ޕާކިސްތާނާއި އަފްޣާނިސްތާނު ގުޅޭ ސަރަހައްދީ ރޮނގު ކައިރިއަށް ޕާކިސްތާނުން ދިން ވަރުގަދަ ވައިގެ ހަމަލާތަކެއްގައި ގިނަ ބަޔަކު މަރުވެއްޖެއެވެ.
މި ހަމަލާތަކާއެކު، ފާއިތުވި މަސްތަކުގައި އެ ސަރަހައްދުގައި އޮތް އަމާންކަން ވަނީ ގެއްލިފައެވެ.
ޕާކިސްތާނުގެ އިންފޮމޭޝަން މިނިސްޓަރު އަތާއުﷲ ތަރާރު ވިދާޅުވި ގޮތުގައި، ހަތަރު އަމާޒަކަށް ދިން މި ހަމަލާތަކުގައި 26 ހަނގުރާމަވެރިން ވަނީ މަރާލާފައެވެ. އޭނާ ވިދާޅުވީ މިއީ ފަހަކަށް އައިސް ޕާކިސްތާނުގައި ހިނގި ޓެރަރިސްޓް ހާދިސާތަކަށް ރައްދުދިނުމުގެ ގޮތުން ދިން ހަމަލާތަކެއް ކަމަށެވެ. މި ހަމަލާތައް ދީފައިވަނީ ޕެޝާވަރު ކައިރީގައި ސަލާމަތީ ބާރުތަކަށް އަމާޒުކޮށް ދިން ހަމަލާއެއްގައި ޕާކިސްތާނުގެ މަދުވެގެން ހަ އޮފިސަރުން މަރުވިތާ އެއް ދުވަސް ފަހުންނެވެ. ތަރާރު ވިދާޅުވި ގޮތުގައި ވައިގެ ހަމަލާތައް އަމާޒުކުރީ ސަރަހައްދީ ރޮނގު ކައިރީގައި ހުރި ހަނގުރާމަވެރިންގެ ފިލާތިބޭ ތަންތަނަށާއި، ތަމްރީނުދޭ މަރުކަޒެއްގެ އިތުރުން ހަތިޔާރު ރައްކާކުރާ ގުދަނަކަށެވެ.
"ސަރަހައްދުގެ ސުލްހައާއި ހަމަޖެހުން ދެމެހެއްޓުމަށް ޕާކިސްތާނުން އަބަދުވެސް މަސައްކަތްކުރޭ. ނަމަވެސް ހަމައެއާއެކު އަޅުގަނޑުމެންގެ ރައްޔިތުންގެ ސަލާމަތާއި ރައްކާތެރިކަމަކީ އަޅުގަނޑުމެން އެންމެ އިސްކަންދޭ ކަންތައް." ތަރާރު ވިދާޅުވިއެވެ.
އަފްޣާނިސްތާނުގެ ކުނާރު ޕްރޮވިންސްގެ ޝުލްތާން ޑިސްޓްރިކްޓަށް ޕާކިސްތާނުން ދިން ހަމަލާއެއްގައި ހަލާކުވެފައިވާ ގެއެއްގެ ތެރެއިން މީހުން ހޯދަނީ. ފޮޓޯ/އޭއެފްޕީ
ޕާކިސްތާނަށް ހަމަލާދޭ ޓެރަރިސްޓުންނަށް އަފްޣާނިސްތާނުން ހިމާޔަތްދޭ ކަމަށް ޕާކިސްތާނުން އަބަދުވެސް ތުހުމަތުކުރެއެވެ.
ނަމަވެސް އަފްޣާނިސްތާނުގެ ތާލިބާނު ސަރުކާރުން ވަނީ މި ތުހުމަތުތައް ދޮގުކޮށްފައެވެ.
ތާލިބާނު ސަރުކާރުގެ ތަރުޖަމާނު ޒަބީހުﷲ މުޖާހިދު ވިދާޅުވި ގޮތުގައި، ކުނާރު، ޚޯސްޓް އަދި ޕަކްޓިކާ ޕްރޮވިންސަށް ޕާކިސްތާނުން ދިން ހަމަލާތަކުގައި 13 މީހުން ވަނީ މަރުވެފައެވެ. އޭގެ ތެރޭގައި ހިމެނެނީ 11 ކުޑަކުދިންނާއި، އަންހެނެއްގެ އިތުރުން އުމުރުން ދުވަސްވީ ފިރިހެނެއް ކަމަށް އޭނާ ވިދާޅުވިއެވެ. އަދި މި ހަމަލާތަކުގައި 14 އަންހެނުންނާއި ކުޑަކުދިން ޒަޚަމްވެފައިވާ ކަމަށްވެސް މުޖާހިދު ވިދާޅުވިއެވެ.
އަފްޣާނިސްތާނުގެ ބިމަކީ އެހެން ގައުމުތަކަށް ނުރައްކާކުރުމަށް ބޭނުންކުރާނެ ތަނެއް ނޫން ކަމަށް އެ ގައުމުން ވަނީ ތަކުރާރުކޮށް ބުނެފައެވެ.
ދެ ގައުމުގެ ދެމެދުގައިވާ 2،600 ކިލޯމީޓަރުގެ ދިގު ސަރަހައްދީ ރޮނގުގައި ހިނގި ގިނަ ކުރިމަތިލުންތަކަކަށްފަހު، މިދިޔަ އޮކްޓޯބަރު މަހު ދެ ގައުމުން ވަނީ ހަމަލާތައް މެދުކަނޑާލުމަށް އެއްބަސްވެފައެވެ. ނަމަވެސް ފެބްރުއަރީ މަހުގެ ފަހުކޮޅު ތާލިބާނުން ވަނީ ސަރަހައްދީ ރޮނގު ކައިރީގައިވާ ޕާކިސްތާނުގެ އަސްކަރީ މަރުކަޒުތަކަކަށް ހަމަލާދީފައެވެ. މީގެ ރައްދުގައި ޕާކިސްތާނުން ކާބުލް، ކަންދަހާރު އަދި ޕަކްޓިކާ ޕްރޮވިންސަށް ދިން ބޮމުގެ ހަމަލާތަކުގައި އެތައް ބަޔަކު މަރުވިއެވެ.
މީގެ އިތުރުން، އދ. ގެ ރިޕޯޓެއްގައިވާ ގޮތުން މާޗް 16 ވަނަ ދުވަހު ޕާކިސްތާނުން ކާބުލްގައި ހުންނަ އޮމިޑް ޑްރަގް ރިހެބިލިޓޭޝަން ހޮސްޕިޓަލަށް ދިން ވައިގެ ހަމަލާއެއްގައި މަދުވެގެން 269 މީހުން ވަނީ މަރުވެފައެވެ. މިއީ ތާލިބާނުންނާއި، ނޭޓޯ އަދި އަފްޣާނިސްތާނުގެ ސަލާމަތީ ބާރުތަކާ ދެމެދު ކުރެވުނު 20 އަހަރުވީ ހަނގުރާމައިގެ ތެރޭގައިވެސް ހިނގާފައިނުވާ ފަދަ، އަފްޣާނިސްތާނުގެ ފަހުގެ ތާރީޚުގައި ދެވުނު އެންމެ ނުރައްކާތެރި އެއް ހަމަލާއެވެ.