ސްޓޭޓް މިނިސްޓަރުކަމުން ފައިރޫޝް އިސްތިއުފާދެއްވައިފި

ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި ޑރ. އަބްދުﷲ ފައިރޫޝް މިއަދު އެ މަގާމުން އިސްތިއުފާދެއްވައިފިއެވެ.

މަގާމުން އިސްތިއުފާދެއްވުމަށްފަހު ސޯޝަލް މީޑިއާގައި ކުރެއްވި ޕޯސްޓެއްގައި ފައިރޫޝް ވިދާޅުވި ގޮތުގައި، އެ ނިންމެވުން ނިންމެވީ ވަރަށް ބޮޑަށް ވިސްނެވުމަށް ފަހުގައެވެ. އަދި މިއީ އާންމު ޚިދުމަތުގެ މި ބާބު ނިންމާލަން އެންމެ ރަނގަޅު ވަގުތު ކަމަށް ގަބޫލުކުރައްވާ ކަމަށް އޭނާ ވިދާޅުވިއެވެ.

މީގެ އިތުރުން، ޚިދުމަތްކުރަން ލިބުނު ފުރުސަތަށާއި އެކުގައި މަސައްކަތްކުރި މުވައްޒަފުންނާއި މުއައްސަސާތަކަށް އޭނާ ވަނީ ޝުކުރުއަދާކުރައްވާފައެވެ.

އިސްތިއުފާއާ ގުޅިގެން އިތުރު ތަފްސީލު ހޯދުމަށް ފައިރޫޝްއަށް ގުޅައި, މެސެޖު ކުރި ނަމަވެސް މިހާތަނަށް އޭނާގެ ބަހެއް އަދި ވަނީ ލިބޭގޮތް ނުވެފައެވެ.

މި ސަރުކާރުގައި ފައިރޫޝް އެންމެ ފުރަތަމަ އައްޔަންކުރެއްވީ ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރުގެ މަގާމަށެވެ. އޭނާ ހޯމްލޭންޑް ސެކިއުރިޓީ މިނިސްޓްރީއަށް ބަދަލުކުރެއްވީ 16 އޮކްޓޫބަރު 2024 ގައެވެ.

ސަރުކާރުގެ މަގާމުތަކަށް ވަޑައިގަތުމުގެ ކުރިން ފައިރޫޝް ވަނީ މޯލްޑިވްސް ޕޮލިސް ސާވިސްގައި 20 އަހަރު ދުވަހު ޚިދުމަތްކުރައްވާފައެވެ. ފުލުހުންގެ އިދާރާގައި އެސިސްޓެންޓް ކޮމިޝަނާ އޮފް ޕޮލިސްގެ މަގާމުގައި ހުންނެވުމަށްފަހު، އޭނާ ޝަރަފުވެރިކަމާއެކު ރިޓަޔާކުރެއްވީ 2021 ވަނަ އަހަރުއެވެ. ނަމަވެސް، އޭނާގެ މައްޗަށް ކުރެވުނު ސީރިއަސް ތުހުމަތުތަކަކާ ގުޅިގެން، ޝަރަފުވެރިކަމާއެކު އޭނާ ރިޓަޔާކުރެއްވުމަކީ ބަލައިގަނެވޭނެ ކަމެއް ނޫން ކަމަށް ހަމަ އެ އަހަރު ރައްޔިތުންގެ މަޖިލީހުން ވަނީ ނިންމައިފައެވެ.

ފައިރޫޝްގެ މައްޗަށް ކުރެވޭ އެންމެ ބޮޑު އެއް ތުހުމަތަކީ ހަތެއް ފެބްރުއަރީގައި ކުރީގެ ރައީސް މުހައްމަދު ނަޝީދުގެ ވެރިކަން ނިމުމަކަށް އައިއިރު ހިނގައިދިޔަ ކަންކަމާ ގުޅޭ ތުހުމަތުތަކެވެ. ނަޝީދު އިސްތިއުފާދެއްވަން ކުރިމަތިވި ހަމަނުޖެހުންތަކުގައި ފައިރޫޝް އިސް ދައުރެއް އަދާކުރެއްވި ކަމަށް ތުހުމަތުކޮށްފައިވާއިރު، އެ ދުވަހު ފުލުހުންގެ އިދާރާއާ ވަގުތީ ގޮތުން ހަވާލުވެވަޑައިގަތީ ވެސް އޭނާއެވެ.

ފަހުން، ފުލުހުންގެ ޚިދުމަތުގެ އާ ގާނޫނު ތަސްދީގުކޮށްފައިވަނިކޮށް، އެ ގާނޫނުގައިވާ ގޮތުގެ މަތިން ނޫނީ ފުލުހަކު ރިޓަޔާ ނުކުރެއްވޭނެ ކަމަށް ވިދާޅުވެ، ނަޝީދު ވަނީ ފައިރޫޝްގެ މައްސަލަ އޭރު ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ (241) ކޮމިޓީއަށް ވެސް ހުށަހަޅުއްވާފައެވެ.