ބަރުދަން ލުއިކުރުމަށާއި ދުޅަހެޔޮ ސިއްހަތެއްގައި ހުރުމަށް މިހާރު އެންމެ އާންމުކޮށް މީހުން ކުރާ އެއް ކަމަކީ އިންޓަމިޓެންޓް ފާސްޓިން ނުވަތަ ވަކި ވަގުތުތަކެއްގައި ނުކައި ހުރުމެވެ. މިއީ ކާންވީ ކޮން އެއްޗެއްކަން ބުނެދޭ އުސޫލަކަށް ވުރެ ބޮޑަށް، ކާންވީ ކޮން ވަގުތެއްގައިކަން ކަނޑައަޅައިދޭ އުސޫލެކެވެ.
އާއިލީ ބަލިތަކާބެހޭ ޚާއްސަ ޑޮކްޓަރެއް ކަމަށްވާ ޑރ. ޖިލިއަން ފޯގްލްސޯން ސްޓެބިލް "ހެލްތުލައިން" އަށް ވިދާޅުވި ގޮތުގައި، މިއީ ބަރުދަން ލުއިކުރުމަށް އެހީތެރިވެދޭނެ ކަމެއް ނަމަވެސް، ގިނަ ބަޔަކަށް މިކަން ކުރާއިރު ހެދޭ ގޯސްތަކެއްގެ ސަބަބުން އެދެވޭ ނަތީޖާ ނުފެނިދެއެވެ.
އާންމުކޮށް މީހުން އަމަލުކުރާ ގޮތަކީ ދުވާލުގެ ވަކި ވަގުތެއްގައި ކެއުމަށްފަހު، ދެން ހުންނަ ވަގުތުތަކުގައި ނުކައި ހުރުމެވެ. މީގެ ތެރޭގައި އެންމެ މަގުބޫލު އެއް ގޮތަކީ 16 ގަޑިއިރު ނުކައި ހުރުމަށްފަހު، ބާކީ އޮންނަ އަށް ގަޑިއިރުގެ ތެރޭގައި ކެއުމެވެ. ނުވަތަ ރޭގަނޑު 12 ގަޑިއިރު ނުކައި ހުރުމެވެ. މިގޮތަށް އަމަލުކުރުމުން، ހަށިގަނޑަށް އެތެރެވާ ކެލަރީގެ މިންވަރު މަދުވެ، ލޭގައި އިންސިއުލިން ހުންނަ މިންވަރު ދަށްވެއެވެ. އޭގެ ނަތީޖާއެއްގެ ގޮތުން ހަށިގަނޑުގައި ރައްކާކުރެވިފައިވާ ފެޓް އަންދަން ފަށައެވެ. ނަމަވެސް، މިއީ ހަމަ ކޮންމެ މީހަކަށް އެންމެ ރަނގަޅު ގޮތެއް ނޫނެވެ.
ރައްކާތެރިކަމާއި ސިއްހީ ހާލަތްތައް
އިންޓަމިޓެންޓް ފާސްޓިން އަކީ ބައެއް މީހުންނަށް ފައިދާހުރި ކަމަކަށް ވިޔަސް، މިއީ އެންމެންނާ ގުޅޭ ކަމެއް ނޫންކަން ޑރ. ސްޓެބިލް ފާހަގަކުރެއްވިއެވެ. އެގޮތުން، މާބަނޑު މީހުންނާއި ގާތުންދޭ މައިންނަކީ ހަށިގަނޑަށް އިތުރު ހަކަތަ ބޭނުންވާ ބަޔަކަށް ވުމާއެކު، މިފަދަ އުސޫލަކަށް އަމަލުކުރުން ރައްކާތެރިއެއް ނޫނެވެ.
މީގެ އިތުރުން، އުމުރުން 18 އަހަރު ނުފުރޭ ކުދިންނާއި، ކެއުމުގެ އާދަތަކުގައި މައްސަލަ ހުންނަ ނުވަތަ އީޓިން ޑިސްއޯޑާސް ހުންނަ މީހުންވެސް މިކަމާ ދުރުހެލިވުމަށް ސިއްހީ މާހިރުން ލަފާދެއްވައެވެ. ބޮޑެތި ބަލިތަކަށް ބޭސްކުރާ މީހުންނަށްވެސް މިއީ ނުރައްކާތެރި ކަމަކަށް ވެދާނެއެވެ. ޚާއްސަކޮށް "ޓައިޕް 1 ޑައިބެޓީސް" ހުންނަ މީހުންނާއި، އިންސިއުލިން ބޭނުންކުރާ މީހުން ނުކައި ގިނައިރު ހުރުމަކީ ލޭގައި ހަކުރު ހުންނަ މިންވަރު ކުއްލިއަކަށް ދަށްވެ، ފުރާނައަށް ނުރައްކާވެދާނެ ކަމެކެވެ.
ހަމައެހެންމެ، ލޭމައްޗަށްދާ މީހުންނާއި ހިތުގެ ބަލިތަކަށް ބޭސްކުރާ މީހުންވެސް، ޑޮކްޓަރެއްގެ ލަފާގެ މަތިން މެނުވީ މިފަދަ ޑައިޓެއް ފެށުން ރަނގަޅެއް ނޫނެވެ. ކެއުން މަދުކުރުމުގެ ސަބަބުން ހަށިގަނޑަށް ބޭނުންވާ މުހިންމު މާއްދާތައް ނުލިބި، ބޭހުގެ އަސަރު ކުރުމަށް ހުރަސްއެޅުމަކީ އެކަށީގެންވާ ކަމެކެވެ.
އަންހެނުންނާއި ފިރިހެނުންގެ ތަފާތު
ފިރިހެނުންނާއި އަންހެނުންގެ ހަށިގަނޑު އުފެދިފައިވާ ގޮތާއި ހޯމޯންތައް މަސައްކަތްކުރާ ގޮތް ތަފާތުވުމުގެ ސަބަބުން، އިންޓަމިޓެންޓް ފާސްޓިން އިން ކުރާ އަސަރުވެސް ދެ ޖިންސަށް ތަފާތެވެ. އަންހެނުންގެ ހަށިގަނޑަކީ ކެލަރީ މަދުވުމަށް ވަރަށް ނާޒުކު ހަށިގަނޑެކެވެ. އަންހެނުންގެ ފިޒިއޮލޮޖީއާ ބެހޭ ތަޖުރިބާކާރެއް ކަމަށްވާ ޑރ. ސްޓޭސީ ސިމްސް ފާހަގަކުރެއްވި ގޮތުގައި، ގިނައިރު ނުކައި ހުރުމަކީ އަންހެނުންގެ ހަށިގަނޑުގައި ސްޓްރެސް ހޯމޯން ކަމަށްވާ ކޯޓިސޯލް އިތުރުކުރުވާ ކަމެކެވެ. ސިކުނޑީގައި ހުންނަ ހައިޕޯތެލަމަސް އަކީ ހަކަތަ މަދުވުމުން ވަރަށް އަވަހަށް އޭގެ އަސަރު ކުރާ ގުނަވަނެކެވެ. މީގެ ސަބަބުން، ހަށިގަނޑުގައި ސަރުބީ ޖެހުން އިތުރުވެ، މަސްތައް ވިރުން ފަދަ ކަންކަން މެދުވެރިވެއެވެ. އަދި އީސްޓްރޯޖެން އާއި ޕްރޮޖެސްޓެރޯން ފަދަ މުހިންމު ހޯމޯންތަކަށް ބަދަލު އައިސް، މައްސަރު ކަންތައް ގަވާއިދުން ނުވުމާއި، ތައިރޮއިޑްގެ މައްސަލަތައް ދިމާވުން އެކަށީގެންވެއެވެ.
އެހެންކަމުން، ޑރ. ސްޓެބިލް ލަފާދެއްވަނީ އަންހެނުން ފުރަތަމަ ފަށާއިރު 16 ގަޑިއިރުގެ ބަދަލުގައި 12 ގަޑިއިރުގެ ކުރު ފާސްޓަކުން ފެށުމަށެވެ. އަދި ހަށިގަނޑަށް އަންނަ ބަދަލުތައް ބަލައި، ވަރުބަލިވުމާއި ނިދަން އުނދަގޫވުން ފަދަ ކަންކަން ދިމާނުވާނަމަ، މަޑުމަޑުން ވަގުތު އިތުރުކުރުމަށެވެ. ފިރިހެނުންނަށް ގިނައިރު ނުކައި ހުރުމަކީ މާބޮޑު އުނދަގުލަކަށް ނުވިޔަސް، އަންހެނުން މިކަމުގައި ޚާއްސަ ސަމާލުކަމެއް ދޭންޖެހެއެވެ.
އާންމުކޮށް ހެދޭ ގޯސްތައް:
އިންޓަމިޓެންޓް ފާސްޓިން ފަށާ މީހުންނަށް އެންމެ އާންމުކޮށް ހެދޭ އެއް ގޯހަކީ، ކުއްލިއަކަށް މާ ގިނައިރު ނުކައި ހުންނަން ފެށުމެވެ. ޑރ. ސްޓެބިލް ވިދާޅުވި ގޮތުގައި، އެއްވެސް ތައްޔާރީއަކާ ނުލައި 16 ގަޑިއިރު ނުކައި ހުންނަން ފެށުމުން، މީހާ ވަރުބަލިވެ، ރުޅިގަދަވެ، އަދި މިކަން ކުރިއަށް ގެންދަން ފޫހިވާ ގޮތްވެއެވެ. މީގެ ބަދަލުގައި، މަޑުމަޑުން ވަގުތު އިތުރުކުރަމުން ގެންދިއުމަކީ އެންމެ ރަނގަޅު ގޮތެވެ.
ދެވަނައަށް އެންމެ އާންމުކޮށް ހެދޭ ގޯހަކީ، ކާން ލިބޭ ވަގުތުކޮޅުގެ ތެރޭގައި މާ ގިނައިން ކެއުމެވެ. ގިނައިރު ނުކައި ހުރުމަށްފަހު، ބަނޑުހައިވެފައި ހުންނަ ވަގުތު ސިއްހަތަށް ގެއްލުންހުރި ކާނާ އާއި ހަކުރު ގިނައިން އެކުލެވޭ ބާވަތްތައް ކެއުމުން، ފާސްޓިންއިން ލިބޭ ފައިދާ ގެއްލިގެންދެއެވެ. އެގޮތުން 2022 ވަނަ އަހަރު ކޮށްފައިވާ ދިރާސާއަކުން ދައްކާ ގޮތުގައި، ދުވާލެއްގެ މައްޗަށް ހަށިގަނޑަށް އެތެރެކުރާ ކެލަރީގެ މިންވަރު އެއްވަރެއްގައި ހިފެހެއްޓޭނަމަ، އިންޓަމިޓެންޓް ފާސްޓިން އާއި އާންމުކޮށް ކެއުން މަދުކުރުމުން ލިބޭ ނަތީޖާ ދާދި އެއްގޮތެވެ.
އެހެންކަމުން، ހަމައެކަނި ކާ ވަގުތު ބަދަލުކުރުމަކުން ނުފުދެއެވެ. ކެވޭ މިންވަރާއި ބާވަތްތަކަށްވެސް ސަމާލުވާން ޖެހެއެވެ. އަދި ހަށިގަނޑުން ދޭ ސިގްނަލްތަކަށް ބީރުކަންފަތެއް ދިނުމަކީވެސް ބޮޑު ގޯހެކެވެ. ބޮލުގައި ރިއްސުމާއި، އަނބުރައިގަތުމާއި، އެއްކަމަކަށް ސަމާލުކަން ނުދެވުން ފަދަ ކަންކަން ދިމާވާނަމަ، އެއީ އެ މީހަކާ މި ޑައިޓް ނުގުޅޭކަމުގެ ނިޝާނެކެވެ. ގަދަކަމުން މިކަން ކުރަން އުޅުމަކީ ސިއްހަތަށް އިތުރު ގެއްލުންތަކެއް ލިބިދާނެ ކަމެކެވެ.
ދެމެހެއްޓެނިވި ގޮތެއްގައި ކުރިއަށް ގެންދިއުން:
މިކަން ކާމިޔާބުކަމާއެކު ކުރިއަށް ގެންދިއުމަށްޓަކައި، ކާން ލިބޭ ވަގުތުގައި ކެވޭ ކާނާގެ ފެންވަރަށް ވަރަށް ބޮޑަށް ސަމާލުކަން ދޭންޖެހެއެވެ. ޑރ. ސްޓެބިލް ފާހަގަކުރެއްވި ގޮތުގައި، ކާ ވަގުތުގައި ޕްރޮޓީން، ފައިބާ، އަދި ހަށިގަނޑަށް ފައިދާހުރި މާއްދާތައް އެކުލެވޭ ކާނާ ކެއުމަކީ ވަރަށް މުހިންމު ކަމެކެވެ. އެކަށީގެންވާ މިންވަރަށް ނިއުޓްރިޝަން ނުލިބޭނަމަ، މަސްތައް ވިރި، ހަށިގަނޑު ނިކަމެތިވެދާނެއެވެ. ތަރުކާރީ އާއި މޭވާ، އަދި ސިއްހަތަށް ފައިދާހުރި ސަރުބީ އެކުލެވޭ ކާނާ އިޚުތިޔާރުކުރުމަކީ ހަކަތަ އިތުރުކޮށްދޭނެ ކަމެކެވެ.
މީގެ އިތުރުން، މިކަމުގައި އެންމެ މުހިންމު އަނެއް ކަމަކީ ދެމެހެއްޓެނިވި ގޮތެއްގައި ކުރިއަށް ގެންދިއުމެވެ. ހަރުކަށި އުސޫލުތަކެއް ގެންގުޅުމުގެ ބަދަލުގައި، ދިރިއުޅުމުގެ ވައްޓަފާޅިއާ ގުޅޭގޮތަށް ފްލެކްސިބަލް ނުވަތަ ބަދަލުތައް ގެނެވޭނެ ގޮތަކަށް އަމަލުކުރުމަކީ މުހިންމު ކަމެކެވެ. އާއިލީ ބައްދަލުވުމެއް ނުވަތަ ރައްޓެހިންނާއެކު ބޭރަށް ދާންޖެހޭ ހާލަތްތަކުގައި، ފާސްޓްކުރާ ވަގުތަށް ބަދަލު ގެނައުމަކީ މައްސަލައެއް ނޫނެވެ. މުހިންމީ ގިނަ ދުވަސްދުވަހު ގަވާއިދުން އަމަލުކުރުމެވެ.
އިންޓަމިޓެންޓް ފާސްޓިންއަކީ ބަރުދަން ލުއިކުރުމަށް އޮތް ހަމައެކަނި މަގު ކަމުގައި ނުދެކި، މިއީ ދިރިއުޅުމުގެ އާދަތަކަށް ގެނެވޭ ބަދަލެއްގެ ގޮތުގައި ދެކެންޖެހެއެވެ. އެންމެ މުހިންމު ކަމަކީ، ތިމާގެ ހަށިގަނޑަށް އެންމެ ފައިދާހުރި، އަދި ދިގު މުއްދަތަކަށް ދެމެހެއްޓޭނެ ގޮތެއް ޚިޔާރުކުރުމެވެ. ހަށިގަނޑުން ދޭ ސިގްނަލްތައް އަޑުއަހައި، ވަރުބަލިކަމެއް ނެތި ދުވަހުގެ ކަންކަން ކުރިއަށް ގެންދެވޭނަމަ، އެއީ ތިމާއާ ގުޅޭ ރަނގަޅު އުސޫލެއްކަން ކަށަވަރުވާނެއެވެ. ބަރުދަން ލުއިކުރުމަށްވުރެ ބޮޑަށް، ދުޅަހެޔޮ ސިއްހަތެއްގައި ހުރުމަށް އިސްކަންދީގެން މިކަން ކުރިއަށް ގެންދިއުމަކީ އެންމެ އެދެވޭ ނަތީޖާ ފެންނާނެ ގޮތެވެ.