އުޒްބެކިސްތާނުގެ ސަމަރުގަންދުގައި ބޭއްވި 45 ވަނަ ފިޑޭ ޗެސް އޮލިމްޕިއާޑުގައި ވާދަކޮށް، ރާއްޖޭގެ ޤައުމީ އަންހެން ރާޒުވާ ޓީމުން ކެޓެގަރީ "އީ" އިން ރަން މެޑެލް ހޯދައި ދިވެހި ރާޒުވާގެ ތާރީޚުން ޖާގަ ހޯދައިފިއެވެ.
މީގެ އިތުރުން މުބާރާތުގައި ދެއްކި މޮޅު ކުޅުމާއެކު ރާއްޖޭގެ ދެ ކުޅުންތެރިއަކު ވަނީ "ވުމަން ކެންޑިޑޭޓް މާސްޓަރ (ޑަބްލިއުސީއެމް)" ޓައިޓަލްވެސް ހާސިލުކޮށްފައެވެ.
ދުނިޔޭގެ އެންމެ ބޮޑު ޓީމު އިވެންޓު ކަމަށްވާ ޗެސް އޮލިމްޕިއާޑުގެ މިއަހަރުގެ މުބާރާތުގައި، އަންހެން ޑިވިޝަނުގައި 189 ޓީމު އަދި އޯޕަން ޑިވިޝަނުގައި 206 ޓީމު ވަނީ ވާދަކޮށްފައެވެ.
ޗެސް އޮލިމްޕިއާޑުގައި ރަން މެޑަލް ހޯދި ރާއްޖޭގެ އަންހެން ރާޒުވާ ޓީމުގެ މެމްބަރެއް--ޖުމްލަ 200 އަށްވުރެ ގިނަ ޤައުމުން 1,800 އަށްވުރެ ގިނަ އެތުލީޓުން ބައިވެރިވި މި މުބާރާތުގައި ޓީމުތައް ގިންތިކުރެވެނީ "އޭ" އިން ފެށިގެން "އީ" އާ ހަމައަށް ފަސް ކެޓެގަރީއަކަށެވެ. އެގޮތުން ކެޓެގަރީތައް ބަހާލާފައިވަނީ އެންމެ މަތިން ފެށިގެން އެންމެ ބަލި ޤައުމުތައް ތަރުތީބުވާގޮތަށެވެ.
ހުރިހާ ޓީމުތަކެއްވެސް އެއް ސްވިސް ސިސްޓަމް މުބާރާތެއްގެ ތެރެއިން ކުޅުނު ނަމަވެސް، ކެޓެގަރީ ވަނަތައް ހޮވަނީ އެ ކެޓެގަރީއެއްގައި ހިމެނޭ ޓީމުތަކުގެ ނަތީޖާއަށް ބަލައިގެންނެވެ. މުޅި މުބާރާތުގެ ޗެމްޕިއަންކަން ލިބެނީ ކެޓެގަރީ "އޭ" އިން އެއްވަނަ ހޯދާ ޓީމަށެވެ.
11 ރައުންޑުގެ މައްޗަށް ބޭއްވި މި މުބާރާތުގައި ރާއްޖޭގެ އަންހެން ޓީމުން ރަން މެޑެލް ހޯދީ ކެޓެގަރީ "އީ" ގައި ހިމެނޭ 37 ޤައުމަކާ ވާދަކޮށެވެ. މީގެ ތެރޭގައި މިސްރު، ޖަޕާން، ކޮންގޯ، ކޮސޯވޯ، އުރުގުއޭ އަދި ހޮންޑިއުރާސް ފަދަ ޤައުމުތައް ހިމެނެއެވެ.
ޗެސް އޮލިމްޕިއާޑުގައި ރަން މެޑަލް ހޯދި ރާއްޖޭގެ އަންހެން ރާޒުވާ ޓީމުގެ މެމްބަރެއް--ރާއްޖޭގެ އަންހެން ޓީމުން މުބާރާތް ނިންމާލީ 11 މެޗު ޕޮއިންޓާއި 21.5 ބޯޑު ޕޮއިންޓާއެކުގައެވެ. ރާއްޖެއާ ޓެންޒޭނިއާ މެޗު ޕޮއިންޓުގެ ގޮތުން އެއްވަރުވި ނަމަވެސް، ޓައި-ބްރޭކް އުސޫލުން ރާއްޖެއަށް ކުރި ލިބުނީއެވެ.
އާމިނަތު ސިރުފާގެ ކެޕްޓަންކަމުގެ ދަށުން ކުޅުނު ރާއްޖޭގެ އަންހެން ޓީމުގައި ހިމެނެނީ ޑަބްލިއުސީއެމް ނިހާޔާ އަޙްމަދު، މަރްޔަމް ލައިސާ ޢަބްދުއްރަޝީދު، އީނާ ޢަބްދުﷲ ޙަސަން، ޢާއިޝަތު ޢާލިޔާ މުޙައްމަދު ޝަރީފް އަދި ޢާއިޝަތު ނޯޔާ ޝަހުރުއްދީން ޝަރީފެވެ. މި މުބާރާތުގައި ދެއްކި މޮޅު ކުޅުމުގެ ސަބަބުން މަރްޔަމް ލައިސާ ޢަބްދުއްރަޝީދު އަދި އީނާ ޢަބްދުﷲ ޙަސަން ވަނީ ޑަބްލިއުސީއެމްގެ ލަގަބު ހާސިލުކޮށް، ދިވެހި ރާޒުވާއަށް އިތުރު ކުރިއެރުމެއް ހޯދައިދީފައެވެ.
މި މުބާރާތުގެ ކެޓެގަރީ "ޑީ" ގައި ރާއްޖޭގެ އޯޕަން ޓީމު ވާދަކުރިއިރު، އެ ޓީމުގައި ހިމެނެނީ މުޙައްމަދު ޝުޢާއު، މުޙައްމަދު ޙަސަން، ޢަބްދުއްރަޙްމާން ޢަލީ، މުޙައްމަދު ރާކިން ފަޔާޒް އަދި އަޙްމަދު އަބޫބަކުރެވެ. މީގެ ކުރިން 2022 ވަނަ އަހަރު ބޭއްވި ޗެސް އޮލިމްޕިއާޑުގައިވެސް ރާއްޖޭގެ ފިރިހެން ޓީމުން ވަނީ ކެޓެގަރީއަކުން ރަން މެޑެލް ހޯދާފައެވެ.