އެޕަލް ކުންފުނީގެ އައިފޯނުތަކުގެ އަގު ކުރިއަށްވުރެ ވަރަށް ބޮޑަށް މަތިވުމާ ގުޅިގެން، ރާއްޖޭގައި ވެސް އައު އައިފޯނު ގަންނަ މީހުންގެ އަދަދު މަދުވެ، އެ ފޯނުތަކަށް އޮތް ތަރުހީބު ކުޑަވެއްޖެއެވެ.
ރާއްޖެއަކީ އާއްމުކޮށް އެޕަލްގެ ފޯނުތަކަށް ޑިމާންޑް ބޮޑު ގައުމެކެވެ. އެޕަލްގެ އާ ފޯނެއް ނެރޭއިރަށް ރާއްޖޭގެ ބާޒާރަށް ގެނެސް އެތައް ބަޔަކު ގަނެހަދައެވެ.
އެޕަލްގެ އައު އައިފޯންތައް މި މަހުގެ ނުވަ ވަނަ ދުވަހު ދައްކާލުމަށް ފަހު، 12 ވަނަ ދުވަހު ވަނީ އައިފޯން 18 ޕްރޯއާއި ޕްރޯ މެކްސް ޕްރީ އޯޑަރަށް ހުޅުވާލައިފައެވެ. އެ ދެ ފޯނުގެ އަގު ވެސް ވަނީ، އެންމެ ފަހުން ނެރުނު އައިފޯން ޕްރޯ އާއި ޕްރޯ މެކްސްއަށްވުރެ 100 ޑޮލަރު އިތުރުވެފައެވެ. އެގޮތުން ޕްރޯގެ އަގު 1,199 ޑޮލަރަށް އަރާއިރު، ޕްރޯ މެކްސްގެ އަގު 1,299 ޑޮލަރަށް އަރައެވެ.
އެ ފޯނުތަށް މިހާރު ރާއްޖޭގެ ބާޒާރަށް ނެރެފައިވާއިރު، އެމެރިކާފަދަ ގައުމުތަކުގެ އަގުތަކާ އަޅާބަލާއިރު ރާއްޖޭގެ ބާޒާރުގައި އަގުތައް 20 އިންސައްތައާއި 35 އިންސައްތައާ ދެމެދުގެ މިންވަރަކަށް ބޮޑެވެ. މިގޮތަށް އަގު މަތިވާ މައިގަނޑު ސަބަބުތަކުގެ ތެރޭގައި ރާއްޖޭގައި ޑޮލަރު ލިބުން ދަތިވުމާއި އެއާ ފްރައިޓް އަދި އިމްޕޯޓް ޑިއުޓީގެ ޚަރަދުތައް އިތުރުވުމުގެ އިތުރުން ރަސްމީ އެޕަލް ސްޓޯރެއް ނެތުމުން ތިންވަނަ ފަރާތްތަކުން ވިއްކާއިރު ފައިދާ އިތުރުކުރުން ހިމެނޭކަން ވިޔަފާރިވެރިން ފާހަގަކުރެއެވެ.
ރާއްޖޭގެ ބާޒާރުގައި އައިފޯން 18 ޕްރޯގެ 256 ޖީބީގެ އަގު 35،000 އާއި 40،000 ރުފިޔާއާ ދެމެދުގައި އުޅޭއިރު، 512 ޖީބީ ލިބެން ހުރީ 37،000 އާއި 43،000 ރުފިޔާއާ ދެމެދުގެ އަގުތަކެއްގައެވެ.
އައިފޯން 18 ޕްރޯ މެކްސްގެ 256 ޖީބީގެ އަގު 38،000 އާއި 45،000 ރުފިޔާއާ ދެމެދު އުޅޭއިރު، 512 ޖީބީގެ އަގު 40،000 އާއި 46،000 ރުފިޔާއާ ދެމެދުގެ އަދަދަކަށް އަރައެވެ. އަދި 1 ޓީބީގެ ފޯނުތަކުގެ އަގު އުޅެނީ 45،000 އާއި 50،000 ރުފިޔާއާ ދެމެދުގައެވެ.
ކުރިން ނަމަ އާ އައިފޯންތައް ނެރޭ ދުވަސްވަރު ވެސް އާއްމުކޮށް 30،000 ރުފިޔާއިން ދަށް އަގުތަކެއްގައި ރާއްޖޭގެ ބާޒާރުން ލިބެއެވެ.
ރާއްޖެއަށް ފޯނު އެތެރެކޮށް ހޯލްސޭލްކޮށް އަދި ރީޓެއިލްކޮށް އެ ފޯނުތައް ވިއްކާ ބައެއް ވިޔަފާރިވެރިން "ސަން"އަށް މައުލޫމާތު ދިން ގޮތުގައި، ކުރިން އައު އައިފޯނުތަކަށް ރާއްޖޭގައި އޮންނަ ތަރުހީބެއް މި ފަހަރު ނުލިބެއެވެ.
ރާއްޖޭގައި ފޯނު ފަދަ ވަސީލަތްތަކުގެ ވިޔަފާރި ފުޅާ ދާއިރާއެއްގައި ކުރާ ވިޔަފާރިއަކުން މައުލޫމާތު ދިން ގޮތުގައި، އޭނާ ގަބޫލުކުރާ ގޮތުގައި ރާއްޖޭގައި އައިފޯނަށް އޮތް ތަރުހީބު ކުޑަވެފައިވަނީ ފަހަކަށް އައިސް ބާޒާރުގައި ތަކެތި އަގުބޮޑުވެ، ފޯނުތަކުގެ އަގުތައް ވެސް ވަރަށް ބޮޑަށް އުފުލުމާ ގުޅިގެންނެވެ.
"އަސްލު އައިފޯނުގެ ތަރުހީބެއް މިހާރު ކުރިން އޮތް ވަރަކަށް ނެތް. އެ ފޯނު ގަންނަ މީހުންގެ ނިސްބަތް ވެސް މަދުވެއްޖެ. ގަބޫލުކުރެވޭ ގޮތުގައި އައިފޯނުގެ އަގުތަކަށް އައި ބަދަލުން، މިހާރު އެންމެ ފަހުން ނެރުނު އައިފޯން ޕްރޯ މެކްސް އެއްގެ އަގު އުޅެނީ 36،000 ރުފިޔާއިން މަތީގައި. މިއީކީ އާދައިގެ މީހަކަށް ގަނެވޭނެ އަގެއްނޫން ދެއްތޯ." އެލް މޯބައިލްއިން ވާހަކަ ދެއްކި ވިޔަފާރިވެރިޔާ ބުންޏެވެ.
މީގެ އިތުރުން ފޯނު ވިއްކާ ނަން މަޝްހޫރު ބައެއް ފިހާރަތަކުން ވެސް މައުލޫމާތު ދިން ގޮތުގައި އައިފޯނުގެ ޑިމާންޑު މިހާރު ވަރަށް ބޮޑަށް ވަނީ ކުޑަވެފައެވެ. އެ މީހުން ވެސް ގަބޫލުކުރާ ގޮތުގައި ކުރިން އާ އައިފޯނު ގަންނަވަރާ ގާތަށް ވެސް މިހާރު މީހުން އެ ބާވަތުގެ ފޯނު ނުގަނެއެވެ.
"އަސްލު އަޅުގަނޑުމެން ވެސް އައިފޯނު ގެނެސް ވިއްކަން، އައިފޯނަކީ ވަރަށް ގިނަ ބަޔަކު ގަންނަ، އަދި ބޭނުން ކުރާ ވައްތަރުގެ ފޯނެއް. އެހެން ނަމަވެސް މިހާރު ހާލަތު މުޅިން ބަދަލުވެއްޖެ. މިހާރު އައިފޯނަށް އޮތް ތަރުހީބު މުޅިންހެން ގެއްލިއްޖެއޭ ބުނެވޭނީ. މިހާރު ދިވެހިންގެ މާލީ ހާލަތު ތަން ނުދޭތީ އެވަރުގެ އަގެއްގައި ފޯނު ނުގަނެވެނީ ކަަމަށް ބެލެވެނީ،" "ސޮއްޓި ބިޒް" ފިހާރައިން ވާހަކަ ދެއްކި މީހަކު ބުންޏެވެ.
ރާއްޖޭގެ ބާޒާރުން ގަތުމުގެ އިތުރުން އޮންލައިންކޮށް އޯޑަރު ދީގެން ވެސް ބައެއް މީހުން އާ ފޯނުތައް އަމިއްލަ ބޭނުމަށާއި ވިޔަފާރި ކުރުމަށް ގެނެއެވެ.
އެޕަލްއިން ކޮންމެ އަހަރަކުވެސް އައިފޯނުގެ އާ މޮޑެލްތައް ތަޢާރަފްކުރާއިރު، އޭގެ ތެރޭގައި އާންމު ބޭނުންތަކަށް ޚާއްޞަ ބޭސް މޮޑެލްތަކާއި، މަތީ ފެންވަރުގެ ޕްރޯ މޮޑެލްތަކުގެ އިތުރުން ހެޔޮ އަގުގައި ލިބޭ އެސް.އީ މޮޑެލްތައް ހިމެނެއެވެ.
މި އަހަރު އެ ކުންފުނިން ވަނީ، އެޕަލްގެ ފުރަތަމަ ފަށްޖަހާލެވޭ ފޯން "އައިފޯން ޑުއޯ" ނެރެފައެވެ. އެ ފޯނަށް ކުރީކޮޅު ބޮޑު ތަރުޙީބަކާއި ސަމާލުކަމެއް ލިބުނު ނަމަވެސް، އެ ފޯނާ މެދު އޮތް ޝައުޤުވެރިކަން ވަރަށް އަވަހަށް ކުޑަވެ، މީހުން އެ ވާހަކަ ދެއްކުން މަދުވެއްޖެ ކަމަށް ރިޕޯޓުތަކުގައިވެއެވެ.