ދުނިޔޭގެ އެންމެ މޮޅު އެއާލައިންގެ މަގާމު ސިންގަޕޯ އެއާލައިންސްއިން ހަވަނަ ފަހަރަށް ހޯދައިފިއެވެ.
އިނގިރޭސިވިލާތުގެ ލަންޑަންގައި ބޭއްވި 2026 ވަނަ އަހަރުގެ ސްކައިޓްރެކްސް ވޯލްޑް އެއާލައިން އެވޯޑްސްގައި މި މަގާމު އެ ކުންފުންޏަށް ލިބުނުއިރު، މިއީ މި އެވޯޑް ސިންގަޕޯ އެއާލައިންސްއިން ހޯދި ހަވަނަ ފަހަރެވެ.
މިދިޔަ އަހަރު އެ ލިސްޓުގެ އެއްވަނަ ހޯދި ގަތަރު އެއާވޭސް މި އަހަރު ދިޔައީ ދެވަނައަށެވެ.
ސްކައިޓްރެކްސްއިން ބުނި ގޮތުގައި، މި އެވޯޑްތައް ދީފައިވަނީ މިދިޔަ އަހަރުގެ ސެޕްޓެންބަރު މަހުން ފެށިގެން 2026 ވަނަ އަހަރުގެ އޮގަސްޓު މަހުގެ ނިޔަލަށް 24.8 މިލިއަން ފަސިންޖަރުންގެ މެދުގައި ނެގި ސާވޭއެއްގެ މައްޗަށް ބިނާކޮށެވެ. މި ސާވޭގައި 300 އަށް ވުރެ ގިނަ އެއާލައިން ހިމަނާފައިވެއެވެ.
ދެވަނައަށް އެންމެ ފާހަގަކޮށްލެވޭ އެއާލައިންގެ އެވޯޑް ލިބުނީ ގަތަރު އެއާވޭސްއަށް -- ފޮޓޯ/ އޭއެފްޕީސިންގަޕޯ އެއާލައިންސްގެ ސީއީއޯ ގޯ ޗޫން ފޮންގް ވިދާޅުވި ގޮތުގައި، މި ކާމިޔާބީއަކީ އެ ކުންފުނީގެ މުވައްޒަފުންގެ ބުރަ މަސައްކަތާއި ޕްރޮފެޝަނަލްކަން ދައްކައިދޭ ކަމެކެވެ. އަދި ސްކައިޓްރެކްސްގެ ސީއީއޯ އެޑްވާޑް ޕްލޭސްޓެޑް ވަނީ ސިންގަޕޯ އެއާލައިންސްއިން ފަސިންޖަރުންނަށް ފޯރުކޮށްދޭ ފެންވަރު ރަނގަޅު ޚިދުމަތްތައް ފާހަގަކޮށް، އެ ކުންފުންޏަށް މަރުހަބާ ކިޔާފައެވެ.
މި އަހަރުގެ އެވޯޑްތަކުގައި ތިންވަނަ ހޯދީ ކެތޭ ޕެސިފިކް އެއާވޭސްއިންނެވެ. ހަތަރުވަނަ ޖަޕާނުގެ އޯލް ނިޕޯން އެއާވޭސް (އޭއެންއޭ) އަށް ލިބުނުއިރު، ފަސްވަނަ ލިބުނީ ޓާކިޝް އެއާލައިންސްއަށެވެ.
މީގެ އިތުރުން، އެންމެ ރަނގަޅު ފަސްޓް ކްލާސް ޚިދުމަތުގެ އެވޯޑް އެއާ ފްރާންސްއިން ހޯދިއިރު، އެންމެ ސާފުތާހިރު ކެބިންގެ އެވޯޑް ލިބުނީ ޓައިވާނުގެ ސްޓާލަކްސް އެއާލައިންސްއަށެވެ.