ޝައްކުކުރެވޭ ފޯނު ނަންބަރުތަކާއި، ވެބްސައިޓް ލިންކުތަކުގެ އިތުރުން މެސެޖުތަކަކީ މަކަރާއި ހީލަތުން އޮޅުވާލައިގެން ފައިސާ ހޯދަން ކުރާ ކަމެއްތޯ ބަލައި ދެނެގަނެވޭނެ ހާއްސަ ހިދުމަތެއް ޓްރޫކޯލާއިން ތަޢާރަފުކޮށްފިއެވެ.
'ސްކޭމް ޗެކާ' ގެ ނަމުގައި ތަޢާރަފުކުރި މި ހިދުމަތުގެ މައިގަނޑު ބޭނުމަކީ ކެހިވެރި މެސެޖުތަކާއި ލިންކުތަކަށް އާންމުން ސަމާލުވެ، އެފަދަ ކަންކަމުގެ ތެރެއަށް ވަދެވުމުގެ ކުރިން ރައްކާތެރިކަމުގެ ފިޔަވަޅު އެޅުމަށް މަގުފަހިކޮށްދިނުމެވެ.
މި ފީޗާގެ ދަށުން ޝައްކުކުރެވޭ ލިންކެއް ނުވަތަ ފޯނު ނަންބަރެއް ޓްރޫކޯލާގެ ސިސްޓަމަށް ހުށަހެޅުމުން، އެއީ ފިޝިން ނުވަތަ ސްކޭމް އަމަލަކާ ގުޅުންހުރި އެއްޗެއްތޯ ވަގުތުން ދެނެގަނެވޭނެއެވެ. މީގެއިތުރުން ޓްރޫކޯލާ ބޭނުންކުރާ 500 މިލިއަނަށްވުރެ ގިނަ އާންމުން ރިޕޯޓުކޮށްފައިވާ މައުލޫމާތުތަކަށް ބިނާކޮށް، އެފަދަ އޮޅުވާލުންތަކުގެ ތަފްސީލު ބަލާލެވޭ 'ސްކޭމްފީޑް' ހިދުމަތްވެސް މީގެ ތެރޭގައި ހިމެނެއެވެ.
ޓްރޫކޯލާގެ ސީއީއޯ ރިޝިތު ޖުންޖުންވާލާ ވިދާޅުވީ، 'ސްކޭމް ޗެކާ' އަކީ އެ ކުންފުނީގެ ދެނެގަތުމުގެ ގާބިލުކަމާއި، އާންމު ބޭނުންކުރާ ފަރާތްތަކުން ރިޕޯޓުކުރާ މައުލޫމާތު އެއްތަނަކުން ފަސޭހައިން ލިބޭނެހެން ފަރުމާކުރެވިފައިވާ ވަސީލަތެއް ކަމަށެވެ. މީގެ ސަބަބުން ކޮންމެ މީހަކަށްވެސް ޝައްކުކުރެވޭ ލިންކެއް، ނަންބަރެއް ނުވަތަ ވާހަކައެއްގެ ތެދުދޮގު އެއްތަނަކުން ބަލައި ފާސްކޮށްލެވޭނެ ކަމަށް އޭނާ ވިދާޅުވިއެވެ.
ކުރިއަށް އޮތް ތަނުގައި މި ހިދުމަތް އިތުރަށް ފުޅާކޮށް، އޮޅުވާލައިގެން ފޮނުވާ މެސެޖުތަކުގެ ސްކްރީންޝޯޓް އަޕްލޯޑްކޮށްގެން ތަހުލީލުކުރެވޭނެ ގޮތް ހެދުމަށާއި، އިތުރު ރައްކާތެރިކަމުގެ ފީޗާތައް ހިމެނުމަށް ޓްރޫކޯލާއިން އަންނަނީ ރާވަމުންނެވެ.
މި ވަގުތު 'ސްކޭމް ޗެކާ' ގެ ހިދުމަތް އިންޑިއާގައި އެންޑްރޮއިޑް އެޕްލިކޭޝަން ބޭނުންކުރާ ފަރާތްތަކަށް ދޫކުރަން ފަށާފައިވާއިރު، މީގެ ވެބް ވާޝަން ދުނިޔޭގެ ކޮންމެ ތަނަކުންވެސް މިހާރު ބޭނުންކުރެވޭނެއެވެ. އަދި ކުރިއަށް އޮތް ތަނުގައި އައިއޯއެސް (iOS) އަށް މި ހިދުމަތް ލިބޭނެ ގޮތް ހަދައި، އެހެން ގައުމުތަކަށްވެސް ފުޅާކުރުމަށް އެ ކުންފުނީން ވަނީ ނިންމާފައެވެ.