ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ދައުވާ އުފުލައިގެން ކްރިމިނަލް ކޯޓުގައި ކުރިއަށްދާ މައްސަލަތަކުގެ އަޑުއެހުމެއް ނުބާއްވާތާ އަހަރެއްހާ ދުވަސް ފަހުން، މިއަދު އެމަނިކުފާނު ޝަރީއަތްތައް ފަށައިފިއެވެ.
މިއަދު ބާއްވާ އަޑުއެހުމަކީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީ ލޯންޑާ ކުރެއްވި ކަމަށް ތުހުމަތުކުރާ މައްސަލައިގައި، ކުރީގެ މަޖިލިސް މެންބަރު ޔޫސުފް ނައީމާއެކު ކުރިއަށްދާ ޝަރީއަތުގެ ކުރިން ހުށަހަޅާ ހުށަހެޅުންތަކާ ގުޅޭގޮތުން ވާހަކަދެއްކުމަށް ތާވަލުކުރި އަޑުއެހުމެކެވެ.
ވ. އާރަށު މައްސަލައިގެ ޝަރީއަތް މީގެ ކުރިން ކްރިމިނަލް ކޯޓުން މަޑުޖައްސާލީ، އެ މައްސަލަ އަލުން ބަލާއިރު ދައުލަތުން ހުށަހެޅި އާ ހެކިތަކެއް ބަލައިނުގަތުމަށް ހައި ކޯޓުން ކުރި ހުކުމުގެ ބައި ދައުލަތުން ސުޕްރީމް ކޯޓުގައި އިސްތިއުނާފު ކުރުމުންނެވެ. ނަމަވެސް، ހައި ކޯޓުން ނިންމި ގޮތަށް އެ ހެކިތައް ބަލައިނުގަނެވޭނެ ކަމަށް ސުޕްރީމް ކޯޓުން ވަނީ މިދިޔަ ޖުލައި މަހު ހުކުމްކޮށްފައެވެ.
މި ހެކިތަކުގެ ތެރޭގައި ޔާމީންގެ ދިފާއީ ހެކިވެރިއެއް ކަމަށްވާ އަހުމަދު ނަރީޝްގެ އެމްއެންޑީއެފް ހާޒިރީއާއި، އިކޮނޮމިކް ޔޫތު ކައުންސިލްގެ ޖަލްސާތަކެއްގެ ޔައުމިއްޔާ ހިމެނެއެވެ.
މީގެ އިތުރުން ރ. ފުއްގިރި ކުއްޔަށް ދިން މައްސަލައިގައި ދައުލަތުން ޔާމީންގެ މައްޗަށް އުފުލައިފައިވާ ރިޝްވަތުގެ ކުށާއި މަނީ ލޯންޑަރިންގެ ކުށުގެ ދައުވާތަކާ ގުޅިގެން ކްރިމިނަލް ކޯޓުގައި ތާވަލުކުރި އަޑުއެހުން ވަނީ ދައުލަތުގެ ވަކީލުން ބަލިވުމުން، ކެންސަލްކޮށްފައެވެ.