މަގުބޫލު އެމެރިކަން އެކްޝަން ޑްރާމާ "ޓޮޕް ގަން: މެވަރިކް"ގެ އެކްޓަރު ޖޭމްސް ހޭންޑީ އޭނާގެ ގޭގައި މަރާލާފައި އޮއްވާ ފެނިއްޖެއެވެ.
އުމުރުން 81 އަހަރުގެ އެކްޓަރަށް، ކެލިފޯނިއާގައި ހުންނަ އޭނާގެ ގޭގައި ވަޅިން ހަމަލާދީ މަރާލާފައި އޮއްވާ ފެނުނީ މިދިޔަ ބުދަ ދުވަހެވެ. ޖޭމްސް ހޭންޑީ މަރުވެފައިވާކަން އެކްޓަރުގެ މަންދޫބަކު ކަށަވަރުކޮށްދީފައިވާއިރު، ލޮސް އެންޖެލިސް ފުލުހުންގެ ޑިޕާޓްމަންޓުން ހާމަކުރި ގޮތުގައި، މި މަރުގެ ތުހުމަތުގައި ހޭންޑީގެ ލޯބިވެރިޔާގެ ދަރިފުޅު، އުމުރުން 44 އަހަރުގެ މައިކަލް ގްލެޑްހިލް ވަނީ ހައްޔަރުކޮށްފައެވެ.
ފުލުހުން ބުނި ގޮތުގައި، އެމަޖެންސީ ނަންބަރު 911އަށް މީހަކު ގުޅައި، ރިޕޯޓްކުރުމާ ގުޅިގެން ފުލުހުން ވަނީ އެ ސަރަހައްދަށް ގޮސްފައެވެ. ފުލުހުން އެ ސަރަހައްދަށް ދިޔުމުން، ގްލެޑްހިލް އަމިއްލައަށް ފުލުހުންގެ ގާތަށް ގޮސްފައިވާ ކަމަށާއި ފުލުހުން ހޯދަމުންދާ މީހަކީ އެއީކަން ބުނެދީފައިވާ ކަމަށް ރިޕޯޓުތަކުން ބުނެއެވެ.
ކަމާބެހޭ ފަރާތްތަކުން ބުނި ގޮތުގައި، ގްލެޑްހިލް ދިރިއުޅެމުން ދިޔައީ އޭނާގެ މަންމައާއެކު އެއް ގެއެއްގައެވެ. އޭނާގެ މަންމަ އަކީ ޖޭމްސް ހޭންޑީއާ ގާތް ގުޅުމެއް އޮންނަ މީހެކެވެ. މައިކަލް ގްލެޑްހިލް ހައްޔަރުކުރުމަށްފަހު، އޭނާގެ މައްޗަށް މިހާރު ވަނީ މަރުގެ ދައުވާ އުފުލާފައެވެ.
ޖޭމްސް ހޭންޑީ ފިލްމު "ޖުމާންޖީ"ގެ މަންޒަރެއްގައި--ފޮޓޯ/ޓެލެގްރާފްއިންޑިއާ
އެމެރިކާގެ މުނިފޫހިފިލުވުމާ ބެހޭ މަޖައްލާއެއް ކަމަށްވާ "ޕީޕަލް"އިން ރިޕޯޓްކޮށްފައިވާ ގޮތުގައި، މި ހާދިސާ ތަހުގީގު ކުރުމަށްޓަކައި ފުލުހުން ވަނީ ހޭންޑީގެ ގޭގެ ވަށައިގެންވާ މަގުތައް ބަންދުކޮށްފައެވެ. މީގެ އިތުރުން، އެ ސަރަހައްދުގެ ގޭގެއަށް ގޮސް މައުލޫމާތު ސާފުކުރުމުގެ މަސައްކަތްވެސް ފުލުހުން ވަނީ ކޮށްފައެވެ.
ފިލްމު "ޓޮޕް ގަން: މެވަރިކް"ގެ އިތުރުން ހޭންޑީ މުހިއްމު ރޯލްތައް ކުޅުނު ފިލްމުތަކުގެތެރޭ، "ޖުމާންޖީ"، "އެރެކްނޯފޯބިއާ"، "ލޯގަން"، "އެންވައިޕީޑީ ބްލޫ" އަދި "ކްރިމިނަލް މައިންޑްސް" ފަދަ މަޝްހޫރު ގިނަ ފިލްމުތަކާއި ސީރީޒްތައް ހިމެނެއެވެ.