ކަނޑުމަގުން ރާއްޖެއިން ބޭރަށް މުދާ ފޮނުވުމުގައި، ބޯޓު ފުރުމުގެ ކުރިން ފުރިހަމަކުރަންޖެހޭ ކްލިއަރެންސް މަރުހަލާތަކަށް އެވްރެޖްކޮށް 10 ދުވަހާއި، 10 ގަޑިއިރާއި، 14 މިނެޓު ހޭދަވާކަމަށް މޯލްޑިވްސް ކަސްޓަމްސް ސާވިސްއިން ހާމަކޮށްފިއެވެ.
މިކަން ހާމަވެފައިވަނީ ކަސްޓަމްސްއިން އެކުލަވާލާފައިވާ "ޓައިމް ރިލީޒް ސްޓަޑީ 2025" ގައެވެ.
މި ދިރާސާގައި މުދާ ބޭރުކުރުމުގެ މަރުހަލާގެ ވަގުތު ބަލާފައިވަނީ ކަސްޓަމްސް ޑިކްލަރޭޝަން ހުށަހަޅާ ވަގުތުން ފެށިގެން، މުދާ ބަރުކޮށްގެން ބޯޓު ފުރާ ވަގުތާ ހަމައަށެވެ. ކަސްޓަމްސްގެ އޮފިޝަލުން ފާހަގަކުރައްވާ ގޮތުގައި، މި ހޯދުންތަކުގެ އަލީގައި އިދާރީ އިސްލާހުތަކާއި ޑިޖިޓަލް ނިޒާމުތައް މެދުވެރިކޮށް މުދާ ފޮނުވުމުގައި ހިނގާ ވަގުތު ކުރުކުރެވޭނެ ގޮތްތައް ދެނެގަނެވޭނެއެވެ.
ދިރާސާއިން ދައްކާ ގޮތުގައި، ޑިކްލަރޭޝަން ހުށަހެޅުމުން ފެށިގެން އެސެސްމަންޓްގެ މަސައްކަތް ނިމުމާ ހަމައަށް ގާތްގަނޑަކަށް 15 ގަޑިއިރާއި ހަ މިނެޓު ހޭދަވެއެވެ. އަދި ފައިސާ ދެއްކުމުގެ މަރުހަލާއަށް އިތުރު 17 ގަޑިއިރާއި 31 މިނެޓު ހޭދަވެއެވެ.
އެހެންކަމުން، އޮޕަރޭޝަނަލް މަރުހަލާތައް ކަމަށްވާ އޮފް-ޝޯ ރިކުއެސްޓާއި، އިންސްޕެކްޝަން އަދި މުދާ ބަރުކުރުމުގެ މަސައްކަތްތައް ފެށުމުގެ ކުރިން ހިނގާ އިދާރީ ކަންކަމަށް އެކަނިވެސް އެއް ދުވަހަށްވުރެ ގިނަ ވަގުތު ހޭދަވެއެވެ.
މި ތަފާސްހިސާބުތަކުން އެނގޭ ގޮތުގައި "އޮފް-ޝޯ ރިކުއެސްޓް" އަދި އެކަމަށް ހުއްދަ ހޯދުމުގެ މަރުހަލާއަކީ އެކްސްޕޯޓް ސިލްސިލާގައި ބޮޑު ލަސްތަކެއް ކުރިމަތިވާ ކަމެކެވެ.
ފައިސާ ދެއްކުމަށްފަހު އޮފް-ޝޯ ރިކުއެސްޓާ ހަމައަށް އެވްރެޖްކޮށް އެއްދުވަހާއި، 16 ގަޑިއިރާއި، 55 މިނެޓު ހޭދަވާއިރު، އެ ރިކުއެސްޓަށް ހުއްދަ ލިބުމަށް އިތުރު އެއް ދުވަހާއި، ނުވަގަޑިއިރާއި، 47 މިނެޓު ހޭދަވެއެވެ.
މުދާ ބަލައި ފާސްކުރުމުގެ މަރުހަލާއަކީ ވެސް ގިނަ ވަގުތު ހޭދަވާ ކަމެކެވެ. ސަރުކާރުގެ އެކި އިދާރާތަކުން ކުރަންޖެހޭ އިންސްޕެކްޝަންތައް ނިންމުމަށް އެވްރެޖްކޮށް އެއް ދުވަހާއި، ނުވަ ގަޑިއިރާއި، 35 މިނެޓު ހޭދަވެއެވެ. މިއީ ބަނދަރުގައި ހަރަކާތްތެރިވާ އެކި މުއައްސަސާތަކުގެ މެދުގައި މަސައްކަތްތައް ވިލަރެސްކުރުމަށް ހޭދަވާ ވަގުތެވެ.
ލިޔެކިޔުންތަކާއި އިންސްޕެކްޝަން ނިމުމުން، ދެން އޮންނަނީ ބުކިންގް ހުއްދަ ހޯދުމާއި މުދާ ބަރުކުރުމުގެ މަރުހަލާއެވެ. ބުކިން ފޯމަށް ހުއްދަ ލިބުމަށް ގާތްގަނޑަކަށް އެއް ދުވަހާއި، 13 ގަޑިއިރާއި، 57 މިނެޓު ހޭދަވާއިރު، މުޅި ސިލްސިލާގައި އެންމެ ގިނަ ވަގުތު ހޭދަވަނީ އެންމެ ފަހު މަރުހަލާ ކަމަށްވާ މުދާ ބަރުކޮށް ބޯޓު ފުރާ ވަގުތާ ހަމައަށެވެ. މި މަރުހަލާއަށް އެކަނިވެސް ދެ ދުވަހާއި، 12 ގަޑިއިރާއި، ތިން މިނެޓު ހޭދަވެއެވެ.