މީގެ 21 އަހަރު ކުރިން އިންޑިއާގެ މަޝްހޫރު ރިއަލިޓީ ޓީވީ ޝޯ 'އިންޑިއަން އައިޑަލް'އިން މިއުޒިކީ ދަތުރު ފެށި ދެ ފަންނާނުން ކަމަށްވާ އަބީޖީތު ސާވަންތާއި އަރިޖީތު ސިންގްގެ ކެރިއަރު ބަދަލުވެގެން ދިޔަ ތަފާތު ގޮތްތަކުގެ ހަނދާންތައް އަބީޖީތު އާކޮށްފިއެވެ.
ދެ ފަންނާނުން ވެސް ރިއަލިޓީ ޝޯއަކުން މުނިފޫހިފިލުވުމުގެ ދާއިރާއަށް ނިކުތް ނަމަވެސް، ދެ މީހުންގެ ކެރިއަރު ބައްޓަންވެގެން ދިޔަ ގޮތާއި، ކުރިމަތިލާންޖެހުނު ގޮންޖެހުންތައް ތަފާތުކަމަށް އަބީޖީތު ފާހަގަކުރިއެވެ.
"އިންޑިއަން އައިޑަލް" ސީޒަން 1 ކާމިޔާބު ކުރުމަށްފަހު އަބީޖީތަކީ ގިނަ ބައެއްގެ މެދުގައި މަގުބޫލު ނަމަކަށް ވީއިރު، އަރިޖީތު ވަނީ ޕްލޭބެކް ލަވަކިޔުންތެރިއެއްގެ ގޮތުގައި މަޝްހޫރުވުމުގެ ކުރިން ގިނަ އަހަރުތަކެއް ވަންދެން މިއުޒިކް ސްޓޫޑިއޯތަކުގައި މަސައްކަތްކޮށްފައި ކަމަށް އަބީޖީތު ބުނެފައިވެއެވެ.
އަބީޖީތުގެ މި ވާހަކަތައް އައިސްފައިވަނީ، އަރިޖީތު އިތުރު ފިލްމީ ލަވަތައް ކިޔުން ހުއްޓާލުމަށް ނިންމުމާ ގުޅިގެން އޭނާގެ ކެރިއަރަށް ގިނަ ބައެއްގެ ސަމާލުކަން ލިބިފައިވާ ދަނޑިވަޅެއްގައެވެ. އަބީޖީތު ބުނި ގޮތުގައި އޭނާ ވަގުތުން މަޝްހޫރުވެގެން ދިޔަ ނަމަވެސް، އަރިޖީތު ވަނީ އާންމުންގެ ސަމާލުކަމާ ދުރުގައި ހުރެ މިއުޒިކީ ކެރިއަރު އަލުން ބިނާކޮށްފައެވެ.
އަރިޖީތު ސްޓޭޖް ޝޯއެއްގައި ޕާފޯމްކުރަނީ--ފޮޓޯ/ރޯލިންގްސްޓޯންއިންޑިއާ"2005 ވަނަ އަހަރަށްފަހު އަރިޖީތު ހުރީ މަޝްހޫރުކަމާ ދުރުގައި. މަދުވެގެން 10 ވަރަކަށް އަހަރު އޭނާ މަސައްކަތް ކުރީ ބޮޑެތި މިއުޒިކް ކޮމްޕޯޒަރުންނާ އެކު މިއުޒިކް ޕްރޮޑިއުސަރެއް އަދި ޕްރޮގްރާމަރެއްގެ ގޮތުގަ. އެއީ އޭނާއަށް ލިބުނު ނުސީދާ ބޮޑު ނިއުމަތެއް ކަމަށް ބެލިދާނެ" ފިލްމީ ޔާންއަށް ދިން އިންޓަވިއުއެއްގައި އަބީޖީތު ބުނެފައިވެއެވެ.
އަބީޖީތު އިތުރަށް ބުނި ގޮތުގައި 2005ގައި އިންޑިއަން އައިޑަލް ކާމިޔާބު ކުރުމާއެކު އޭނާއަށް ބޮޑު މަގުބޫލުކަމެއް ލިބި، ސޮނީއާއެކު އަލްބަމެއް ހެދުމުގެ ފުރުސަތާއި އެއް ކްރޯޑު ރުޕީސް ލިބުނެވެ. ނަމަވެސް އަރިޖީތު އަލުން ދިޔައީ ސްޓޫޑިއޯތަކުގައި މަސައްކަތްކޮށް ތަޖުރިބާ ހޯދުމަށް ކަމަށާއި އެދުވަސްވަރު އަރިޖީތު އަކީ ކާކުކަންވެސް ގިނަބަޔަކަށް ނޭނގޭނެ ކަމަށް އަބީޖީތު ވަނީ ބުނެފައެވެ.
މަގުބޫލުކަމުގެ މި ތަފާތުގެ ސަބަބުން ދެމީހުންނަށް ކުރިމަތިވި ޕްރެޝަރު ވެސް ތަފާތެވެ. އަބީޖީތު ބުނި ގޮތުގައި އޭނާއަކީ އޭރުވެސް އާންމުން ދަންނަ މޫނަކަށް ވީއިރު، އަރިޖީތު ދިޔައީ މަޑުމައިތިރިކަމާއެކު މިއުޒިކީ ފަންނާނުންނާއެކު މަސައްކަތްކޮށް، ލަވަކިޔުންތެރިއެއްގެ ގޮތުގައި ފުރުސަތަކަށް އިންތިޒާރު ކުރަމުންނެވެ.
"އެ ދުވަސްވަރު އަހަރެމެން ދެމީހުން އަޅާކިޔާ ނަމަ، އަހަރެންނަކީ ވަރަށް މަގުބޫލު މީހެއް. އެކަމަކު އޭނާއަކީ އެފަދަ މީހެއް ނޫން. އެހެންކަމުން އަހަރެން އުފުލަންޖެހުނު ޕްރެޝަރާއި އޭނާ އުފުލި ޕްރެޝަރު ވަރަށް ތަފާތު. އޭނާ އެ 10 އަހަރު ދުވަހު މިއުޒިކީ ފަންނާނުންނާއެކު ބުރަ މަސައްކަތްތަކެއް ކުރި" އަބީޖީތު ބުންޏެވެ.
މީގެ އިތުރުން ކާމިޔާބީއާއެކު އާންމުންގެ ނަޒަރިއްޔާތު ބަދަލުވާ ގޮތަށް އަލިއަޅުވާލަމުން އަބީޖީތު ބުނީ، ކޮންމެ ފަންނާނެއްގެ ދަތުރު ތަފާތުވި ނަމަވެސް އާންމުން އަބަދުވެސް ސަމާލުކަންދެނީ އެއިރެއްގައި ކާމިޔާބު މީހުންނަށް ކަމަށެވެ. އަދި މަދުން މައުލޫމާތު އެނގޭ މީހުންގެ ކިބައިން އުނިކަންތައްތައް ހޯދުމަކީ އާންމުންގެ އާދައެއް ކަމަށްވެސް އޭނާ ބުންޏެވެ.
ފިލްމީ ޕްލޭބެކް މިއުޒިކުން އަރިޖީތު ދުރަށް ޖެހިލަން ނިންމި ނަމަވެސް، އޭނާގެ މިއުޒިކީ ޙަޔާތް އެއްކޮށް ނުނިމެއެވެ. އޭގެ ބަދަލުގައި އޭނާ މިހާރު އިސްކަންދެނީ އަމިއްލަ މިއުޒިކީ އުފެއްދުންތަކަށާއި، ވަކިފަރުދީ އަލްބަމްތަކުގެ އިތުރުން ދުނިޔޭގެ އެކި ކަންކޮޅުތަކުގައި ބާއްވާ ކޮންސަޓްތަކަށެވެ.
އަނެއްކޮޅުން، "އިންޑިއަން އައިޑަލް"އިން ވިދާލި އަބީޖީތު ސާވަންތު މިހާރު އަންނަނީ ސްޓޭޖް ޝޯތަކާއި، ލައިވް ޕާފޯމަންސްތަކުގެ އިތުރުން ޓީވީ ރިއަލިޓީ ޝޯތަކުންނާއި އަމިއްލަ ސިންގަލްސްތަކުން އާންމުންގެ މަގުބޫލުކަން ދަމަހައްޓަމުންނެވެ. ކާމިޔާބީގެ އުސްމިންތަކާއި ދަތުރުކުރި މަގު ދެ ފަންނާނުންގެ މުޅިން ތަފާތުވި ނަމަވެސް، އަބީޖީތު އާއި އަރިޖީތަކީވެސް އިންޑިއާގެ މިއުޒިކީ ތާރީޚުގައި އެމީހުންގެ އަމިއްލަ ނަން ރަންއަކުރުން ފަވާލާފައިވާ ފާހަގަކޮށްލެވޭ ދެ ފަންނާނުންނެވެ.