އޮސްޓްރޭލިއާގެ ފުލުހުން ހިންގި އޮޕަރޭޝަނެއްގައި، އެ ގައުމުގެ ތާރީޚުގައި މިހާތަނަށް އަތުލައިގަތް އެންމެ ގިނަ އަދަދެއްގެ ކޮކެއިން އަތުލައިގެންފިއެވެ.
ސިޑްނީގެ ލަންޑަންޑެރީގައި ހުރި ބިމުއަޑީގެ ބަންކަރެއްގެ ތެރެއިން ފުލުހުން ވަނީ 2.7 ޓަނުގެ ކޮކެއިން އަތުލައިގަނެފައެވެ.
ފުލުހުން ބުނި ގޮތުގައި، މަގުމަތީގެ އަގުން ބަލާނަމަ 816 މިލިއަން އޮސްޓްރޭލިއަން ޑޮލަރު (433 މިލިއަން ޕައުންޑް ނުވަތަ 500 މިލިއަން ޔޫރޯ) އަށް އަރާ މި މަސްތުވާތަކެތި ހޯދާފައިވަނީ ހުކުރު ދުވަހުއެވެ. މި ތަކެތި ފޮރުވާފައި ހުރީ އެ ތަނުގައި ހުރި ތިން ޝިޕިން ކޮންޓެއިނަރެއްގެ ތަޅުންގަނޑުގެ އަޑީގައި ހަދާފައިވާ ސިއްރު ގޮޅިތަކެއްގައެވެ.
މި މައްސަލައާ ގުޅިގެން އުމުރުން 21 އަހަރާއި 25 އަހަރުގެ ދެ ފިރިހެނުން ވަނީ ހައްޔަރުކޮށްފައެވެ. ފުލުހުން ބުނި ގޮތުގައި، އެ މީހުން ހައްޔަރުކުރީ ފިލަން މަސައްކަތް ކުރަނިކޮށް އެ ސަރަހައްދުންނެވެ. ގަވާއިދާ ޚިލާފަށް އެތެރެކޮށްފައިވާ މަސްތުވާތަކެތީގެ ވިޔަފާރިކުރެވޭ މިންވަރެއް ގެންގުޅުމުގެ ދައުވާ އުފުލާފައިވާ މި ދެ މީހުން ހޮނިހިރު ދުވަހު ކޯޓަށް ހާޒިރުކުރުމުން ބަންދުގައި ބޭތިއްބުމަށް ވަނީ އަމުރުކޮށްފައެވެ. ކުށް ސާބިތުވެއްޖެނަމަ އެ މީހުންގެ މައްޗަށް އުމުރު ދުވަހުގެ ޖަލު ހުކުމެއް އައުން އެކަށީގެންވެއެވެ.
މަސްތުވާތަކެތި ހޯދާފައި ވަނީ ޝިޕިން ކޮންޓެއިނަރެއްގެ ތަޅުންގަނޑުގެ އަޑީގައި ހަދާފައިވާ ސިއްރު ގޮޅިތަކަކުން. ފޮޓޯ/އޭއެފްޕީ
ފުލުހުން މައުލޫމާތު ދިން ގޮތުގައި، މި ކޮކެއިން އޮސްޓްރޭލިއާއަށް އެތެރެކޮށްފައިވަނީ އިންތިޒާމުވެގެން ކުށްކުރާ ގްރޫޕެއްގެ އެންގުމުގެ މަތިން، އުތުރު ކުއީންސްލޭންޑްގެ ކުޑަ ރަށެއް ކަމަށްވާ މިޖް ޕޮއިންޓް މެދުވެރިކޮށެވެ. ލަންޑަންޑެރީގައި ހިންގި މި ރެއިޑަކީ "އޮޕަރޭޝަން މިންޖިއާން" ގެ ދަށުން ހިންގި ހަރަކާތެކެވެ. މި އޮޕަރޭޝަން ފަށާފައިވަނީ މިދިޔަ މެއި މަހު މިޖް ޕޮއިންޓްގެ ބޯޓުފަހަރު ބާލާ ސަރަހައްދުގެ މޫދުގައި އޮޔާދިޔަ 40 ކިލޯގެ ކޮކެއިން ފެނުމާ ގުޅިގެންނެވެ.
މި މައްސަލައިގެ ތަހުގީގުގެ ތެރެއިން، މިދިޔަ ހަފުތާގައި ކުއީންސްލޭންޑް އަދި ނިއު ސައުތު ވޭލްސްއިން އިތުރު ހަ މީހަކު ހައްޔަރުކޮށް ދައުވާ އުފުލާފައިވާ ކަމަށް ފުލުހުން ބުނެފައިވެއެވެ. މީގެ އިތުރުން، މި މަސްތުވާތަކެތި އެތެރެކުރުމުގައި ބޭނުންކުރި ކަމަށް ތުހުމަތުކުރެވޭ މައި ބޯޓު ސޮލޮމަން އައިލެންޑްސްގައި ވަނީ ހިފަހައްޓާފައެވެ.
ޔުނިވާސިޓީ އޮފް ނިއު ސައުތު ވޭލްސްއިން ހިންގާ ގަވާއިދާ ޚިލާފަށް އެތެރެކުރާ މަސްތުވާތަކެތި މޮނިޓާކުރާ ނިޒާމުގެ މައުލޫމާތުތަކާ ހަވާލާދީ ރިޕޯޓުކޮށްފައިވާ ގޮތުގައި، އޮސްޓްރޭލިއާއަކީ މަސްތުވާތަކެތީގެ ވިޔަފާރިއަށް ފައިދާބޮޑު މާކެޓެކެވެ. އެ ގައުމުގައި އާންމުގޮތެއްގައި ކޮކެއިން ގްރާމެއް 300 އޮސްޓްރޭލިއަން ޑޮލަރަށް ވިއްކައެވެ. އަދި އދ. ގެ މިދިޔަ އަހަރުގެ ވޯލްޑް ޑްރަގް ރިޕޯޓުން ދައްކާ ގޮތުގައި، ދުނިޔޭގައި އެންމެ ގިނައިން ކޮކެއިން ބޭނުންކުރާ މީހުންގެ ނިސްބަތް އުޅެނީ އޮސްޓްރޭލިއާ އަދި ނިއު ޒީލެންޑުގައެވެ.
އޮސްޓްރޭލިއަން ފެޑެރަލް ޕޮލިސް (އޭއެފްޕީ) ގެ ކޮމާންޑާ ސްޓީވަން ޖޭ ވިދާޅުވި ގޮތުގައި، މި ހާދިސާއިން ދައްކުވައިދެނީ ކުށްކުރާ ނެޓްވޯކްތަކުގެ އިންތިޒާމުތައް ވަރުގަދަކަމާއި، ފައިދާ ހޯދުމަށްޓަކައި އެ މީހުން ކޮންމެފަދަ ކަމެއްވެސް ކޮށްފާނެ ކަމެވެ. މަސްތުވާތަކެތީގެ އަސްލު ހޯދުމުގެ ތަހުގީގުތައް އަދިވެސް ކުރިއަށްދާ ކަމަށާއި، މިކަމުގައި ޝާމިލުވާ ކުށްކުރާ ގްރޫޕްތަކާއި އެހެނިހެން ފަރާތްތައް ހޯދުމަށް ގައުމީ އަދި ބައިނަލްއަގުވާމީ އިދާރާތަކާ ގުޅިގެން މަސައްކަތްކުރަމުންދާ ކަމަށް އޭނާ ވިދާޅުވިއެވެ.