ރާއްޖޭގައި މީގެ ކުރިން އޮންނަ ކޮންމެ ވެރިކަމެއް ބަދަލުވުމާއެކު، ކުރީގެ ވެރިން ޖަލަށްލުމުގެ ސަގާފަތް މި ސަރުކާރުން ނިމުމަކަށް ގެނެސްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި މިއަދު ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުންނެވެ.
މި ޖަލްސާގައި ވާހަކަފުޅު ދައްކަވަމުން ރައީސް ފާހަގަކުރެއްވީ، އިދިކޮޅު ސިޔާސީ ލީޑަރުންނާއި ސިޔާސީ ހަރަކާތްތައް ހިންގުމަށް އޮތް ހުރަސްތަކާއި އަނިޔާވެރިކަން މިހާރު ނައްތާލެވިފައިވާ ކަމަށެވެ. އަދި ސިޔާސީ ގޮތުން ބަދަލުހިފުމުގެ ވިހަގަދަ ރޫހުން ރާއްޖެ މިނިވަންކޮށްދީފައިވާ ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވި ގޮތުގައި، މި ސަރުކާރު ވެރިކަމަށް އައީ ސިޔާސީ ބަދަލު ހިފުމުގެ ރޫހު ނެތިކޮށްލާނެ ކަމުގެ ވައުދާ އެކުގައެވެ. އެހެންކަމުން އެ ވައުދު ތަންފީޒުކޮށް، ސިޔާސީ ބަދަލުހިފުމުގެ ވިހަގަދަ ރޫހުގެ އަޅުވެތިކަމުން، މިހާރު މި ގައުމު މިނިވަންކޮށްދީފައިވާ ކަމަށް ރައީސް ވިދާޅުވިއެވެ.
މީގެ އިތުރުން ސިޔާސީ ގޮތުން ހަރަކާތްތެރިވުމަށް މިހާރު އެއްވެސް ހުރަހެއް ނެތްކަން އެމަނިކުފާނު ފާހަގަކުރެއްވިއެވެ.
ރާއްޖޭގެ ޑިމޮކްރަސީގެ ތާރީހުގައި މިހާތަނަށް ނުދޭ މިންވަރަށް މިނިވަންކަން މި ސަރުކާރުން ހޯދައިދީފައިވާ ކަމަށް ރައީސް ވިދާޅުވިއެވެ. އެގޮތުން، ސިޔާސީ ހަރަކާތްތައް ހިންގުމަށް ސްކޫލު ހޯލުތަކާއި ދައުލަތުގެ މުއައްސަސާތައް ދޫކުރުމާއި، އިދިކޮޅު ޕާޓީތަކުގެ ބައްދަލުވުންތައް ބޭއްވުމަށް މަގުފަހިކޮށްދިނުން އެމަނިކުފާނު މިސާލެއްގެ ގޮތުގައި ނެންގެވިއެވެ.
"ރާއްޖޭގެ ތާރީޚުގައި ވެސް ޑިމޮކްރެސީގެ ކަންކަން ފެށިގެން އައި ހިސާބުން ފެށިގެން މިއަދާ ހަމައަށް ކަޑައްތު ކުރެވުނު ދުވަސްތަކަށް ބަލާއިރު، މި ސަރުކާރުން މިހާރު ޑިމޮކްރެސީ މިނިވަން ކޮށްދީފައިވާ ވަރަށްވުރެ ފުރިހަމަ އަށް ދުވަހަކު ވެސް ޑިމޮކްރެސީ ތަންފީޒުކުރެވިފައެއް ނެތް." ރައީސް ވިދާޅުވިއެވެ.
ކުރީގެ ވެރިންނާމެދު އަމަލުކުރާ ގޮތާ ގުޅޭގޮތުން ރައީސް ވިދާޅުވީ، މި ސަރުކާރުން ކުރީގެ އެއްވެސް ލީޑަރަކު ޖަލަކަށް ނުލާ ކަމަށެވެ. އަދި މީގެ ކުރިން ސަރުކާރެއް ހުވާކުރާ ތަނުން އެންމެ ފުރަތަމަ ވެސް ކުރާ ކަމަކީ ކުރީގެ ވެރިޔާ ޖަލަށް ލެވޭތޯ ބެލުން ކަމަށާއި، ނަމަވެސް އެ އަނިޔާވެރި ސަގާފަތަށް މި ސަރުކާރުން މިހާރު ނިމުން ގެނެސްފައިވާ ކަމަށް ރައީސް ވިދާޅުވިއެވެ.
ރައީސް ވިދާޅުވީ، އެއްވެ އުޅުމުގެ މިނިވަންކަމާއި ނޫސްވެރިކަމުގެ މިނިވަންކަން ވެސް ހުދޫދުގެ ތެރެއިން ފުރިހަމައަށް ދީފައިވާނެ ކަމަށެވެ. އަދި ޑިމޮކްރަސީގެ އެންމެ ފުރިހަމަ މިނިވަންކަން ރާއްޖެއަށް ހޯދައިދިނުމަކީ މި ސަރުކާރުގެ އެންމެ ބޮޑު އެއް އަމާޒު ކަމުގައިވެސް އެމަނިކުފާނު ވިދާޅުވިއެވެ.