މިހާރު ކުރިއަށްދަނީ ކަމާ ގުޅުންހުރި ފަރާތްތަކާ ބައްދަލުކުރުމުގެ މަސައްކަތް ކަމަށާއި މަގުމަތީގެ މައްސަލަތައް ހައްލުކުރުމަށްޓަކައި އަންނަ މަހުން ފެށިގެން ހަލުވި ދުވެއްޔެއްގައި މަސައްކަތްތައް ކުރިއަށް ދާނެ ކަމަށް، މާލެ ސަރަހައްދުގެ މަގުތަކުގައި ދުއްވާ އުޅަނދުފަހަރު ގިނަވެ، ދިމާވެފައިވާ ތޮއްޖެހުމުގެ މައްސަލަ ހައްލުކުރުމަށް އުފެއްދި ޚާއްސަ އޮފީހުގެ ވެރިޔާ އަދި ކަސްޓަމްސްގެ ކުރީގެ ކޮމިޝަނަރު ޔޫސުފް މާނިޢު މުޙައްމަދު މިއަދު ވިދާޅުވެއްޖެއެވެ.
"ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީސް"ގެ ނަމުގައި ރައީސް ޑރ. މުޙައްމަދު މުޢިއްޒު ޚާއްސަ އިދާރާއެއް އުފެއްދެވީ މިދިޔަ ޖުލައި މަހުގެ 12ވަނަ ދުވަހެވެ. އެ އިދާރާގެ ވެރިޔަކަށް މާނިޢު އައްޔަންކުރިކަން 'ސަން'އަށް ކަށަވަރުކޮށްދެއްވީ މި މަހުގެ 15ވަނަ ދުވަހެވެ.
'ސަން'އާ ވާހަކަ ދައްކަވަމުން މާނިޢު މިއަދު ވިދާޅުވީ މާލެ ސަރަހައްދުގެ މަގުތަކުގައި ދުއްވާ އުޅަނދުފަހަރު ގިނަވެ، ދިމާވެފައިވާ ތޮއްޖެހުމުގެ މައްސަލައާއި ޓްރެފިކްގެ މައްސަލަތައް ހައްލުކުރުމަށްޓަކައި ކުރެވެމުންދާ މަސައްކަތުގެ ތެރެއިން މިހާރު ކުރިއަށްދަނީ ކަމާގުޅުންހުރި ފަރާތްތަކާ ބައްދަލުކުރުމުގެ މަސައްކަތް ކަމަށެވެ.
އޭގެ ތެރޭގައި ފުލުހުންނާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ)އާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާއި ވުޒާރާތަކާއި މަދަރުސާތައް ހިމެނޭ ކަމަށް މާނިޢު ވިދާޅުވިއެވެ.
"އަދިވެސް ހުރިހާ ބޭފުޅުންނަކާ ބައްދަލެއްނުވޭ، އަޅުގަނޑު ބޭނުމެއްނެތް އެއްވެސް ޑިސިޝަނެއް މޭކް ކުރާކަށް ހުރިހާ ސްޓޭކްހޯލްޑަރުންގެ ސޭ އެއް ނެތި، އެ ކަންތައްތައް މިހާރު ކުރިއަށްދަނީ،" އޭނާ ވިދާޅުވިއެވެ.
މާލޭގެ މަގުތަކާއި ޕާކިން ޒޯނުތަކާ އެ އިދާރާއިން ރަސްމީކޮށް ހަވާލުވާނީ މާނިޢު ވިދާޅުވިގޮތުގައި މި ފެށޭ އޮކްޓޯބަރު މަހުން ފެށިގެންނެވެ.
ޓްރެފިކްގެ އެކި މައްސަލަތަކާ ގުޅޭގޮތުން ސުވާލުކުރުމުން މާނިޢު ވަނީ މިހާރު ވެސް ދިމާވާ ބައެއް މައްސަލަތައް ފާހަގަކުރައްވައިފައެވެ. އެގޮތުން ރަށްރަށުގައި ރަޖިސްޓްރީކޮށްފައިވާ ލައިސަންސް ނަގައިގެން އައިސް މާލެތެރޭ ދުއްވާ މައްސަލައާއި ނުބައި ދިމާލަކުން އުޅަނދުފަހަރު އޯވަޓޭކްކުރަން މަސައްކަތްކުރާ މައްސަލައާއި އެކްސިޑެންޓުތައްވާ ބައެއް އުޅަނދުފަހަރުގެ ހާލަތު ގޯސްކަން މާނިޢު ފާހަގަކުރެއްވިއެވެ.
"ގިނަ ފަހަރަށް އެކްސިޑެންޓުވެފައި ހުރި އެއްޗެހި ރަނގަޅަށް ބަލައިލާއިރު ޓަޔަރާއި އެއްޗެހި މި ހުންނަނީ ވަރަށް ބޮޑަށް ވޭސްޓްވެފައި، އެހެންވީމާ މި ވާ ގޮތަކީ ބުރަކި ޖައްސާލީމައި ކަހައިލައިގެން މި ދަނީ،" މާނިޢު ވިދާޅުވިއެވެ.
މާލޭގެ މަގުތަކާއި ޓްރެފިކާ ގުޅޭ ބައިވަރު މައްސަލަ އަދިވެސް އެބަހުރި ކަމަށާއި އެކަންކަން ދެނެގަނެވޭނީ މަޑުމަޑުން ކަމަށް މާނިޢު ވިދާޅުވިއެވެ. އޭނާ ވިދާޅުވިގޮތުގައި ކަންކަމާ މެދު ގޮތް ނިންމޭނީ ކަމާގުޅުންހުރި އިދާރާތަކާ މަޝްވަރާކޮށް މިހާރު އޮތް ހާލަތު ރަނގަޅަށް ދެނެގަނެވިގެންނެވެ.
"އިރާދަކުރެއްވިއްޔާ އަންނަ މަހުން ފަށައިގެން ބާރު ސްޕީޑެއްގައި އަޅުގަނޑުމެން ދާނަން، ދެން ޕަބްލިސައިޒްކުރާނަން އަޅުގަނޑުމެން މި ކުރާ ކަންތައްތަކާއި އަޅުގަނޑުމެންގެ ޕްލޭންތަކާއި، އެކްޝަން ޕްލޭންތައް ވެސް،" މާނިޢު ވިދާޅުވިއެވެ.
މާލެއަށް ދިމާވެފައިވާ ޓްރެފިކް މައްސަލަ ހައްލުކުރުމަށް އުފެއްދި މި އިދާރާ ހިންގާނީ ޓްރާންސްޕޯޓް މިނިސްޓްރީގެ ދަށުންނެވެ.
ރައީސް އޮފީހުން ބުނީ، މިއީ މާލެ ސަރަހައްދުގެ މަގުތަކުގައި ދުއްވާ އުޅަނދުފަހަރުގެ އަދަދު އިތުރުވެ، މަގުތަކުގެ ތޮއްޖެހުމުގެ މައްސަލަ ބޮޑުވުމާ ގުޅިގެން އެ ކަމަށް އަވަސް ހައްލެއް ހޯދުމަށްޓަކައި ކަމާބެހޭ ފަރާތްތަކާ ގުޅިގެން ޕުރޮގުރާމުތައް އެކުލަވައިލައި ތަންފީޒުކުރުމަށް އުފެއްދި އިދާރާއެއް ކަމަށެވެ.
މީގެ އިތުރުން، މާލޭ ސަރަހައްދުގެ ދަތުރުފަތުރުގެ ނިޒާމު ޒަމާނީކޮށް، މައްސަލަތައް ހައްލުކުރުން ފަދަ ކަންކަމުގައި އެ އިދާރާގެ ދައުރު ބޮޑުވާނެ ކަމަށް ވެސް ރައީސް އޮފީހުން ބުންޏެވެ.
އުޅަނދުފަހަރު ތޮއްޖެހުމުގެ މައްސަލަ ހައްލުކުރަން އޮފީހެއް އުފެއްދިއިރު، ފާހަގަކުރެވޭ ގޮތުގައި މާލޭ ސަރަހައްދުގައި އުޅަނދުފަހަރު ގެންގުޅެނީ އެކަށީގެންވާ ވަރަށްވުރެ އިތުރަށެވެ.