ކެމްބޯޑިއާއިން ރާއްޖެއަށް ގެނައި ފުރަތަމަ ސީ-ޓު-އެއާ ޓްރާންސްޝިޕްމަންޓް ކާގޯ، ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން ކާމިޔާބުކަމާއެކު ހެންޑްލްކޮށްފިއެވެ.
މިއާއެކު، ރާއްޖޭގެ ސީ-ޓު-އެއާ ކާގޯ ނެޓްވޯކް އިރުދެކުނު އޭޝިއާއަށް ފުޅާވެ، އޭޝިއާއާއި ޔޫރަޕް ގުޅުވައިދިނުމުގައި ރާއްޖޭގެ ދައުރު އިތުރަށް ފުޅާވެފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފައިވެއެވެ.
މި ޝިޕްމަންޓް ރާއްޖެއިން ބޭރަށް ފޮނުވާފައިވަނީ ގަތަރު އެއާވޭސް މެދުވެރިކޮށެވެ. އަދި މި މަސައްކަތް ކޯޑިނޭޓްކޮށްފައިވަނީ ސީއީއެފް ލޮޖިސްޓިކްސްއިން ކަމަށް އެމްއޭސީއެލްއިން ބުނެއެވެ.
ކެމްބޯޑިއާގެ ކާގޯ ހެންޑްލްކުރުމަކީ، ކަނޑުމަގުން މުދާ ގެނެސް ވައިގެ މަގުން އެހެން ގައުމުތަކަށް ފޮނުވުމަށް ރާއްޖޭގައި ފަށާފައިވާ ހިދުމަތަށް ލިބުނު ކުރިއެރުމެއް ކަމަށް އެ ކުންފުނިން ފާހަގަކުރެއެވެ.
އެމްއޭސީއެލްއާއި މޯލްޑިވްސް ޕޯޓްސް ލިމިޓެޑް (އެމްޕީއެލް) ގުޅިގެން 2024 ވަނަ އަހަރު ފެށި ސީ-ޓު-އެއާ ކާގޯ ހިދުމަތް އަންނަނީ ފުޅާކުރަމުންނެވެ. ތަފާސްހިސާބުތައް ދައްކާ ގޮތުން، މި އަހަރުގެ ފުރަތަމަ ހަ މަސްދުވަހުގެ ތެރޭގައި ވީއައިއޭއިން ވަނީ 36،367 ޓަނުގެ ކާގޯ ހެންޑްލްކޮށްފައެވެ. މީގެ ތެރެއިން ޓްރާންސްޝިޕްމަންޓް ކާގޯގެ ގޮތުގައި 7،982 ޓަނު ހިމެނޭއިރު، މިއީ އޭގެ ކުރީ އަހަރާ އަޅައި ބަލާއިރު 15 ޕަސެންޓުގެ ކުރިއެރުމެކެވެ. އަދި ސީ-ޓު-އެއާ ހިދުމަތް ފެށި ފަހުން މިހާތަނަށް 5،000 އަށް ވުރެ ގިނަ ޓަނުގެ މުދާ 17 އެއާލައިނެއް މެދުވެރިކޮށް ޔޫރަޕާއި އުތުރު އެމެރިކާއަށް ފޮނުވާފައިވާ ކަމަށް އެމްއޭސީއެލްއިން ބުނެފައިވެއެވެ.
ވީއައިއޭއިން ވަނީ މި މަހުގެ 12 ވަނަ ދުވަހު އެކަނި ވެސް 140 ޓަނުގެ ޓްރާންސްޝިޕްމަންޓް ކާގޯ ހެންޑްލްކޮށް، އެއް ދުވަހެއްގެ ތެރޭގައި އެންމެ ގިނަ ކާގޯ ހެންޑްލްކުރުމުގެ ރެކޯޑު ހަދާފައެވެ. މިއަހަރުގެ ފުރަތަމަ ހަ މަސްދުވަހުގެ ތެރޭގައި ރާއްޖެއަށް އެންމެ ގިނައިން ޓްރާންސްޝިޕްމަންޓް ކާގޯ ގެނެސްފައިވަނީ ސްރީލަންކާއިންނެވެ. ދެވަނައަށް އެންމެ ގިނަ ކާގޯ ގެނެސްފައިވަނީ ޗައިނާއިންނެވެ. އަދި ރާއްޖެ މެދުވެރިކޮށް އެންމެ ގިނަ ކާގޯ ފޮނުވާފައިވަނީ އެމެރިކާއަށެވެ. އެގޮތުން އެމެރިކާއަށް 1،618 ޓަނުގެ ކާގޯ ފޮނުވާފައިވާ ކަމަށް ތަފާސްހިސާބުތަކުން ދައްކައެވެ.
ރާއްޖެ އޮންނަ ސަރަހައްދުގެ ގޮތުން، މިއީ ކާގޯ ޓްރާންސްޝިޕްމަންޓް ހަބެއްގެ ގޮތުގައި ތަރައްގީކުރުމަށް އެކަށީގެންވާ މަންޒިލެއް ކަމަށް ސަރުކާރުން ބުނެފައިވެއެވެ. ކަނޑުމަގުން މުދާ ގެނައުމަށްފަހު ވައިގެ މަގުން ފޮނުވުމަކީ، ހަރަދު ކުޑަކޮށް އަދި އަވަހަށް މުދާ ފޯރުކޮށްދިނުމަށް ބައިނަލްއަގުވާމީ ލޮޖިސްޓިކްސްގައި ބޭނުންކުރާ މޮޑެލްއެއް ކަމަށް އިންޑަސްޓްރީގެ އޮފިޝަލުން ފާހަގަކުރެއެވެ. ކުރިއަށް އޮތް 2026 އަދި 2027 ގެ ފިނި މޫސުމާ ދިމާކޮށް އެއާލައިންތަކުގެ ކެޕޭސިޓީ އިތުރުކޮށް، އިނގިރޭސިވިލާތް ހިމެނޭ ގޮތަށް އާ ރޫޓުތައް ތައާރަފުކުރާނެ ކަމަށް އެމްއޭސީއެލްއިން ލަފާކުރެއެވެ.