ފީފާ ވޯލްޑް ކަޕް 2026 އާ ދިމާކޮށް، ފީފާ އާއި ނެޓްފްލިކްސް ގޭމްސް ގުޅިގެން "ފީފާ ވޯލްޑް ކަޕް: ލޯންޗް އެޑިޝަން" ގެ ނަމުގައި ފުޓްބޯޅަ ގޭމެއް ނެރުމަށް ނިންމާ އެކަން ރަސްމީކޮށް އިއުލާންކޮށްފިއެވެ.
މި ގޭމް އެންމެ ފުރަތަމަ ކުޅެން ލިބޭނީ ޖޫން މަހުގެ 11 ވަނަ ދުވަހު ކަމަށްވާއިރު، މިއީ މުބާރާތް ފެށޭ ދުވަސް ވެސް މެއެވެ.
ނެޓްފްލިކްސްގެ ސަބްސްކްރައިބަރުންނަށް އެއްވެސް އިތުރު ފީއަކާ ނުލައި މި ގޭމް ކުޅުމުގެ ފުރުސަތު ލިބިގެންދާނެއެވެ.
މި ފަހަރުގެ ގޭމް ފަރުމާކޮށްފައިވަނީ ގޭމް ކުޅުމުގެ މާ ބޮޑު ތަޖުރިބާއެއް ނެތް މީހުންނަށްވެސް ފަސޭހައިން ކުޅެވޭނެ ގޮތަށެވެ. މި ގޭމްގައި މުބާރާތުގައި ވާދަކުރާ 48 ގައުމީ ޓީމާއި، ރަސްމީ 16 ސްޓޭޑިއަމްގެ އިތުރުން 1،200 އަށްވުރެ ގިނަ ކުޅުންތެރިން ހިމަނާފައިވެއެވެ.
ކުޅުންތެރިންނަށް އެމީހަކު ބޭނުންވާ ގައުމީ ޓީމެއް އިޚްތިޔާރުކޮށްގެން ވޯލްޑް ކަޕްގެ މެޗުތައް ކުޅެލުމުގެ ފުރުސަތު މީގެއިން ލިބޭނެއެވެ.
މި ގޭމްގެ އެންމެ ޚާއްޞަ އެއް ސިފައަކީ ފޯނު ބޭނުންކޮށްގެން ކޮންޓްރޯލް ކުރެވޭ ގޮތަށް ހަދާފައިވާ ނިޒާމެވެ. ސްމާޓް ޓީވީއަކުން ގޭމް ހުޅުވުމަށްފަހު، ސްކްރީނަށް އަރާ ކިއުއާރް ކޯޑް ފޯނުން ސްކޭންކޮށްލުމުން ގޭމްގެ ކޮންޓްރޯލަރަކަށް ފޯނު ބަދަލުވެގެންދާނެއެވެ. މިގޮތަށް ފޯނު މެދުވެރިކޮށް ޕާސްދިނުމާއި، ގޯލަށް ޝޫޓްކުރުން ފަދަ ކަންކަން ފަސޭހަކަމާއެކު ކުރެވޭނެއެވެ.
އާއިލާ ނުވަތަ ރައްޓެހިންނާއެކު އެއްތަނެއްގައި ތިބެގެން ކުޅެވޭ "ލޯކަލް މަލްޓިޕްލޭޔާ" ސަޕޯޓްވެސް މި ގޭމްގައި ހިމެނެއެވެ. އެގޮތުން އެއް މެޗެއްގައި އެއްފަހަރާ ހަތަރު ކުޅުންތެރިންނަށް ވާދަކޮށްލެވޭނެއެވެ.
ފީފާއިން ބޭއްވި ޕްރެސް އެއްގައި ހާމަކުރި ގޮތުގައި މިހާރު ނެރޭ އެޑިޝަނަކީ ބޭސިކް އެޑިޝަނެއް ކަމަށްވިޔަސް، ކުރިއަށް އޮތް ތަނުގައި ގޭމް އިތުރަށް ފުރިހަމަކޮށް އާ ފީޗާތައް އަޕްޑޭޓްތަކުގެ ގޮތުގައި ނެރެމުންދާނެއެވެ.
ނެޓްފްލިކްސް އިން ފުޓްބޯޅަ ގޭމެއް ތައާރަފްކުރި މިއީ ފުރަތަމަ ފަހަރު ކަމަށްވާއިރު، މިއީ ފީފާ އާއި އީއޭ ސްޕޯޓްސްއާ ދެމެދު އޮތް ޒަމާންވީ ޕާޓްނަޝިޕް ނިމުމަކަށް އައިފަހުން ފީފާއިން އެހެން ކުންފުންޏަކާ ގުޅިގެން ނެރުނު ފުރަތަމަ ބޮޑު ގޭމެވެ.
ފީފާއިން މިހާރު ގެންގުޅޭ ޑިޖިޓަލް ސްޓްރެޓެޖީގެ ދަށުން، ގޭމިން މާކެޓުގައި އެކި ފަންތީގެ ކުޅުންތެރިންނަށް ވާސިލްވުމަށްޓަކައި މޮބައިލް އަދި ސްޓްރީމިން ޕްލެޓްފޯމްތަކަށް ޚާއްޞަ ސަމާލުކަމެއް ދޭން ވަނީ ފަށާފައެވެ.
އަނެއްކޮޅުން ނެޓްފްލިކްސް އިންވެސް ދަނީ ފިލްމާއި ސީރީޒްތަކުގެ އިތުރުން، އެކުންފުނީގެ ސަބްސްކްރައިބަރުން ހިފެހެއްޓުމަށާއި އާ ކަސްޓަމަރުން ހޯދުމަށްޓަކައި "ނެޓްފްލިކްސް ގޭމްސް" ގެ ކެޓަލޮގް ވަރުގަދަކޮށް، ދުނިޔޭގެ މަޝްހޫރު ބްރޭންޑްތަކުގެ ގޭމްތައް އެ ޕްލެޓްފޯމަށް ގެނައުމަށް ބޮޑެތި އިންވެސްޓްމަންޓްތަކެއް ކުރަމުންނެވެ.