އިންޑިއާއިން ބޭރުގައި ދިރިއުޅޭ އެ ގައުމުގެ ރައްޔިތުންގެ ފަރާތުން ލިބޭ ޑޮލަރު، ހަފުތާއަކު އެއް ފަހަރަށް ވުރެ ގިނައިން މާރުކުރެވޭނެ ގޮތް އިންޑިއާގެ ރިޒާވް ބޭންކް (އާރްބީއައި) އިން ބޭންކުތަކަށް ހަމަޖައްސައިދީފިއެވެ.
ފައިސާ މާރުކުރުމުގެ މުއާމަލާތްތަކުގައި ހަރަކާތްތެރިވާ ތިން ވިޔަފާރިވެރިއަކާ ހަވާލާދީ ރޮއިޓާސްއިން ރިޕޯޓުކޮށްފައިވާ ގޮތުގައި، އާރްބީއައިގެ ޓްރޭޑިން ސިސްޓަމް މެދުވެރިކޮށް ބޭންކުތަކަށް ފޮނުވި މެސެޖެއްގައި ބުނެފައިވަނީ އެފްސީއެންއާރް (ބީ) ޑިޕޮސިޓްތަކާ ގުޅޭ 100 މިލިއަން ޑޮލަރަށް ވުރެ މަތީގެ މުއާމަލާތްތަކަށް މި ލުއި ލިބޭނެ ކަމަށެވެ.
މިހާރު އޮންނަ ގޮތުން މަރުކަޒީ ބޭންކާއެކު ޑޮލަރު މާރުކުރުމަށް ކޮންމެ ބޭންކަކަށް ވެސް ކަނޑައަޅާފައި އޮންނަނީ ހަފުތާއަކު އެއް ދުވަހެވެ. ނަމަވެސް އަލަށް ގެނައި ބަދަލާއެކު، 100 މިލިއަން ޑޮލަރަށް ވުރެ ދަށް އަދަދުތަކުގެ މުއާމަލާތްތައް ކުރިން ވެސް އޮތް ގޮތަށް އެއް ދުވަހަކަށް ލިމިޓުކުރެވިފައި އޮތް ނަމަވެސް، ބޮޑެތި އަދަދުތައް އިތުރު ދުވަސްތަކުގައި މާރުކުރެވޭނެއެވެ.
މިކަމާ ގުޅޭގޮތުން އާރްބީއައިއިން ރަސްމީކޮށް ވަކި އެއްޗެއް ބުނެފައެއް ނުވެއެވެ.
މި ބަދަލު ގެނެސްފައިވަނީ، އިންޑިއާއަށް ޑޮލަރު ވެއްދުން އިތުރުކުރުމަށް އާރްބީއައިއިން ފަށާފައިވާ ޚާއްސަ ޑިޕޮސިޓް ސްކީމްގެ މުއްދަތު އަންނަ ހޯމަ ދުވަހަށް ހަމަވުމާ ގާތްވެފައި ވަނިކޮށެވެ. މި ސްކީމްގެ ދަށުން މިހާތަނަށް 65 ބިލިއަން ޑޮލަރަށް ވުރެ ގިނަ ފައިސާ ޖަމާކޮށްފައިވާއިރު، މީގެ މައިގަނޑު މަގުސަދަކީ އިންޑިއާގެ ބޭރު ފައިސާގެ ރިޒާވް ވަރުގަދަކުރުމާއި އިންޑިއާ ރުޕީސްއަށް އޮންނަ އިތުބާރު ބޮޑުކުރުމެވެ. ސްކީމްގެ މުއްދަތު ހަމަވުމުގެ ކުރިން ވީހާވެސް ގިނަ ޑޮލަރު ހޯދުމަށް ބޭންކުތަކުން ދަނީ މަސައްކަތްކުރަމުންނެވެ.
ނަން ހާމަނުކުރުމަށް އެދި މައުލޫމާތު ދިން އޮފިޝަލަކު ބުނި ގޮތުގައި، މަރުކަޒީ ބޭންކުގެ މި ނިންމުމަކީ ބޭންކުތަކަށް އެއްފަހަރާ ގިނަ އަދަދެއްގެ ޑޮލަރު ވަނުމުން ދިމާވެދާނެ ދަތިތައް ހައްލުކުރުމަށް އެހީތެރިވެދިނުމުގެ ގޮތުން ނިންމި ނިންމުމެކެވެ. މި ބަދަލާއެކު، ބޭންކުތަކުގައި ހުންނަ އިތުރު ޑޮލަރުތައް ހަފުތާގެ ވަކި ދުވަހަކަށް މަޑުނުކޮށް މަރުކަޒީ ބޭންކަށް ދޫކޮށްލުމުގެ ފުރުސަތު ލިބިގެންދާނެއެވެ.
ބޭންކުތަކުގައި ގިނަ އަދަދަކަށް ޑޮލަރު ޖަމާވުމުގެ އަސަރު މިއަދު ބާޒާރުން ފެނިފައިވާއިރު، އެއް ދުވަހުގެ ޑޮލަރު މާރުކުރުމުގެ އަގު ވަނީ 2.5 ޕައިސާއަށް އުފުލިފައެވެ. މިއީ އާންމުކޮށް މި އަގު ހުންނަ 0.40 އާއި 0.50 ޕައިސާއާ އަޅައިބަލާއިރު ބޮޑު އުފުލުމެކެވެ. ވިޔަފާރިވެރިން ފާހަގަކުރި ގޮތުގައި، އެއް މަސް ދުވަހުގެ ހެޖިން ކޮސްޓް ވެސް 30 ބޭސިސް ޕޮއިންޓަށް ވުރެ މައްޗަށް ޖެހިފައިވެއެވެ. ނަމަވެސް އާރްބީއައިގެ ނިންމުމާއެކު މި އަގުތައް ވަނީ ކުޑަކޮށް ދަށަށް ގޮސްފައެވެ.