ރަސްމާލެ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ވެފައިވާ ވިޔަފާރި އެއްބަސްވުމަކީ ގާނޫނުއަސާސީއާ ޚިލާފު އެއްބަސްވުމެއް ކަމަށް ކަނޑައަޅައި، އެ އެއްބަސްވުން ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފިއެވެ.
މި މައްސަލަ ސުޕްރީމް ކޯޓަށް ހުށަހެޅިކަން ހާމަކުރައްވާފައިވަނީ ގާނޫނީ ވަކީލް އަލީ ހުސައިން، އެކްސް މެދުވެރިކޮށް އާންމުކުރެއްވި ބަޔާނެއްގައެވެ.
މި މައްސަލައަކީ 21 ސެޕްޓެމްބަރުގައި މިނިސްޓްރީ އޮފް އިންފްރާސްޓްރަކްޗާ، ހައުސިންގ އެންޑް އާބަން ޑިވެލޮޕްމަންޓާއި އީގަލް ހިލްސް ކުންފުންޏާ ދެމެދު ވެފައިވާ އެއްބަސްވުމަކާ ގުޅިގެން ހުށަހެޅި މައްސަލައެކެވެ.
މި އެއްބަސްވުމުގެ ފުރިހަމަ ތަފުސީލު ސަރުކާރުން ހާމަކޮށްފައި ނުވި ނަމަވެސް، ދެ ފަރާތުން ދީފައިވާ މައުލޫމާތުތަކަށް ބަލާއިރު ރަސްމާލެއިން ހިއްކާ 500 ހެކްޓަރަށް ވުރެ ބޮޑު ބިން، އެއްވެސް އެކުއިޒިޝަން ކޮސްޓެއް އަދި ކުއްޔެއް ނެގުމަކާ ނުލައި 99 އަހަރުގެ މުއްދަތަށް އެ ކުންފުންޏަށް ދީފައިވާކަން އެނގެން އޮންނަ ކަމަށް ބަޔާނުގައި ފާހަގަކޮށްފައިވެއެވެ. އަދި އެ ބިމުގައި ތަރައްގީކުރާ ތަންތަން ތިންވަނަ ފަރާތްތަކަށް ކުއްޔަށް ދިނުމުގެ ފުރުސަތު (ރޯލިންގ ލީސް) ވެސް އެ ކުންފުންޏަށް ދީފައިވާ ކަމަށް ބަޔާންކޮށްފައިވެއެވެ.
ކޯޓަށް ހުށަހެޅި މައްސަލައިގައި ބަޔާންކޮށްފައިވަނީ، ދައުލަތުގެ މުދަލެއް ނުވަތަ މިލްކިއްޔާތެއް ކުއްޔަށް ދިނުމާއި ދޫކުރުން ފަދަ ކަންކަން ކުރަންވާނީ ގާނޫނުގައިވާ ގޮތުގެ މަތިން ކަމަށް ގާނޫނުއަސާސީގެ 250 ވަނަ މާއްދާގައި ބަޔާންކޮށްފައި އޮންނަ ކަމަށެވެ. ނަމަވެސް ބޭރުގެ ފަރާތަކަށް އެއްފަހަރާ 99 އަހަރަށް މިފަދައިން ދައުލަތުގެ ބިން ދޫކުރެވޭނެ ގާނޫނީ އޮނިގަނޑެއް ނެތުމުން، މި އެއްބަސްވުމަކީ ގާނޫނުއަސާސީއާ ސީދާ ޚިލާފު ކަމެއް ކަމަށް ވަނީ ފާހަގަކޮށްފައެވެ.
މީގެއިތުރުން، ބޭރުގެ ފަރާތްތަކަށް ދިވެހިރާއްޖޭގެ ބިން ކުއްޔަށް ދެވޭނެ އެންމެ ދިގު މުއްދަތަކީ 99 އަހަރު ކަމަށް ގާނޫނުއަސާސީގެ 251 ވަނަ މާއްދާގައި ކަނޑައަޅާފައި އޮތް ނަމަވެސް، މި އެއްބަސްވުމުގެ ދަށުން ތިންވަނަ ފަރާތްތަކަށް ބިން ދޫކުރުމުގެ ހައްގު ދީފައި އޮތުމަކީ، މުއްދަތެއް ނެތް ގޮތަށް ދާއިމީކޮށް ބޭރުގެ ފަރާތްތަކަށް ބިމުގެ މިލްކުވެރިކަން ލިބިގެންދާނެ ދޮރެއް ކަމަށްވެސް އެ މައްސަލައިގައި ފާހަގަކޮށްފައިވެއެވެ. އެހެންކަމުން މި އެއްބަސްވުމަކީ ފެށުނީއްސުރެ ބާތިލު އެއްބަސްވުމެއް ކަމަށް ކަނޑައަޅައިދިނުމަށް ވަނީ އެދިފައެވެ.
މި މައްސަލައިގައި ސުޕްރީމް ކޯޓުން ވަކި ގޮތެއް ނިންމަންދެން، އެއްބަސްވުމަށް އަމަލުކުރުން ވަގުތީ ގޮތުން ފަސްކުރުމުގެ އަމުރަކަށް (އިންޓަރިމް އޯޑަރަކަށް) ވެސް ވަނީ އެދިފައެވެ. މި ވަގުތީ އަމުރަށް އެދިފައިވަނީ ތިންވަނަ ފަރާތްތަކުގެ ހައްގުތަކެއް އުފެދި، އޭގެ ސަބަބުން ދައުލަތަށް އިއާދަނުކުރެވޭ ފަދަ ބޮޑެތި މާލީ އަދި ގާނޫނީ ބުރަތަކެއް އުފުލަން ޖެހިދާނެތީ އެކަން ހުއްޓުވުމުގެ މަގުސަދުގައެވެ.