ތައިލެންޑަށް ބޯކޮށް ވާރޭވެހި، ފެންބޮޑުވުމާ ގުޅިގެން ލިބުނު ގެއްލުމުގެ އަގު 327 މިލިއަން ޑޮލަރަށް އަރާނެ ކަމަށް ލަފާކޮށްފިއެވެ.
ތައިލެންޑުގެ އިންޓީރިއާ މިނިސްޓްރީއާ ހަވާލާދީ ރޮއިޓާސްގައި ރިޕޯޓުކޮށްފައިވާ ގޮތުގައި، މި މަހުގެ 16އިން ފެށިގެން ކުރަމުންދާ ވިއްސާރައިގައި މުޅި ގައުމަށް ވަނީ ބޮޑެތި ގެއްލުންތަކެއް ލިބިފައެވެ. އެގޮތުން 41 ޕްރޮވިންސެއްގައި ފެންބޮޑުވެ، އަށް މީހުން މަރުވެ، 580،000 އަށް ވުރެ ގިނަ ގެއަށް ގެއްލުންވެފައިވާ ކަމަށް އެ ނޫހުގައިވެއެވެ.
މިދިޔަ ހަފުތާ ބަންދާ ދިމާކޮށް ބެންކޮކަށް ދެތިން ދުވަހުގެ ތެރޭގައި 320 މިލިމީޓަރުގެ ވާރޭ ވެހިފައިވާއިރު، މިއީ އާންމުކޮށް މުޅި ސެޕްޓެންބަރު މަހު އެ ސިޓީއަށް ވާރޭ ވެހޭ މިންވަރެވެ.
އިންޓީރިއާ މިނިސްޓްރީގެ ޕާމަނަންޓް ސެކްރެޓަރީ އުންސިޓް ސަމްޕުންތަރަޓް ނެރުއްވި ބަޔާނެއްގައި ވިދާޅުވި ގޮތުގައި، ފެންބޮޑުވެފައިވާ ސަރަހައްދުތަކުގައި ތާށިވެފައި ތިބި 80،000 އަށް ވުރެ ގިނަ މީހުންނަށް ގެއިން ނުނިކުމެވޭއިރު، އެ މީހުންނަށް އެހީތެރިވުމުގެ މަސައްކަތްތައް ދަނީ ކުރަމުންނެވެ. އޭނާ ވިދާޅުވީ އަމާޒަކީ ފެންގަނޑު ހިނދެންދެން އަދި އޭގެ ފަހުން އިތުރު ހަތް ދުވަސް ވަންދެން ކޮންމެ ދުވަހަކު ތިން އިރުގެ ކެއުން އެ މީހުންނަށް ފޯރުކޮށްދިނުން ކަމަށެވެ.
މި ކާރިސާގެ ސަބަބުން މުޅި ގައުމަށް މަދުވެގެން 11 ބިލިއަން ބާތު (327 މިލިއަން ޑޮލަރު) ގެ އިގުތިސާދީ ގެއްލުން ލިބޭނެ ކަމަށް ރަންގްސިޓް ޔުނިވާސިޓީގެ އިކޮނޮމިކްސް ޑިޕާޓްމަންޓުގެ މާހިރެއް ކަމަށްވާ އާތު ޕިސަންވަނިޗް ވަނީ ލަފާކުރައްވާފައެވެ. ރޮއިޓާސްއަށް މައުލޫމާތު ދެއްވަމުން އޭނާ ވިދާޅުވި ގޮތުގައި، ހާލަތު ރަނގަޅު ނުވެއްޖެ ނަމަ ގެއްލުމުގެ އަދަދު އިތުރުވުމަކީ އެކަށީގެންވާ ކަމެކެވެ.
ފެންބޮޑުވުމުގެ ސަބަބުން މި އަހަރުގެ ގައުމީ އުފެއްދުންތެރިކަން (ޖީޑީޕީ) ކުރިއަރާ މިންވަރު 0.3 އިންސައްތަ ދަށަށް ގޮސް، 2.1 އިންސައްތައަށް ވެއްޓޭނެ ކަމަށް ބެލެވޭ ކަމަށްވެސް އޭނާ ފާހަގަކުރެއްވިއެވެ. އަދި ތިންވަނަ ކުއާޓަރުގެ ކުރިއެރުން 0.5 އިންސައްތަ ދަށަށް ގޮސް 1.7 އިންސައްތައަށް ވެއްޓޭނެ ކަމަށް ވެސް އޭނާ ވިދާޅުވިއެވެ.
ކޮވިޑް-19 ގެ ބަލިމަޑުކަމަށްފަހު ސަރަހައްދުގެ އެހެން ގައުމުތަކާ އަޅައި ބަލާއިރު ތައިލެންޑުގެ އިގުތިސާދީ ކުރިއެރުން ލަސްވެފައިވާއިރު، މި އަހަރުގެ ދެވަނަ ކުއާޓަރުގައި އެ ގައުމުގެ އިގުތިސާދު ކުރިއަރާފައިވަނީ 1.9 އިންސައްތައިގައެވެ.
ތައިލެންޑުގެ އާބާދީ 8.4 މިލިއަނަށް އަރާއިރު، މި ސިޓީއަށް ކޮންމެ އަހަރެއްގެ ވިއްސާރަ މޫސުމުގައި ފެންބޮޑުވުމުގެ މައްސަލަތަކާ ކުރިމަތިލާން ޖެހެއެވެ. ބެންކޮކްގެ އިތުރުން، އިރުމަތީ އައްސޭރިފަށުގެ ޕްރޮވިންސެއް ކަމަށްވާ ރަޔޯންގްގައި ހުރި ދެ ރިޒަވަޔާއެއް ފުރިގެން ބަންޑުންވުމާ ގުޅިގެން، އެ ސަރަހައްދުން ވެސް މީހުން ރައްކާތެރި ހިސާބުތަކަށް ދިއުމަށް ކަމާބެހޭ ފަރާތްތަކުން ވަނީ އަންގާފައެވެ.
ތައިލެންޑަށް މިފަދަ ބޮޑު ކާރިސާއަކާ ކުރިމަތިލާން ޖެހިފައިވާއިރު، މިދިޔަ އަހަރު ދެކުނުގެ ސަރަހައްދުތަކަށް ތިން ދުވަސް ތެރޭގައި 630 މިލިމީޓަރުގެ ވާރޭ ވެހި ފެންބޮޑުވުމުގެ ސަބަބުން 145 މީހުން މަރުވެ، 33،000 އަށް ވުރެ ގިނަ ގެއަށް ގެއްލުންވެފައިވެއެވެ. އަދި ސްކޫލްތަކާއި ހޮސްޕިޓަލްތަކުގެ އިތުރުން ބޮޑެތި މަގުތަކަށްވެސް އޭރު ބޮޑެތި ގެއްލުންތަކެއް ލިބުނެވެ.
ބެންކޮކަކީ އެކި ބޭނުންތަކަށް ގިނަ އަދަދެއްގެ ދިވެހީން ދިރިއުޅެމުން އަންނަ ތަނެކެވެ. އަދި ވިޔަފާރިއާއި އެހެނިހެން ބޭނުންތަކަށް ވަރަށް ގިނަ ދިވެހީން އެ ސިޓީއަށް ދަތުރު ވެސް ކުރެއެވެ.
ރާއްޖެއިން ތައިލޭންޑަށް ކަނޑައަޅުއްވާފައި ހުންނަވާ ސަފީރު ފުއާދު ތައުފީގު އިއްޔެ ވަނީ، ފެންބޮޑުވުމުގެ ހާދިސާގައި އެއްވެސް ދިވެއްސަކަށް ގެއްލުމެއް ލިބިފައި ނުވާ ކަމަށް ވިދާޅުވެފައެވެ.