ތެހެރާން (29 ސެޕްޓެމްބަރު 2026) : އެމެރިކާގެ ހަނގުރާމަމަތީ މަނަވަރުތަކަށް ހަމަލާދިނުމުގެ ގާބިލްކަން މިހާރު އީރާނަށް ލިބިފައިވާކަމަށް އީރާން ސިފައިންގެ ޗީފް އޮފް ސްޓާފް ގެ ނައިބު އެޑްމިރަލް ހަބީބުﷲ ސިޔާރީ ވިދާޅުވެއްޖެއެވެ.
އީރާނުގެ ތަސްނީމް ނޫސް އެޖެންސީ އަށް ދެއްވި ބަސްދިގަތުމެއްގައި އެޑްމިރަލް ސިޔާރީ ވިދާޅުވީ އީރާނުގެ ދިފާއަށްޓަކައި އެމެރިކާގެ މަނަވަރުތަކަށް އެއީ އެއާކްރާފްޓް ކެރިއާ އެއްނަމަވެސް ފްރިގޭޓެއް ނޫނީ ޑިސްޓްރޯޔަރެއް ނަމަވެސް އެއަށް ހަމަލާދޭން އީރާން ކުޑަކޮށްވެސް ޖެހިލުން ނުވާކަމުގައެވެ. ސިޔާރީ ވިދާޅުވިގޮތުގައި އީރާނުގައި މިގާބިލްކަން ވަރަށް ރަނގަނޅަށް އެބަހުއްޓެވެ. މި ގާބިލްކަން ބޭނުންކުރަންޖެހޭ ވަގުތުތަކުގައި ބޭނުންކުރާނެކަމަށްވެސް އޭނާ ވިދާޅުވިއެވެ.
މި ގާބިލްކަން އީރާނުގެ ކިބާގައި ހުރިކަން އެމެރިކާއަށް އެނގޭތީ އެމެރިކާ ވަނީ އީރާންއާ ދެކޮޅަށް ހަނގުރާމަކުރާ މަނަވަރުތައް އީރާނުގެ ސަރަހައްދާ ވަރަށް ދުރަށް ގެންގޮސްފައި ކަމަށް އެޑްމިރަލް ސިޔާރީ ވިދާޅުވިއެވެ. އީރާންއާ ދުރަށް މިތަކެތި ގެންދިޔަ ނަމަވެސް އިންޑިއާކަނޑުގައިވާ އެމެރިކާގެ އަސްކަރީ މަސްލަހަތުތަކަށް ހަމަލާދޭންޖެހިއްޖެ ހާލަތެއްގައި އެކަން އީރާން ކުރާނެކަމަށާއި އެމެރިކާ އުދުވާން ފެށިއިރު އީރާނަށް ލިބިފައިނުވާ އަސްކަރީ އެތަށް ގާބިލްކަމެއް މިހާރު އީރާން ހޯދާފައިވާ ކަމަށް އޭނާ ވިދާޅުވިއެވެ.
އީރާން ސިފައިންގެ ޗީފް އޮފް ސްޓާފް ގެ ނައިބު އެޑްމިރަލް ހަބީބުﷲ ސިޔާރީ މިމޭރުމުން ވާހަކަ ދައްކަވާފައި މިވަނީ އީރާނުގެ ކްރޫޒް މިސައިލެއް އެމެރިކާގެ އަސްކަރީ އުޅަނދަކަށް އަރައި އެމެރިކާ ސިފައިންގެ 8 މީހަކު ޒަޚަމްވިކަން އެމެރިކާގެ އަސްކަރިއްޔާއިން ސިއްރުކޮށްފައި ވަނިކޮށް އެމެރިކާގެ މީޑީއާ ތަކުން މިކަން ހާމަކޮށްފައިވާ ދަނޑިވަޅެއްގައެވެ.
އީރާނުގެ ދީނީ މުރުޝިދު އާޔަތުﷲ މުޖްތަބާ ޚަމަނާއި ވަނީ ހުރުމުޒު ކަނޑުއޮޅިއާއި ގަލްފުގެ ސަރަހައްދު ދެން ކުރީގެ ހާލަތަށް ނާންނާނެކަމާއި އެމެރިކާގެ އަސްކަރީ ބޭސްތައްވެސް ދެން ގަލްފުގެ ގައުމުތަކުގައި އަލުން ގާއިމް ކުރުމުގެ ފުރުސަތު ނުދޭނެކަމަށް ވިދާޅުވެފައެވެ. އެމެރިކާ ދެންޖެހޭނީ ގަލްފު ދޫކޮށްދާންކަމަށާއި ގަލްފުގެ އަރަބި ގައުމުތަކުގައި ހާލި ހަދައިގެން ދެން އެމެރިކާއަށް ނޫޅެވޭނެކަމަށް ޚަމަނާއި ވިދާޅުވިއެވެ.
އީރާނުގެ ރައްދު ހަމަލާތަކުގައި ގަލްފާއި އުރުދުންގައިވާ އެމެރިކާގެ އަސްކަރީ ބޭސްތަކާއި އެމެރިކާ ސިފައިން ތިބޭ ޑޮމެޓްރީ ފަދަ ތަންތަންވަނީ އެއްކޮށް ކަހަލަގޮތަކަށް ހަލާކުކޮށްލާފައެވެ. މިއާއެކު އެމެރިކާގެ ސެންޓްރަލް ކޮމާންޑުގެ މައި މަރުކަޒުވެސްވަނީ ބަހްރައިން އިން ފޯޅަވައްސަށް ބަދަލުކޮށްފައެވެ. އީރާންވަނީ ގަލްފުގެ ސަރަހައްދާއި އަރަބި ކަނޑުގައި ޖާސޫސުކުރަން އުޅުނު އެމެރިކާގެ ދެ ސަބްމެރިންވެސް އަތުލައިގެންފައެވެ.
ހުރުމުޒު ކަނޑުއޮޅި ގަދަބާރުން ހުޅުވަން އެމެރިކާ އަސްކަރީ އޮޕަރޭޝަންތައް ހިންގަމުން ގެންދިޔަނަމަވެސް އެކަން ކާމިޔާބު ނޫންކަން ވަނީ ހާމަވެފައެވެ. މިކަން ހާމަވަނީ ހުރުމުޒު ކަނޑުއޮޅި ހުރަސްކުރާ ޓޭންކަރުތަކާއި ބޯޓުތަކުގެ އަދަދު މަދުކަމުންނެވެ. ކުރިން އެކަނޑުއޮޅިން 130 ވަރަކަށް އުޅަނދު ދުވާލެއްގެ މައްޗަށް ހުރަސްކުރާއިރު އެމެރިކާގެ އަސްކަރީ އޮޕަރޭޝަންތަކާ އެކުވެސް ދުވާލެއްގެ މައްޗަށް 3 ނޫނީ 4 ވަރަކަށް އުޅަނދަށްވުރެ ގިނައިން ހުރުމުޒު ހުރަސްނުކުރާކަމަށް އެކަންބަލައި ޓްރެކްކުރާ ކުންފުނިތަކުން ބުނެއެވެ.