ރާއްޖޭގައި ހައްޔަރުކޮށްފައި ހުރި މިސްރުގެ ޑޮކްޓަރަކު މިނިވަންކޮށް، އަނބުރާ އެ ގައުމަށް ފޮނުވާލައިފިއެވެ.
މިސްރުގެ ސްޓޭޓް އިންފޮމޭޝަން ސާވިސްއިން އިއްޔެ ރިޕޯޓުކޮށްފައިވާ ގޮތުގައި، ރާއްޖޭގައި ހައްޔަރުކޮށްފައި ހުރީ ޕީޓާ ސެމާން މަރްޒޫކް ނަމަކަށް ކިޔާ ޑޮކްޓަރެކެވެ. ނަމަވެސް، އޭނާ ހައްޔަރުކުރި ސަބަބެއް އަދި ހައްޔަރުކޮށްފައި ހުރި މުއްދަތެއް އެ އިދާރާއިން ހާމަކޮށްފައެއް ނުވެއެވެ.
އެ މައުލޫމާތު ދިވެހި ފުލުހުންގެ ފަރާތުން ވެސް އަދި ވަނީ ލިބޭ ގޮތް ނުވެފައެވެ.
މިސްރުގެ ހާރިޖީ ވުޒާރާއާ ހަވާލާދީ އެ އިދާރާއިން ބުނި ގޮތުގައި، ޑޮކްޓަރު މިނިވަންކުރުމުގެ މަސައްކަތް ފެށީ މިސްރުގެ ހާރިޖީ ވަޒީރު ބަދްރު އަބްދުލްއާތީގެ ސީދާ އެންގެވުމަކަށެވެ. އެގޮތުން، ސްރީލަންކާގައި ހުންނަ މިސްރުގެ އެމްބަސީ މެދުވެރިކޮށް ދިވެހި ސަރުކާރުގެ ކަމާބެހޭ ފަރާތްތަކާ ގުޅައިގެން އޭނާ މިނިވަންކުރުމުގެ މަސައްކަތް އަވަސްކުރުމަށާއި، ބޭނުންވާ ކޮންސިއުލާ އެހީތެރިކަން ފޯރުކޮށްދިނުމަށް ވަޒީރު އަންގަވާފައިވާ ކަމަށް ރިޕޯޓުތައް ބުނެއެވެ. ރާއްޖެއަށް ކަނޑައަޅާފައި ހުންނަ މިސްރުގެ ސަފީރު ހުންނަވަނީ ސްރީލަންކާގައެވެ.
މީގެ އިތުރުން، މިސްރުގެ އެސިސްޓެންޓް ފޮރިން މިނިސްޓާ ފޯ ކޮންސިއުލާ އެފެއާޒް ހައްދާދު އަބްދުއްތައްވާބު އެލް-ގޮހާރީ ވަނީ ރާއްޖޭގެ ހާރިޖީ ވުޒާރާގެ ކޮންސިއުލާ ޑިޕާޓްމަންޓުގެ ޑިރެކްޓަރާ ގުޅުއްވައި މަޝްވަރާކުރައްވާފައި ކަމަށް އެ އިދާރާއިން ބުނެއެވެ. މި މަޝްވަރާތަކުގައި، ޑޮކްޓަރާ މެދު ރަނގަޅަށް ކަންތައް ކުރުމަށާއި އަވަހަށް މިނިވަންކޮށްދިނުމަށް އޭނާ އެދިވަޑައިގެންފައިވާ ކަމަށް މިސްރުގެ މީޑިއާތަކުން ރިޕޯޓުކުރެއެވެ.
މިސްރުގެ ހާރިޖީ ވުޒާރާއިން ފާހަގަކުރި ގޮތުގައި، ދިވެހި ސަރުކާރުން އޭނާ މިނިވަންކުރަން ނިންމީ ދެ ގައުމުގެ ދެމެދުގައި އޮންނަ އެކުވެރި ގުޅުމުގެ މައްޗަށް ބިނާކޮށެވެ. ޑޮކްޓަރު ހައްޔަރުކޮށްފައި ހުރި ދުވަސްވަރު، އޭނާގެ އާއިލާއަށް އެންމެ ފަހުގެ މައުލޫމާތު ފޯރުކޮށްދިނުމަށްޓަކައި މިސްރުގެ ހާރިޖީ ވުޒާރާގެ ކޮންސިއުލާ ސެކްޝަނުން އާއިލާއާ މެދުކެނޑުމެއްނެތި ގުޅުން ބާއްވަމުން ދިޔަ ކަމަށް ވެސް އެ ވުޒާރާއިން ބުނެފައިވެއެވެ.
ޑޮކްޓަރު އެނބުރި ގައުމަށް ދިއުމުން، މިސްރުގެ ހާރިޖީ ވުޒާރާގައި އޭނާއާއި އޭނާގެ އާއިލާއާ ބައްދަލުކުރެއްވީ އެމްބެސެޑާ އެލް ގޮހާރީއެވެ. މި ބައްދަލުވުމުގައި، ޑޮކްޓަރު މިނިވަންކުރުމަށް މިސްރު ސަރުކާރުންނާއި ކަމާބެހޭ އެހެނިހެން އިދާރާތަކުން ކުރި މަސައްކަތްތަކަށް އޭނާގެ އާއިލާއިން ޝުކުރު އަދާކޮށްފައިވާ ކަމަށް ރިޕޯޓުތައް ބުނެއެވެ.
މި މައްސަލައާ ގުޅިގެން މިސްރުގެ ހާރިޖީ ވުޒާރާއިން ވަނީ، ގައުމުން ބޭރަށް ދަތުރުކުރާ އެ ގައުމުގެ ރައްޔިތުން އެހެން ގައުމުތަކުގެ ގާނޫނުތަކާއި ގަވާއިދުތަކަށް ފުރިހަމައަށް ބޯލެނބުމަށް އިލްތިމާސްކޮށްފައެވެ. އަދި ގާނޫނީ މައްސަލައެއް ދިމާވެއްޖެ ނަމަ ލަސްނުކޮށް އެންމެ ކައިރީގައި ހުންނަ މިސްރުގެ އެމްބަސީއަކަށް ނުވަތަ ކޮންސިއުލޭޓަކަށް އެންގުމަށް ވެސް އެ ވުޒާރާއިން ވަނީ އެދިފައެވެ.