އިނގިރޭސިވިލާތުގައި ޑީސަލް ލީޓަރެއްގެ އަގު، އެ ގައުމުގެ ތާރީޚުގައި ވެސް ނާރާ މިންވަރަކަށް މައްޗަށް އަރައިފިއެވެ.
އިނގިރޭސިވިލާތުގައި އުޅަނދުތަކާ ގުޅުންހުރި ދިރާސާތައް ކުރާ ޖަމިއްޔާއެއް ކަމަށްވާ އާރްއޭސީން އާންމުކުރި ތަފާސްހިސާބުތައް ދައްކާ ގޮތުގައި، ޑީސަލް ލީޓަރެއްގެ އަގު ވަނީ 199.18 ޕެންސް ނުވަތަ 1.99 ޕައުންޑަށް އަރައިފައެވެ. އަދި ޕެޓްރޯލްގެ އަގު ވެސް އުފުލެމުން އަންނައިރު، ޕެޓްރޯލް ލީޓަރެއްގެ އަގު ވަނީ 174.13 ޕެންސް ނުވަތަ 1.74 ޕައުންޑަށް އުފުލިފައެވެ.
އާރްއޭސީން ފާހަގަކުރާ ގޮތުގައި، ޑީސަލްގެ އަގު އިނގިރޭސިވިލާތުގައި މިހާރު ވަނީ މީގެ ކުރިން ދުވަހަކު ވެސް ނުދާހާ މައްޗަށް ގޮސްފައެވެ. އެއީ، ދުނިޔޭގެ އެހެން ހިސާބުތަކުގައި ހިނގާ ކަންކަމުގެ ސަބަބުން އެ ގައުމަށް ކިހާ ބޮޑަކަށް އަސަރެއް ކުރާކަން ހަނދާންކޮށްދޭ ކަމެއް ކަމަށް ވެސް އެ ޖަމިއްޔާއިން ބުނެފައިވެއެވެ.
އެމެރިކާއާއި އީރާނާ ދެމެދު ފެބުރުވަރީ މަހުގެ ފަހުކޮޅު ފެށުނު ހަނގުރާމައަށް ފަހު، އިނގިރޭސިވިލާތުގައި ޑީސަލް ލީޓަރެއްގެ އަގު ވަނީ 59 ޕެންސް ބޮޑުވެފައެވެ. މިއީ ގާތްގަނޑަކަށް 40 އިންސައްތައިގެ ކުރިއެރުމެކެވެ. މީގެ ކުރިން ޑީސަލްގެ އަގު އެންމެ ބޮޑުވެފައިވަނީ 2022 ވަނަ އަހަރުގެ ޖޫން މަހުގައެވެ. އެ ފަހަރު ޑީސަލް ލީޓަރެއްގެ އަގު ހުރީ 199.09 ޕެންސްގައެވެ.
އާރްއޭސީން ބުނި ގޮތުގައި، މިހާރު އާދައިގެ އާއިލާއެއްގެ ކާރަކަށް ފުލްކޮށް ޑީސަލް އެޅުމަށް 110 ޕައުންޑް ޚަރަދުވާއިރު، މިއީ ހަނގުރާމަ ފެށުމުގެ ކުރިން ހޭދަވި ވަރަށް ވުރެ 31 ޕައުންޑް އިތުރު އަދަދެކެވެ. ހަމައެއާއެކު، ޕެޓްރޯލްގެ އަގު ވެސް ވަނީ ހަނގުރާމަ ފެށުނު އިރާ އަޅައި ބަލާއިރު ލީޓަރަކުން 41 ޕެންސް އުފުލިފައެވެ. ނަމަވެސް މިއީ 2022 ވަނަ އަހަރު ޕެޓްރޯލްގެ އަގު އުފުލުނު މިންވަރަށް ވުރެ ދަށް އަދަދެކެވެ.
އާރްއޭސީން މި ތަފާސްހިސާބުތައް އެއްކޮށްފައިވަނީ އިނގިރޭސިވިލާތުގެ ސުޕަމާކެޓްތަކާއި، ހައިވޭތަކުގައި ހުންނަ ޕެޓްރޯލް ސްޓޭޝަންތަކުގެ އިތުރުން އަމިއްލަ ވިޔަފާރިތަކުން ޑީސަލް ވިއްކާ އެވްރެޖް އަގަށް ބިނާކޮށެވެ.
އާރްއޭސީގެ ހެޑް އޮފް ޕޮލިސީ ސައިމަން ވިލިއަމްސް ވިދާޅުވި ގޮތުގައި، ޑީސަލްގެ އަގު މިހާ ބޮޑަށް އުފުލުމަކީ ހަމައެކަނި ކާރު ދުއްވާ މީހުންނަށް އޮތް ތަކުލީފެއް ނޫނެވެ. އޭގެ ބަދަލުގައި، ޑީސަލް އަޅައިގެން ދުއްވާ ލޮރީތަކާއި ވޭންތަކުގެ ޒަރީއާއިން އުފުލާ މުދަލާއި ޚިދުމަތްތައް ހޯދާ ކޮންމެ މީހަކަށް ވެސް މިކަމުގެ އަސަރު ކުރާނެ ކަމަށް އޭނާ ފާހަގަކުރެއްވިއެވެ.
ވިލިއަމްސް ވިދާޅުވި ގޮތުގައި، ޕެޓްރޯލް ސްޓޭޝަންތަކުން ވިއްކާ ތެލުގެ އަގު ދަށްވާނީ، ދުނިޔޭގެ ބާޒާރުގައި ތެލުގެ އަގު ދަށްވެ، އެ ގޮތުގައި ދުވަސްތަކެއް ނޫނީ ހަފުތާތަކެއް ވަންދެން ހިފެހެއްޓިގެންނެވެ. އާރްއޭސީން ފާހަގަކުރި ގޮތުގައި، ޑީސަލްއަކީ ޕެޓްރޯލަށް ވުރެ ސާފުކުރަން އުނދަގޫ ބާވަތަކަށްވުމުގެ އިތުރުން، މުދާ އުފުލުމަށާއި ދަނޑުވެރިކަމުގެ ސިނާއަތުގައި އެންމެ ގިނައިން ބޭނުންކުރާ ބާވަތަށް ވުމުން، ޑީސަލްއަށް އޮންނަ ޑިމާންޑް ކުޑަކުރުމަކީ ވަރަށް އުނދަގޫ ކަމެކެވެ.
ދުނިޔޭގެ ބާޒާރުގައި ޕެޓްރޯލާއި ޑީސަލް އުފެއްދުމަށް ބޭނުންކުރާ ބްރެންޓް ކްރޫޑް ތެޔޮ ފީފާއެއްގެ އަގު މިހާރު ހުރީ 108 ޑޮލަރުގައެވެ. އެމެރިކާއިން އީރާނާ ދެކޮޅަށް ހަނގުރާމަ ފެށުމުގެ ކުރިން ތެޔޮ ފީފާއެއްގެ އަގު ހުރީ 73 ޑޮލަރުގައެވެ.
މެދުއިރުމަތީގެ ހަމަނުޖެހުންތަކާ ގުޅިގެން ތެޔޮ ސަޕްލައިކުރުމަށް ބޮޑެތި ހުރަސްތަކެއް އެޅިފައިވާއިރު، ޔޫކްރެއިނުން ރަޝިޔާގެ ރިފައިނަރީތަކަށް ދިން ހަމަލާތަކާ ގުޅިގެން ރަޝިޔާއިން ވަނީ ޑީސަލް އެކްސްޕޯޓުކުރުން މަނާކޮށްފައެވެ. މީގެ ސަބަބުން ދުނިޔޭގެ ބާޒާރުގައި ޑީސަލް ލިބުމުގެ ދަތިކަން ވަނީ އިތުރުވެފައެވެ.
އިނގިރޭސިވިލާތުގައި ހަތަރު ރިފައިނަރީ ހުރި ނަމަވެސް، އެ ގައުމަށް ބޭނުންވާ ވަރަށް ޑީސަލް ނުއުފެއްދޭތީ، ޑީސަލް ހޯދުމަށް އެ ގައުމުން ބޮޑަށް ބަރޯސާވަނީ އިމްޕޯޓަށެވެ. އިނގިރޭސިވިލާތުގެ ޑިޕާޓްމަންޓް ފޯ ޓްރާންސްޕޯޓުގެ ތަފާސްހިސާބުތައް ދައްކާ ގޮތުގައި، ޖޫން މަހުގެ ނިޔަލަށް އެ ގައުމުގެ މަގުތަކުގައި 15.1 މިލިއަން ޑީސަލް އުޅަނދު ދުއްވާފައިވެއެވެ. މިއީ އޭގެ އެއް އަހަރު ކުރިން ގެންގުޅުނު 15.7 މިލިއަން އުޅަނދާ އަޅައި ބަލާއިރު ދަށް އަދަދެކެވެ. އޭގެ ތެރޭގައި ހިމެނެނީ 9.8 މިލިއަން ޑީސަލް ކާރެވެ.