ޔޫރަޕްގެ ފަސްގަނޑެއްގައި ބަންގްލަދޭޝްއިން ކުޅުނު ފުރަތަމަ ބައިނަލްއަގުވާމީ މެޗުން، ޑިފެންޑަރު ޓޯޕޫ ބަރްމަންގެ ދެ ލަނޑާއެކު ސެން މަރީނޯގެ މައްޗަށް 2-1 އިން ބަންގްލަދޭޝްއިން ތާރީޚީ ކާމިޔާބީއެއް ހޯދައިފިއެވެ.
ސެން މަރީނޯގެ ސެރަވަލޭގައި ހުންނަ ސެން މަރީނޯ ސްޓޭޑިއަމްގައި ކުޅުނު މި ރަހުމަތްތެރިކަމުގެ މެޗަކީ މި ދެ ގައުމުގެ ދެމެދުގައި ކުޅވުނު ފުރަތަމަ މެޗެވެ.
މީގެއިތުރުން، މިއީ ބަންގްލަދޭޝްގެ ގައުމީ ޓީމާ އަލަށް ހަވާލުވި ހެޑް ކޯޗު ތޯމަސް ޑޫލީގެ އިރުޝާދުގެ ދަށުން އެ ޓީމު ކުޅުނު ފުރަތަމަ މެޗުވެސް މެއެވެ.
ސެން މަރީނޯއާއި ބަންގްލަދޭޝް ކުޅުނު މެޗުގެ ތެރެއިން--
ކުރީގެ ކޯޗު ހާވިއޭ ކަބްރޭރާގެ އިރުޝާދުގެ ދަށުން ގިނަ މެޗުތަކެއްގައި ބެންޗުން ފެނުނު ކެޕްޓަން ޖަމާލް ބުޔާން މި މެޗުގެ ފެށި އެގާރައިގައި ހިމެނުނުއިރު، ވިންގަރު ރަފީގުލް އިސްލާމްވެސް ވަނީ ފުރަތަމަ އެގާރައިގައި ކުޅެފައެވެ. ޝަމިތު ޝޯމް، ބިޝްވަނާތު ގޯޝް އަދި ކީޕަރު އަނިސުރް ރަހްމާން ޒީކޯ ފެށީ ބެންޗުންނެވެ.
މެޗުގެ ފުރަތަމަ ލަނޑު ޖަހާ ލީޑުނެގީ ބަންގްލަދޭޝްއިންނެވެ. މެޗުގެ 19 ވަނަ މިނެޓުގައި ޝެއިޚް މުރްސަލީން ނަގައިދިން ހުރަހަކުން ބޮލުން ފޮނުވާލި ހަމަލާއެއްގައި ބަންގްލަދޭޝްއަށް ލީޑު ހޯދައިދިނީ ޓޯޕޫއެވެ. މިއީ ޔޫރަޕްގެ ފަސްގަނޑެއްގައި ބަންގްލަދޭޝްއިން ކާމިޔާބުކުރި ފުރަތަމަ ބައިނަލްއަގުވާމީ ލަނޑެވެ.
ނަމަވެސް، މެޗުގެ 31 ވަނަ މިނެޓުގައި ސަން މަރީނޯއިން ވަނީ ލަނޑެއް ޖަހާ މެޗުގެ ނަތީޖާ ހަމަހަމަކޮށްފައެވެ. ފިލިއްޕޯ ބެރާޑީ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ނިކޮލަސް ޖިއަކޮޕެއްޓީއެވެ.
ކެޕްޝަން..
މެޗު އެއްވަރުވެގެން ނިމެން ދަނިކޮށް، ބަންގްލަދޭޝް މޮޅުކޮށްދިން ލަނޑު ޓޯޕޫ ކާމިޔާބުކުރީ 86 ވަނަ މިނެޓުގައެވެ. ހަމްޒާ ޗައުދަރީ ފޮނުވާލި ހިލޭ ޖެހުމަކުން ބެންޗުން ކުޅެން އެރި ބިޝްވަނާތު ގޯޝް އޭރިއާ ތެރެއަށް ހުރަސްކޮށްލި ބޯޅަ، ޓޯޕޫ ވަނީ ބޮލުން ގޯލުގެ ތެރެއަށް ފޮނުވާލާފައެވެ. މި ލަނޑާއެކު އޭނާގެ ދެވަނަ ލަނޑު ހަމަކޮށް، ޖާޒީ ބާލައިގެން އޭނާ ވަނީ ވަރަށް ބޮޑަށް އުފާފާޅުކޮށްފައެވެ.
ޔޫރަޕްގެ ފަސްގަނޑުގައި ކުޅުނު ފުރަތަމަ މެޗުން ހޯދި މި ތާރީޚީ މޮޅަށްފަހު، ބަންގްލަދޭޝް ޓީމު އެނބުރާ ގައުމަށް ދިއުމަށް ފުރުމަށް ހަމަޖެހިފައިވަނީ ހޮނިހިރު ދުވަހުއެވެ.