ޝިންޖިއާން އިން ޢަހްމަދު ސާއިލު ޢަލީ
ރާއްޖެ ފަދަ ޖަޒީރާ ގައުމެއްގެ ރައްޔިތަކަށް ވުމުން، އިންޖިނިއަރިންގެ ބޮޑެތި މަޝްރޫއުތައް އަބަދުވެސް ސިފަކުރެވެނީ ކަނޑުގެ އަޑިން ނުވަތަ ކަނޑު ހުރަސްކޮށް އަޅާ ބްރިޖުތަކުގެ ގޮތުގައެވެ. ސިނަމާލެ ބްރިޖަކީ އޭގެ ފުރިހަމަ މިސާލެކެވެ. ނަމަވެސް، ކަނޑާ އެތައް ހާސް މޭލެއް ދުރުގައި، ޔުރޭޝިއާގެ އެންމެ އެތެރެވަރީގައި ހުރެ ބަލައިލުމުން، ގުޅުންތައް ބަދަހިކުރުމަށް އިންސާނުން ކުރާ މަސައްކަތަށް އެއްވެސް ހުރަހެއް ނެތްކަން އިހުސާސްކުރެވުނެވެ. އެއީ ފުން ކަނޑު ކަމުގައި ވިޔަސް، ނުވަތަ ބޯ ސްނޯއިން ފޮރުވިފައިވާ ބިޔަ ހިލަ ފަރުބަދަތަކެއް ކަމުގައި ވިޔަސް، މޮޅު އިންޖިނިއަރިންގެ އެހީގައި އެކަން ކާމިޔާބުކުރެވޭނެކަން މި ދަތުރުން ޔަގީންވިއެވެ.
ޗައިނާގެ ޝިންޖިއާންގައި ޓިއަންޝާން ވިކްޓަރީ ޓަނަލް (ޓިއަންޝާން ޝެންގްލީ ޓަނަލް) ގެ މަސައްކަތް ކުރި ޓީމް -- ސަން ފޮޓޯ
އަޅުގަނޑު މިހާރު މިހުރީ ޗައިނާގެ ހުޅަނގު އުތުރުގައި އޮންނަ ޝިންޖިއާން އުއިގޫރް އޮޓޮނޮމަސް ރީޖަންގައެވެ. މި ދަތުރަކީ "ސިލްކް ރޯޑް އިކޮނޮމިކް ބެލްޓް ޖޮއިންޓް ކޮންސްޓްރަކްޝަން ކަންޓްރީސް މީޑިއާ ހެޑް ސެމިނާ" ގައި ބައިވެރިވުމަށް ކުރާ ދަތުރެކެވެ. ދުނިޔޭގެ އެކި ކަންކޮޅުތަކުން ވަޑައިގެންނެވި އިސް ނޫސްވެރިންނާއި އެޑިޓަރުންނާއެކު، މިއަދު އަޅުގަނޑުމެންގެ މަންޒިލަކަށް ވީ ޒަމާނީ އުމްރާނީ ތަރައްގީގެ ބިޔަ މަޝްރޫއެއް ކަމަށްވާ ޓިއަންޝާން ވިކްޓަރީ ޓަނަލް (ޓިއަންޝާން ޝެންގްލީ ޓަނަލް) އެވެ. މިފަދަ ބިޔަ މަޝްރޫއުތަކުގެ ވާހަކަ ނޫސްތަކުން ކިޔާފައިވީ ނަމަވެސް، ޓިއަންޝާން ފަރުބަދަތަކާ ދިމާއަށް ދަތުރުކުރަމުން ދިޔައިރު، މި މަޝްރޫއުގެ ބިޔަކަން ހިތަށް ގެންނަން ވެސް އުނދަގޫވިއެވެ.
ޗައިނާގެ ޝިންޖިއާންގައި ޓިއަންޝާން ވިކްޓަރީ ޓަނަލް (ޓިއަންޝާން ޝެންގްލީ ޓަނަލް) -- ސަން ފޮޓޯ
މީޑިއާ ޓީމު އެތަނަށް ދިޔުމާއެކު، މި ޓަނަލް އިންޖިނިއަރިންގެ އަޖައިބަކަށް ވާ ސަބަބުތައް ކަމާބެހޭ ފަރާތްތަކުން ކިޔައިދިނެވެ. މިއީ ހަމައެކަނި ފަރުބަދައެއް ހުރަސްކުރަން ހެދި މަގެއް ނޫނެވެ. މިއީ ސިވިލް އިންޖިނިއަރިންގެ ތާރީޚު ބަދަލުކޮށްލި މަޝްރޫއެކެވެ. މި ޓަނަލް ވަނީ ދުނިޔޭގެ ދެ ރެކޯޑެއް މުގުރާލާފައެވެ. ފުރަތަމަ ކަމަކީ، މިއީ ދުނިޔޭގެ އެންމެ ދިގު ހައިވޭ ޓަނަލްއެވެ. މި 22.13 ކިލޯމީޓަރު (13.75 މޭލު) އަށް ދެމިގެންދާ މި ޓަނަލްއަކީ މެދުކެނޑުމެއްނެތި އެއް ބޯހޯލްއަކުން ކޮނެފައިވާ އެންމެ ދިގު ޓަނަލްގެ ގޮތުގައި ގިނިސް ވޯލްޑް ރެކޯޑްސް އިން ވަނީ ސެޓިފައިކޮށްފައެވެ. ދެވަނަ ކަމަކީ، ދުނިޔޭގެ އެންމެ ފުން ހައިވޭ ޝާފްޓް ހުރީ ވެސް މިތަނުގައެވެ. ފަރުބަދައިގެ އެހާ ފުންމިނުގައި ތާޒާ ވައި ދައުރުކުރުމަށްޓަކައި، އިންޖިނިއަރުން ވަނީ ވައި ވަންނަ ބިޔަ ހަތަރު ވަޅުގަނޑު (ޝާފްޓް) ކޮނެފައެވެ. މީގެ ތެރެއިން އެންމެ ފުން ޝާފްޓްގެ ފުންމިނުގައި 707 މީޓަރު ހުރެއެވެ. މިއީވެސް ދުނިޔޭގެ ރެކޯޑެކެވެ.
ޗައިނާގެ ޝިންޖިއާންގައި ޓިއަންޝާން ވިކްޓަރީ ޓަނަލް (ޓިއަންޝާން ޝެންގްލީ ޓަނަލް) ގެ ކަންކަން މޮނިޓަރުކުރާ ތަނުގެ ތެރެއިން -- ސަން ފޮޓޯ
ގަރުނުތަކެއް ވަންދެން ޓިއަންޝާން ފަރުބަދަތަކަކީ ޝިންޖިއާންގެ އުތުރާއި ދެކުނު ވަކިކޮށްދޭ ބޮޑު ހުރަހެކެވެ. ތާރީޚީ ގޮތުން ބަލާއިރު، އުތުރުގައި އޮންނަ ވެރިރަށް އުރުމްޗީ އިން ދެކުނުގައި އޮންނަ ޔޫލީ ކައުންޓީ (ކޯލާ ކައިރި) އަށް ދަތުރުކުރަން ޖެހެނީ 4,000 މީޓަރު އުސްމިނުގައިވާ ނުރައްކާތެރި، އަދި އެނބުރުންގިނަ ފަރުބަދަމަތީ މަގުތަކުންނެވެ. އެއަށްވުރެ ގޯސް ކަމަކީ، އަހަރެއްގެ ތެރޭގައި އަށް މަސް ދުވަހު ބޯކޮށް ސްނޯ ފައިބައި ގަނޑުވުމުގެ ސަބަބުން މި މަގުތައް ބަންދުވެ، މުޖުތަމައުތައް އެކަހެރިވެ، ވިޔަފާރިއަށް ހުރަސްއެޅުމެވެ. ޗައިނާއިން މި ޓަނަލް ބިނާކުރީ މޫސުމަށް ބަދަލުނައިސް، އަހަރުގެ ހުރިހާ ދުވަހަކުވެސް ދަތުރުކުރެވޭނެ މަގެއް ހުޅުވާލުމަށެވެ.
ޗައިނާގެ ޝިންޖިއާންގައި ޓިއަންޝާން ވިކްޓަރީ ޓަނަލް (ޓިއަންޝާން ޝެންގްލީ ޓަނަލް) ގެ މަސައްކަތް ދައްކުވައިދޭ މޮޑެލްއެއް -- ސަން ފޮޓޯ
މުޅި އުރުމްޗީ-ޔޫލީ އެކްސްޕްރެސްވޭ މަޝްރޫއުގެ އެންމެ މުހިންމު ބައި ކަމަށްވާ މި ޓަނަލްގެ މަސައްކަތް ފެށީ އޭޕްރީލް 2020 ގައެވެ. މެދުކެނޑުމެއްނެތި ފަސް އަހަރަށްވުރެ ގިނަ ދުވަހު ކުރި މަސައްކަތަށްފަހު، 26 ޑިސެންބަރު 2025 ގައި މި ޓަނަލް ވަނީ ދަތުރުފަތުރަށް ހުޅުވާލާފައެވެ. މި ބިޔަ މަޝްރޫއަށް 46.7 ބިލިއަން ޔުއާން (ގާތްގަނޑަކަށް 6.6 ބިލިއަން އެމެރިކާ ޑޮލަރު) ޚަރަދުވިއެވެ. މިއީ ޝިންޖިއާން އުއިގޫރް އޮޓޮނޮމަސް ރީޖަންގެ ޑިޕާޓްމަންޓް އޮފް ޓްރާންސްޕޯޓާއި، ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ (ސީސީސީސީ) ފަދަ ސަރުކާރުގެ ކުންފުނިތަކުން ކުރި އިންވެސްޓްމަންޓެކެވެ.
ޓިއަންޝާން ފަރުބަދައިގެ ބިމުގެ އަޑީގެ ހާލަތަށް ބަލާއިރު، މި މަޝްރޫއަށް އެތައް ބިލިއަން ޑޮލަރެއް ޚަރަދުވި ސަބަބު ސާފުވެއެވެ. އިންޖިނިއަރުން ސިފަކުރާ ގޮތުގައި މި ފަރުބަދަ ތޮރުފުމަކީ "ޖިއޮލޮޖިކަލް ހެލް" ނުވަތަ ބިމުގެ އަޑީގެ ނަރަކައަށް ވަނުން ފަދަ ކަމެކެވެ. ފަރުބަދައިގެ އެންމެ މަތިން ފެށިގެން 1,112 މީޓަރު އަޑިއަށް މި ޓަނަލް ކޮނެފައިވާއިރު، ބިމުގެ އަޑީގެ ޕްރެޝަރުގެ ސަބަބުން ކުއްލިއަކަށް ހިލަތައް ގޮވުން ފަދަ ނުރައްކާތަކާ މަސައްކަތްތެރިންނަށް ކުރިމަތިލާން ޖެހުނެވެ. އަދި މި ޓަނަލްގެ މަގު 16 ފޯލްޓް ލައިން ހުރަސްކުރެއެވެ.
ޗައިނާގެ ޝިންޖިއާންގައި ޓިއަންޝާން ވިކްޓަރީ ޓަނަލް (ޓިއަންޝާން ޝެންގްލީ ޓަނަލް) ކައިރި -- ސަން ފޮޓޯ
މީގެ މާނައަކީ، ހަރު ގްރެނައިޓް ހިލައިން ފެށިގެން ގޮސް، ކިސަޑަށް ބަދަލުވެ، ކުއްލިއަކަށް ޕްރެޝަރުގައި ފެންގަނޑުތައް ފަޅައިގެން ދިޔުން ފަދަ ކަންކަމާ ކުރިމަތިވުމެވެ.
ލަފާކުރި 10 އަހަރުގެ ބަދަލުގައި ފަސް އަހަރުން މި މަޝްރޫއު ނިންމުމަށްޓަކައި، ޗައިނާގެ އިންޖިނިއަރުން ވަނީ "ތްރީ-ޓަނަލް ޕެރެލަލް" ޑިޒައިނެއް ތައާރަފުކޮށްފައެވެ. އެއީ ދުއްވާ އުޅަނދުތަކަށް ޚާއްސަ ދެ ޓަނަލްގެ މެދުގައި ޕައިލެޓް ޓަނަލްއެއް ހެދުމެވެ. މިކަމަށްޓަކައި ޚާއްސަކޮށްގެން ހެދި 280 މީޓަރު ދިގު ޓަނަލް ބޯރިން މެޝިން (ޓީބީއެމް) ބޭނުންކޮށްގެން މެދު ޓަނަލް ވަރަށް ހަލުވިކަމާއެކު ކޮނެ، އެ ޓަނަލްގެ ތެރެއިން އަރިމަތީ ޓަނަލްތަކަށް ވަދެވޭނެ މަގުތައް ހަދައި، އެއްފަހަރާ 14 ދިމާލަކުން މައި ޓަނަލްތައް ކޮނުމުގެ މަސައްކަތް ކުރިއަށް ގެންދިޔައެވެ.
މި ދަތުރުގައި އަޅުގަނޑަށް ލިބުނު އެންމެ ޚާއްސަ އެއް ފުރުސަތަކީ ޓިއަންޝާން ވިކްޓަރީ ޓަނަލް މޮނިޓަރިން ސެންޓަރަށް ޒިޔާރަތްކުރުމެވެ. ބާވީސް ކިލޯމީޓަރުގެ ބަންދުވެފައިވާ ސަރަހައްދެއްގެ ތެރެއިން ދަތުރުކުރާއިރު ސަލާމަތީ ފިޔަވަޅުތައް ވަރުގަދަވާން ޖެހެއެވެ. ކޮންޓްރޯލް ރޫމްގެ އެތެރޭގައި ހުރި ބޮޑެތި ޑިޖިޓަލް ސްކްރީންތަކުން ޓަނަލްގެ ކޮންމެ މީޓަރެއް ވަގުތުން ވަގުތަށް ފެންނަން ހުރެއެވެ. އެތަނުގެ އޮފިޝަލުން ކިޔައިދެއްވި ގޮތުގައި، އެ މަރުކަޒުގައި ބޭނުންކުރަނީ އިންސާނުންގެ ތަޖުރިބާއާއި އާޓިފިޝަލް އިންޓެލިޖެންސް (އޭއައި) ގުޅިގެން މަސައްކަތްކުރާ 24 ގަޑިއިރުގެ ހައިބްރިޑް މޮނިޓަރިން ނިޒާމެކެވެ.
އޭއައިގެ އެހީގައި މަސައްކަތްކުރާ ސެންސަރުތަކާއި ސްމާޓް ކެމެރާތަކުގެ ވިއުގައަކުން ވައިގެ ސާފުމިނާއި، އުޅަނދުތަކުގެ ދުވެއްޔާއި، ފިނިހޫނުމިނުގެ އިތުރުން ފަރުބަދައިގެ ހިލަތަކަށް އަންނަ ކުދި ބަދަލުތައްވެސް ދެނެގަނެއެވެ. އުޅަނދެއް ހުއްޓުމަކަށް އަތުވެއްޖެނަމަ، ނުވަތަ ވައިގެ ސާފުމިން ދަށްވެއްޖެނަމަ، ނުވަތަ އާދަޔާޚިލާފު ކަމެއް ފާހަގަކުރެވިއްޖެނަމަ، އޭއައި ނިޒާމުން ވަގުތުން އެކަން އަންގައިދެއެވެ. މިއާއެކު، ޖެޓް-ފޭން ވެންޓިލޭޝަންގެ ސްޕީޑް ބަދަލުކުރުމާއި، ޑިޖިޓަލް ބޯޑުތަކުގެ މެސެޖު ބަދަލުކުރުން، ނުވަތަ އިމަޖެންސީ ޓީމުތައް ފޮނުވުން ފަދަ ކަންކަން ސިކުންތުކޮޅެއްގެ ތެރޭގައި އިންސާނީ އޮޕަރޭޓަރުންނަށް ކުރެވެއެވެ.
ޗައިނާގެ ޝިންޖިއާންގައި ޓިއަންޝާން ވިކްޓަރީ ޓަނަލް (ޓިއަންޝާން ޝެންގްލީ ޓަނަލް) އަށް ވަންނަންދާ ޓްރަކެއް -- ސަން ފޮޓޯ
މި މަޝްރޫއުގެ ސަބަބުން އައިސްފައިވާ ބަދަލުތައް ވަރަށް ފުރިހަމައެވެ. ކުރިން ފަރުބަދަމަތިން ކުރަންޖެހުނު ވަރުބަލިކުރުވަނިވި އަދި ނުރައްކާތެރި ހަތް ގަޑިއިރުގެ ދަތުރު މިހާރު ވަނީ 3.5 ގަޑިއިރަށް ކުރުވެފައެވެ. އެއަށްވުރެ ބޮޑަށް ހައިރާންކުރުވަނިވި ކަމަކީ، ޓިއަންޝާން ފަރުބަދަ ހުރަސްކުރުމަށް ކުރިން އެތައް ގަޑިއިރެއް ވަންދެން ބިރުވެރިކަމާއެކު ދުއްވަންޖެހުނު ނަމަވެސް، މިހާރު އެ ދަތުރު އަމާންކަމާއެކު އެންމެ 20 މިނެޓުން ކުރެވޭކަމެވެ.
މިއީ އެ ސަރަހައްދުގެ ރައްޔިތުންނަށް އައި ވަރަށް ބޮޑު އިންގިލާބެކެވެ. މީގެ ސަބަބުން ކާރުޚާނާތަކުގެ ލޮޖިސްޓިކްސް ޚަރަދު ކުޑަވެ، ދަނޑުވެރިކަން ކުރާ ސަރަހައްދުތަކުގެ މެދުގައި ކާބޯތަކެތި ސަޕްލައިކުރުން ޔަގީންވެ، އަދި މެދުތެރޭ ޝިންޖިއާންގެ ފަރުބަދަމަތީގެ ރީތި މަންޒަރުތައް ފަތުރުވެރިންނަށް ރައްކާތެރިކަމާއެކު ބަލައިލުމުގެ ފުރުސަތު ހުޅުވިގެންދިޔައެވެ.
ޗައިނާގެ ޝިންޖިއާންގައި ޓިއަންޝާން ވިކްޓަރީ ޓަނަލް (ޓިއަންޝާން ޝެންގްލީ ޓަނަލް) އެތެރެއާއި ބޭރު -- ސަން ފޮޓޯ
ޓަނަލްގެ ދޮރޯށި ކައިރީގައި ހުރެ، ފަރުބަދައިގެ ތެރެއަށް އުޅަނދުތައް ވަދެގެންދާ މަންޒަރު ބަލަން ހުރިއިރު، އިންސާނުންގެ ހުނަރުވެރިކަމާމެދު އަޖައިބުވިއެވެ. ޓިއަންޝާން ވިކްޓަރީ ޓަނަލްއަކީ، އެކަހެރިކަމުގެ ބަދަލުގައި އީޖާދީ ވިސްނުން އިސްކޮށްފިނަމަ އިންސާނުންނަށް ހާސިލުކުރެވިދާނެ ކަންކަމުގެ ދިރިހުރި މިސާލެކެވެ. މިއީ އެއްވެސް ފަރުބަދައަކީ މާ އުސް ތަނެއް ނޫންކަމާއި، އެއްވެސް ވާދީއަކީ މާ ދުރު ތަނެއް ނޫންކަން ސާބިތުކޮށްދޭ ކޮންކްރީޓާއި ދަގަނޑުގެ ބިނާއެކެވެ.