ލޯބީގެ ގުޅުން ނިމުމަކަށް އައުމުން، އެ ގުޅުމުގެ ތެރޭގައި ކުރީގެ ލޯބިވެރިޔާއަށް ދިން އަގުބޮޑު ހަދިޔާތަކަށާއި ކުރި ޚަރަދުތަކަށް ދިޔަ 3.53 ކުރޯޑު އިންޑިއަން ރުޕީސް (ގާތްގަނޑަކަށް 4.2 އިންސައްތަ މިލިއަން ދިވެހި ރުފިޔާ) އަނބުރާ ހޯދުމަށް އިންޑިއާގެ ކުންފުންޏެއްގެ ސީއީއޯއަކު ހުށަހެޅި ދައުވާ ސިންގަޕޫރުގެ ހައިކޯޓުން ބޭރުކޮށްލައިފިއެވެ.
އިންޑިއާގެ ނޭޝަނަލް ސްޓޮކް އެކްސްޗޭންޖުގައި ލިސްޓުކޮށްފައިވާ "ޓީސީއައި އެކްސްޕްރެސް" ކުންފުނީގެ މެނޭޖިންގް ޑިރެކްޓަރު އަދި ސީއީއޯ ޗަންދަރު އަގަރްވާލް، އޭނާގެ ކުރީގެ ލޯބިވެރިޔާ ފެލީޝިއާ ލީގެ މައްޗަށް ދައުވާކުރީ އެ ދުވަސްވަރު އޭނާއަށް ދިން ފައިސާއަކީ އަނބުރާ ދައްކާ ގޮތަށް ދީފައިވާ ލޯނުތަކެއް ކަމަށް ބުނެއެވެ. ނަމަވެސް މައްސަލަ ބެއްލެވި ސީނިއާ ޖަޖު ލީ ސިއު ކިން ނިންމެވީ އެ ފައިސާއަކީ ލޯބީގެ ގުޅުމުގެ ތެރޭގައި އަމިއްލަ އިޚުތިޔާރުގައި ދީފައިވާ ހަދިޔާތަކެއް ކަމަށެވެ.
ދައުވާގައި އަގަރްވާލް އަނބުރާ ހޯދަން އެދުނު ޚަރަދުތަކުގެ ތެރޭގައި، ކްރެޑިޓް ކާޑު ބިލްތަކަށް ދެއްކި 1.55 ކުރޯޑު ރުޕީސް، ބޭރު ދަތުރުތަކަށް ޚަރަދުވި 97.3 ލައްކަ ރުޕީސް، އަދި ފެލީޝިއާގެ އެޕާޓްމަންޓަށް ފެންގްޝުއީ މާސްޓައެއް ހަމަޖެއްސުމަށް ދެއްކި 12.8 ލައްކަ ރުޕީސް ހިމެނެއެވެ. މީގެ އިތުރުން ސްޓެންފޯޑް-އެންޔޫއެސް އެގްޒެކެޓިވް ޕްރޮގްރާމަކަށް ޚަރަދުވި 22.6 ލައްކަ ރުޕީސް އާއި، ފެލީޝިއާގެ ކުރީގެ ވަޒީފާދޭ ފަރާތަށް ދައްކަންޖެހުނު ދަރަންޏެއް ދެއްކުމަށް ދިން ކަމަށް ބުނާ 37.7 ލައްކަ ރުޕީސްވެސް ހިމެނެއެވެ.
"ޓީސީއައި އެކްސްޕްރެސް" ކުންފުނީގެ މެނޭޖިންގް ޑިރެކްޓަރު އަދި ސީއީއޯ ޗަންދަރު އަގަރްވާލް--ފޮޓޯ/އިންސްޓަގްރާމްޝަރީއަތުގައި ޤާޒީ ފާހަގަކުރެއްވި ގޮތުގައި، އެ ފައިސާއަކީ އަނބުރާ ދައްކާ ގޮތަށް ދީފައިވާ ލޯނެއްކަން ނުވަތަ އަނބުރާ ދެއްކުމަށް ފެލީޝިއާ އެއްބަސްވެފައިވާކަން ސާބިތުކޮށްދޭނެ އެއްވެސް ދަލީލެއް އަގަރްވާލްގެ ފަރާތުން ހުށަހެޅިފައެއް ނުވެއެވެ. އަދި އަގަރްވާލްއަކީ ތަނަވަސްކަން ހުރި މީހެއްކަމާއި، ގުޅުން ނިމުމަކަށް އައުމުން ހަސަދަވެރިކަމާއެކު ބަދަލުހިފުމުގެ ނިޔަތުގައި ދައުވާކުރިކަން ހެކިތަކުން އެނގޭ ކަމަށްވެސް ޤާޒީ ވިދާޅުވިއެވެ.
ކުރީގެ އެއާ ހޮސްޓެސްއެއް ކަމަށްވާ ފެލީޝިއާ އާއި އަގަރްވާލް ބައްދަލުވީ 2019 ވަނަ އަހަރުގެ ދަތުރެއްގެ ތެރެއިންނެވެ. އޭގެ ފަހުން 2022 ވަނަ އަހަރުގެ ސެޕްޓެމްބަރު މަހު ދެމީހުންގެ ދެމެދުގައި ލޯބީގެ ގުޅުމެއް އުފެދުނުއިރު، އެ ގުޅުން ނިމުނީ 2023 ވަނަ އަހަރުގެ ޑިސެމްބަރު މަހުއެވެ. މައްސަލައިގެ ރެކޯޑުތަކުން އެނގޭ ގޮތުގައި، ލޯބީގެ ގުޅުން ފެށުމުގެ ކުރިންވެސް އަގަރްވާލް ވަނީ ހާމެސް، ލުއީ ވިޓޯން އަދި ޕްރާޑާ ފަދަ މަޝްހޫރު ބްރޭންޑުތަކުގެ އަގުބޮޑު ހަދިޔާތައް ފެލީޝިއާއަށް ދީފައެވެ.
މީގެ އިތުރުން، ފެލީޝިއާ އެހީތެރިކަމަށް އެދުމުން އޭނާ އަކީ ފައިސާ ދޫކުރާ ލޯން އޮފީހެއް ނޫން ކަމަށާއި، ފައިސާ އަނބުރާ ދައްކަން ނުޖެހޭނެ ކަމަށް ބުނެ އަގަރްވާލް ފޮނުވާފައިވާ މެސެޖުތަކާއި، އޭނާގެ ބްލެކް ކާޑު (އެމެކްސް ސެންޗުރިއަން) ބޭނުންކުރުމުގެ ހުއްދަ ދީފައިވާ މެސެޖުތައްވެސް ކޯޓަށް ވަނީ ހުށަހެޅިފައެވެ.