މި ފަހަކަށް އައިސް އިނގިރޭސިވިލާތުގެ އެންމެ ކާމިޔާބު އެއް ކުލަބުގެ ގޮތުގައި ފާހަގަވެފައިވާ މެންޗެސްޓާ ސިޓީގެ މައްޗަށް އުފުލާފައިވާ މާލީ ހިޔާނާތުގެ 115 ދައުވާވެސް އެކުލަބުގެ މައްޗަށް ސާބިތުވާކަމަށް އިނގިރޭސި ޕްރެމިއާ ލީގު ކޮމިޝަނުން ނިންމުމާއެކު އެ ކުލަބުން އެކަމާމެދު ކަންބޮޑުވުން ފާޅުކޮށްފިއެވެ.
މިކަމާ ގުޅޭގޮތުން އެ ކުލަބުން ނެރެފައިވާ ނޫސްބަޔާނެއްގައި ވަނީ އެ ކުލަބާ ދެކޮޅަށް ކޮށްފައިވާ ދައުވާތަކަށް ތަކުރާރުކޮށް އިންކާރުކުރުމާއެކު، އެއްވެސް ޝައްކެއް ނެތް މިންވަރަށް އެކަން ސާބިތުވާ ވަރަށް ކޯޓަށް ހެކި ހުށަހަޅާފައިވާނެ ކަމަށް ބުނެފައެވެ.
ސިޓީގެ ބަޔާނުގައި ވަނީ ޕްރެމިއާ ލީގުގެ ރަސްމީ ތަހުގީގު އަދިވެސް ނުނިމޭކަން ފާހަގަކޮށް، ކޮމިޝަނުގެ ނިންމުމުގައި ގާނޫނާއި ގަވައިދުތަކާއި އެކި އުސޫލުތަކާ ފުށޫއަރާ އެތައް ކަމެއް ހުރުމާއެކު އެ ނިންމުން އިސްތިއުނާފުކުރުމުގެ ކަންކަން ކުރިއަށްގެންދާނެކަމަށް ބުނެފައެވެ. އަދި މިކަމުގައި އެއްވެސް ވަރަކަށް ދޫނުދޭނެކަމަށް ވެސް ސިޓީގެ ބަޔާނުގައި ބުނެފައިވެއެވެ.
އެ ކުލަބުގެ ބަޔާނުގައި އިތުރަށް ވަނީ ކުލަބާ ދެކޮޅަށް ދައުވާ އުފުލާފައިވާ މުއްދަތުގައި ލީގުގެ ބޯޑަށާއި އެގްޒެކެޓިވްއަށް ފުރިހަމައަށް އިހުތިރާމް އަދާކޮށްފައިވާނެ ކަމަށް ބުނެ، އެފަރާތްތަކުން ބޭރު ފަރާތްތަކުގެ ނުފޫޒުން އެއްކިބާވެތިބެ، އިންސާފުވެރި ނިންމުމެއް ނިންމާނެކަމަށް ގަބޫލުކުރާކަމަށް ބުނެފައެވެ.
މެންޗެސްޓާ ސިޓީގެ މައްޗަށް އުފުލާފައިވަނީ 2009 ވަނަ އަހަރާއި 2018 ވަނަ އަހަރާ ދެމެދު ކުލަބުގެ މާލީހާލަތު ރަނގަޅުކޮށް، ހަރަދުތައް ކުޑަކުރުމަށްޓަކައި އެމުއްދަތުގައި ކުލަބުން ގަނެފައިވާ ބައެއް ކުޅުންތެރިންގެ ކޮންޓްރެކްޓު އޮޅުވާލިކަމުގެ ދައުވާތަކެކެވެ. އަދި މި ކޮންޓްރެކްޓުތަކުގެ އަގު 1.19 ބިލިއަން އެމެރިކާ ޑޮލަރަށް އަރާކަމަށް ދައުވާގައި ވެއެވެ.
ކޮމިޝަނުގެ ނިންމުން އިސްތިއުނާފުކުރުމަށް މެންޗެސްޓާ ސިޓީއަށް ހުޅުވާލާފައިވަނީ އަންނަ ހުކުރު ދުވަހުގެ ނިޔަލަށެވެ.