ވާޖިބު އަދާކުރަމުން ދަނިކޮށް މަރުވާ ފުލުހުންގެ އާއިލާއަށް ވެސް ފުލުހުންގެ ޚިދުމަތުން ބޭސްފަރުވާކޮށްދޭން ޖެހޭ ގޮތަށް ފުލުހުންގެ ވަޒީފާގެ ގަވައިދު އިސްލާހުކޮށް، މިރޭ ގެޒެޓުކޮށްފިއެވެ.
ފުލުހުންގެ ވަޒީފާގެ ގަވައިދަށް ގެނައި އިސްލާހުގެ ތެރެއިން އެއް އިސްލާހަކީ ފުލުހުންގެ އާއިލާތަކަށް ބޭސްފަރުވާކޮށްދޭ އުސޫލުން ވާޖިބު އަދާކުރަމުން ދަނިކޮށް މަރުވާ ފުލުހުންގެ އާއިލާއަށް ވެސް، ފުލުހުންގެ ޚިދުމަތުން ބޭސްފަރުވާ ކޮށްދޭން ޖެހޭނެ ކަމެވެ.
ހަމަ އެހެންމެ، ވާޖިބު އަދާކުރަމުންދަނިކޮށް ނިޔާވާ ފުލުހުންގެ ޖަނާޒާ ވަކި ރަސްމިއްޔާތެއްގެ ގޮތުގައި ބޭއްވުމަށް ނިންމިދާނެ ކަމަށް ވެސް އެ ގަވައިދަށް ގެނައި އިސްލާހުގައިވެއެވެ. އެކަމަކު އެގޮތަށް ނިންމަންވާނީ ފުލުހުންގެ އޮފިސަރު ނިޔާވި ހާލަތާއި ދިމާވި ހާދިސާގައި ކަން ހިނގި ގޮތާއި މުވައްޒަފު އަދާކުރި ދައުރަށް ބަލައި އެގްޒެކެޓިވް މެނޭޖްމަންޓު ބޯޑަށް ހުށަހަޅައި އެ ބޯޑުން ނިންމާ ގޮތުގެ މަތިން ކަމަށް އެ އިސްލާހުގައިވެއެވެ.
މި އަހަރުގެ ޖަނަވަރީ މަހު ނެރެފައިވާ އޮޑިޓް ރިޕޯޓަކުން ދައްކާ ގޮތުހައި، 2019 އިން 2024ގެ ނިޔަލަށް ފުލުހުންނާއި އެފަރާތްތަކުގެ އާއިލާގެ ބޭސްފަރުވާއަށް 618،949،192 ރުފިޔާ ޚަރަދުކޮށްފައިވެއެވެ. އަދި ސިފައިންނާއި އެފަރާތްތަކުގެ އާއިލާގެ ބޭސްފަރުވާއަށް 601،061،300 ރުފިޔާ ޚަރަދުކޮށްފައެވެ.
އެ މުއްދަތުގައި އެވްރެޖްކޮށް އަހަރަކު ސިފައިންނަށް ކުރާ ހޭދަ 23 އިންސައްތަ އަދި ފުލުހުންނަށް ކުރާ ހޭދަ 24 އިންސައްތައިން އިތުރުވި ކަމަށް އޮޑިޓްގައިވެއެވެ.
އޮޑިޓް އޮފީހުން ވަނީ، ދައުލަތުން ބޭސްފަރުވާއަށް ކުރާ ޚަރަދު ދެމެހެއްޓެނިވި މިންވަރެއްގައި ހިފެހެއްޓުމަށް ސިފައިންނާއި ފުލުހުންނާއި އެ ފަރާތްތަކުގެ އާއިލާތަކަށް މިހާރު ދެމުން އަންނަ ބޭސްފަރުވާގެ ސްކީމް މުރާޖައާކުރަން ލަފާދީފައެވެ. އަދި ދައުލަތުން އެ ފަރާތްތަކުގެ ބޭސްފަރުވާ ކުރަންޖެހޭ ޚަރަދު ކޮންޓްރޯލް ކުރެވޭނެހެން ސިޔާސަތުތައް އެކުލަވައިލުމަށް ވަނީ އެދިފައެވެ.