އޭއައި ރައްކާތެރިކުރުމުގެ އެއްބަސްވުމެއްގައި ޓްރަމްޕާއި ޓެކް ކުންފުނިތަކުގެ ވެރިން ސޮއިކުރައްވައިފި

އާޓިފިޝަލް އިންޓެލިޖެންސް (އޭއައި) ގެ ރައްކާތެރިކަމާމެދު ކަންބޮޑުވުންތައް އިތުރުވަމުންދާ ދަނޑިވަޅެއްގައި، އޭއައި އުފައްދާ ކުންފުނިތަކުން އަމިއްލައަށް އަމަލުކުރާނެ ރައްކާތެރިކަމުގެ މިންގަނޑުތަކެއް އެކުލަވާލުމުގެ އިޚްތިޔާރީ އެއްބަސްވުމެއްގައި އެމެރިކާގެ ރައީސް ޑޮނަލްޑް ޓްރަމްޕާއި ޓެކްނޮލޮޖީ ދާއިރާގެ އިސް ވެރިން ސޮއިކުރައްވައިފިއެވެ.

ވައިޓް ހައުސްގައި ބޭއްވެވި ބައްދަލުވުމަކަށްފަހު ޓްރަމްޕް ވަނީ، އޭއައި މޮޑެލްތައް ހިންގުމަށް ބޭނުންވާ ޑޭޓާ ސެންޓަރުތައް ހަލުވިކަމާއެކު ފުޅާކުރުމަށް އެމަނިކުފާނު ކުރައްވާ ތާއީދު އާކުރައްވާފައެވެ.

ޓްރަމްޕްގެ ސޯޝަލް މީޑިއާ ޕްލެޓްފޯމްގައި އާންމުކުރެއްވި އެއްބަސްވުމުގެ ކޮޕީއެއްގައިވާ ގޮތުން، އޭއައި ސިސްޓމްތައް މަސައްކަތްކުރަނީ އުފެއްދި ފަރާތްތަކުން ގަސްދުކުރި ގޮތަށްތޯ ބެލުމަށްޓަކައި މިނިވަން އޮޑިޓަރުންނާއެކު މަސައްކަތްކުރުމަށް ކުންފުނިތަކުން ވަނީ އެއްބަސްވެފައެވެ. އަދި އޭއައި ވަސީލަތްތައް ބޭނުންކޮށްގެން ނޭދެވޭ ގޮތްގޮތަށް އެހެން ސިސްޓމްތަކަށް ވަދެގަތުން ނުވަތަ ހެކްނުކުރެވޭނެކަން ކަށަވަރުކުރުމަށް މަސައްކަތްކުރާނެކަމަށްވެސް ކުންފުނިތަކުން ބުނެފައިވެއެވެ.

އޭއައި ރައްކާތެރި ކުރުމަށް އަވަސް ފިޔަވަޅުތަކެއް އެޅުމަށް ހުރިހާ ވެރިންވެސް އެއްބަސްވޭ --- ފޮޓޯ: ރޮއިޓާސް

މި އެއްބަސްވުން އެކުލަވާލާފައިވަނީ އޯޕަންއޭއައި އާއި އެންތްރޯޕިކްގެ އޭއައި އޭޖެންޓުން ކޮންޓްރޯލުން ނައްޓައިގެން ގޮސް އެހެން ކުންފުނިތަކުގެ ސިސްޓމްތަކަށް ހެކްކޮށްފައިވާކަމަށް އެ ކުންފުނިތަކުން ރިޕޯޓްކުރުމާ ގުޅިގެން، ކުރިއަރާފައިވާ އޭއައިގެ ނުރައްކާތަކާމެދު ސަރުކާރަށް ފާޑުކިޔުން ބޮޑުވެފައިވާ ދަނޑިވަޅެއްގައެވެ.

މީގެއިތުރުން، އޭއައި މޮޑެލްތައް ތަމްރީނުކުރުމަށް ބޭނުންވާ ކަރަންޓުގެ މިންވަރު އިތުރުވުމާއި، ޔޫޓިލިޓީ ހަރަދުތައް ބޮޑުވުމުގެ ސަބަބުން، އެމެރިކާގެ އެކި ސަރަހައްދުތަކުގައި ޑޭޓާ ސެންޓަރުތައް ގާއިމުކުރުމާ ދެކޮޅަށް އާންމުން ދަނީ އަޑުއުފުލަމުންނެވެ. މިއީ ކުރިއަށް އޮތް ނޮވެމްބަރު ތިނެއްގައި ބާއްވާ އެމެރިކާގެ މިޑްޓާމް އިންތިޚާބަށް ކުރިމަތިލާއިރު ރިޕަބްލިކަން ޕާޓީއަށް ކުރިމަތިވެފައިވާ ސިޔާސީ ގޮންޖެހުމެކެވެ.

މި އެއްބަސްވުމާ ގުޅޭގޮތުން ވާހަކަދައްކަވަމުން ޓްރަމްޕް ވިދާޅުވީ، މިއީ އެއްގޮތަކުން ބަލާއިރު "ގާނޫނުއަސާސީއެއް" ފަދަ އެއްޗެއް ކަމަށެވެ. އަދި ދުނިޔޭގެ އެންމެ ނުފޫޒުގަދަ ފަރާތްތަކުން މީގައި ސޮއިކޮށްފައިވާއިރު، ރައީސްގެ ހައިސިއްޔަތުން އެމަނިކުފާނުވެސް ސޮއިކުރެއްވި ކަމަށާއި، މިއީ ހަގީގަތުގައިވެސް ރައްކާތެރިކަން ފޯރުކޮށްދޭނެ ވަސީލަތެއް ކަމަށް ވިދާޅުވިއެވެ.

ޓެކްނޮލޮޖީ ދާއިރާގެ ވެރިންނާއެކު ސިއްރު މަންޒިލެއްގައި ބޭއްވި މެންދުރުގެ ކެއުމަކުން ފެށުނު މި ބައްދަލުވުން އާންމުންނަށް ތިލަވީ، ހައުސްގެ ސްޕީކަރު މައިކް ޖޯންސަން އާއި ކުންފުނިތަކުގެ ސީއީއޯއިންނާއެކު ވައިޓް ހައުސްގެ ޑްރައިވްވޭއަށް ޓްރަމްޕް ނުކުމެވަޑައިގަތުމުންނެވެ. މިއީ ރައީސް ނޫސްވެރިންނާ ބައްދަލުކުރެއްވުމަށް އާންމުކޮށް ބޭނުންކުރައްވާ ސަރަހައްދެއް ނޫނެވެ. އޭއައިގެ ރައްކާތެރިކަމާއި އޭއައިގެ ހަލުވި ކުރިއެރުމާމެދު ފިޔަވަޅުތައް އަޅަން ފެށުމަށް ސަރުކާރަށް ބާރުބޮޑުވެފައިވާ ދަނޑިވަޅެއްގައި، ޓްރަމްޕް ވަނީ ސީއީއޯއިން ފަހަތްޕުޅުގައި ތިއްބަވައިގެން 30 މިނެޓު ވަންދެން ނޫސްވެރިންގެ ސުވާލުތަކަށް ޖަވާބުދެއްވާފައެވެ.

މިއެއްބަސްވުމާ ބެހޭގޮތުން ޓްރަމްޕް ވިދާޅުވީ މިއީ ގާނޫނު އަސާސީއެއް ފަދަ އެއްޗެއް ކަމަށް --- ފޮޓޯ: ރޮއިޓާސް

މި ބައްދަލުވުމުގައި އޯޕަންއޭއައިގެ ގްރެގް ބްރޮކްމަން، އެންތްރޯޕިކްގެ ޑާރިއޯ އަމޮޑެއީ، މެޓާގެ މާކް ޒަކަބާގް، ގޫގުލްގެ ސުންދާރު ޕިޗާއި، އެންވިޑިއާގެ ޖެންސަން ހުއާންގް، އޭއެމްޑީގެ ލިސާ ސޫ، ކޮމާސް ސެކްރެޓަރީ ހަވާޑް ލަޓްނިކް އަދި ސްޕޭސްއެކްސްއޭއައިގެ އިލޮން މާސްކް ފަދަ އިސް ބޭފުޅުން ބައިވެރިވެވަޑައިގެންނެވިއެވެ. ޓްރަމްޕްގެ އެދިވަޑައިގަތުމަށް ކުރިއަށް ނުކުމެވަޑައިގެން މާކް ޒަކަބާގް ވިދާޅުވީ، އޭއައި ސިސްޓމްތަކަށް ވަރުގަދަ އެތެރޭގެ ކޮންޓްރޯލްތަކެއް އެކުލަވާލުމަށް ކުންފުނިތަކުން އެއްބަސްވެފައިވާ ކަމަށެވެ.

ޓްރަމްޕް އިތުރަށް ވިދާޅުވީ، އޭއައި ވަސީލަތްތަކުގެ ރައްކާތެރިކަން ބެލެހެއްޓުމަށްޓަކައި 10 މެންބަރުންގެ ބޯޑެއް އެކުލަވާލުމާމެދު ވިސްނަވަމުންދާ ކަމަށެވެ. ނަމަވެސް އެ ބޯޑުގައި ހިމެނޭނެ ބޭފުޅުންގެ ތަފްސީލެއް ދެއްވާފައެއް ނުވެއެވެ. އަދި ވައިޓް ހައުސްގެ އޭއައި ސިޔާސަތުތަކަށް އިސްކޮށް އުޅުއްވާނެ އާ އޮފިޝަލަކު ކައިރި މުސްތަގުބަލެއްގައި އައްޔަންކުރައްވާނެ ކަމަށްވެސް ވިދާޅުވިއެވެ.

ޑޭޓާ ސެންޓަރުތަކަށް ތާއީދުކުރެއްވުމުގެ ސަބަބުން ނޮވެމްބަރު މަހުގެ އިންތިޚާބުގައި ރިޕަބްލިކަން ޕާޓީއަށް އަސަރުކޮށްފާނެތޯ ނޫސްވެރިއަކު ސުވާލުކުރުމުން ޓްރަމްޕް ވިދާޅުވީ، ޑޭޓާ ސެންޓަރުތައް ބިނާކުރުމުގައި އާންމު މުޖުތަމައުތައް "އުފާވާނެ" ގޮތަށް ޓެކް ކުންފުނިތަކުން މަސައްކަތްކުރާނެ ކަމަށެވެ. "މި ބޮޑެތި، ބާރުގަދަ، މުއްސަނދި އަދި ވިސްނުންތޫނު ކުންފުނިތަކުން އާންމު މުޖުތަމައުތަކަށް ބޮޑެތި އެހީތަކެއް ފޯރުކޮށްދޭނެ،" ސީއީއޯއިން ވަށައިގެން ތިއްބަވައިގެން ނޫސްވެރިންނަށް މައުލޫމާތު ދެއްވަމުން ޓްރަމްޕް ވިދާޅުވިއެވެ.

ނަމަވެސް އޭއައި ރައްކާތެރިކުރުމަށް ކުންފުނިތަކުން އެކަށީގެންވާ މަސައްކަތްތަކެއް ނުކުރާކަމަށް ބުނެ ގިނަ ފާޑުކިޔުންތަކެއް ވަނީ އަމާޒުވެފައެވެ. ސެޕްޓެމްބަރު 17 އިން 20 އަށް ރޮއިޓާސް/އިޕްސޯސްއިން ކުރިއަށްގެންދިޔަ ހިޔާލުހޯދުމުގެ ސަވޭއަކުން ދައްކާގޮތުގައި، ސަރުވޭގައި ބައިވެރިވި މީހުންގެ %73 މީހުން ގަބޫލުކުރަނީ އޭއައިގެ ސަބަބުން މުޖުތަމައަށް ލިބިދާނެ ބޮޑު ގެއްލުމަކުން ރައްކާތެރިވުމަށް ކުންފުނިތަކުން އެކަށީގެންވާ މަސައްކަތްތަކެއް ނުކުރާ ކަމަށެވެ. އަދި %55 މީހުން ބުނެފައިވަނީ އޭއައިގެ ކުރިއެރުންތައް މަޑުޖައްސާލުމަކީ ރަނގަޅު ކަމެއް ކަމަށެވެ.

އޭއައި ކުންފުނިތަކުގެ އިސް ވެރިންނާއި އިންވެސްޓަރުންނަކީ 2025 ވަނަ އަހަރު ޓްރަމްޕަށް ތާއީދުކުރާ 'މެގަ އިންކް' ޕޮލިޓިކަލް އެކްޝަން ކޮމިޓީއަށް އެންމެ ބޮޑު އެހީއެއް ދިން ފަރާތްތަކެވެ. ފެޑެރަލް އިލެކްޝަން ކޮމިޝަންގެ ރެކޯޑުތަކުން ދައްކާގޮތުގައި، އޯޕަންއޭއައިގެ ގްރެގް ބްރޮކްމަން އާއި އޭނާގެ އަނބިކަނބަލުން އަންނާ ބްރޮކްމަން ވަނީ 2025 ވަނަ އަހަރު އެ ކޮމިޓީއަށް ޖުމްލަ 25 މިލިއަން ޑޮލަރު ހަދިޔާކުރައްވާފައެވެ.

ސީއީއޯއިންނާއެކު ބޭއްވެވި ބައްދަލުވުމުގެ އިތުރުން، އާންމުންނަށް ސަރުކާރުގެ ޚިދުމަތްތައް ހޯދުން ފަސޭހަކޮށްދިނުމަށްޓަކައި ތައާރަފްކުރި އާ އޭއައި ވަސީލަތެއް އިފްތިތާހުކުރުމުގެ ހަރަކާތެއްވެސް އެދުވަހު ވަނީ ބާއްވާފައެވެ.

ސިލިކަން ވެލީގެ އިސް ބޭފުޅުން ބައިވެރިވެވަޑައިގެންނެވި މި ހަރަކާތުގައި މެޓާގެ ދީނާ ޕަވަލް މެކޯމިކް އާއި ސެކޯޔާ ކެޕިޓަލްގެ ޕާޓްނަރު ޝޯން މެގުއާ ބައިވެރިވެވަޑައިގެންނެވިއެވެ. މިއީ އެއާބީއެންބީގެ ކޯ-ފައުންޑަރު ޖޯ ގެބިއާގެ އިސްނެގުމުގެ ދަށުން ފަރުމާކުރި ވަސީލަތެކެވެ.

މި ވަސީލަތް އިފްތިތާހުކުރުމުގެ ހަފްލާގެ ސްޕޮންސަރުންގެ ގޮތުގައި ގޫގުލް، ސްޕޭސްއެކްސް، މެޓާ އަދި 8ވީސީ ހިމެނެއެވެ. އެ ހަފްލާގައި ވާހަކަދައްކަވަމުން ޓްރަމްޕް ވަނީ، މި އާ އޭއައި ވަސީލަތަކީ ނުބައި ނިޔަތުގައި އުޅޭ ފަރާތްތަކަށް "ހެކް ނުކުރެވޭނެ" ވަސީލަތެއް ކަމަށް ވިދާޅުވެފައެވެ. ނަމަވެސް އެކަމުގެ އެއްވެސް ހެކިދައްކަވާފައެއް ނުވެއެވެ. މީގެއިތުރުން، އޭއައި ޓެކްނޮލޮޖީއަށް ނިސްބަތްކޮށް ވާހަކަދައްކާއިރު "އާޓިފިޝަލް އިންޓެލިޖެންސް" ގެ ބަދަލުގައި "ސުޕަ އިންޓެލިޖެންސް" މި ލަފްޒު ބޭނުންކުރުމަށް ސަރުކާރުގެ އިދާރާތަކަށް ޓްރަމްޕް ވަނީ އަންގަވާފައެވެ.