއް ހިނގި ފުރަތަމަ ފަހަރެއް ނޫނެވެ. މިދިޔަ މާޗު މަހުވެސް، އެހެން މައްސަލައަކާ ގުޅޭ 12 ކިލޯގްރާމްގެ ކޮކެއިން ގެއްލިފައިވާކަން ފުލުހުންނަށް ވަނީ ފާހަގަކުރެވިފައެވެ. ފުލުހުންގެ ކޮމިޝަނަރު ވިދާޅުވި ގޮތުގައި، މި މައްސަލަތަކާމެދު ސަރުކާރާއި ފުލުހުންވެސް ކަންބޮޑުވެއެވެ. އަދި މި މައްސަލައިގެ ތަހުގީގު ވީހާވެސް އަވަހަކަށް ނިންމުމަށް ފުލުހުން ދަނީ މަސައްކަތްކުރަމުންނެވެ.