ދުނިޔޭގައި ހުރި އެންމެ އުސް ފަރުބަދަ ކަމަށްވާ މައުންޓް އެވަރެސްޓަށް އަރަނިކޮށް މަރުވި، އިންޑިއާގެ ހައިދަރުއާބާދަށް ނިސްބަތްވާ އައިޓީ މާހިރުގެ ހަށިގަނޑު އެ ފަރުބަދަމަތީގައި ބޭއްވުމަށް އޭނާގެ އާއިލާއިން ނިންމައިފިއެވެ.
އުމުރުން 53 އަހަރުގެ އަރުން ކުމާރު ތިވާރީ އަކީ އައިޓީ ދާއިރާގެ ވަޒީފާއަށް ވުރެ ބޮޑަށް ފަރުބަދަތަކަށް ލޯބިކުރި މީހެއް ކަމަށް އޭނާގެ އާއިލާއިން ބުނެއެވެ.
ވޭތުވެދިޔަ 20 އަހަރު ތެރޭގައި އޭނާ ވަނީ ކިލިމަންޖާރޯ، ޑެނާލީ އަދި ކަންޗަންޖަންގާ ފަދަ އުސް ފަރުބަދަތަކަށް ކާމިޔާބުކަމާ އެކު އަރާފައެވެ. ނަމަވެސް، މީގެ ކުރިން އޭނާއަށް ކުރިމަތިލާން ޖެހުނު އެންމެ ބޮޑު ގޮންޖެހުމަކީ، މީގެކުރިންވެސް އަރަން މަސައްކަތްކޮށް ނާކާމިޔާބުވި އެވަރެސްޓް ފަރުބަދައިގެ ތަޖުރިބާއެވެ.
"އޭނާގެ ވަޒީފާއަށްވުރެ ބޮޑަށް އޭނާ ލޯބިވީ ފަރުބަދަތަކަށް. އޭނާ ވަނީ އާޖެންޓީނާއާއި ރަޝިއާގެ ފަރުބަދަތަކަށްވެސް އަރާފައި. މިދިޔަ އަހަރު ކުރި މަސައްކަތް ނާކާމިޔާބުވުމުން، އެވަރެސްޓަށް އެރުމަށް އޭނާ ހުރީ މާ ބޮޑަށް އަޒުމް ކަނޑައަޅައިގެން. އޭނާ އެންމެ އުޅޭހިތްވި ތަނަކީ އެއީ، އެހެންވެ އޭނާ ބާއްވަން އަހަރެމެން ބޭނުންވަނީ ވެސް އެ ތަނުގައި" އަރުން ކުމާރު ތިވާރީގެ ޅިޔަނު ސުދީރު އުޕަދްޔާޔާ ބުންޏެވެ.
ސަންދީޕް އަދި އަރުން ކުމާރު ތިވާރީ--ފޮޓޯ/ފޭސްބުކް
ތިވާރީ އާއި އޭނާގެ އެކުވެރިއެއް ކަމަށްވާ 47 އަހަރުގެ ސަންދީޕް އާރޭ މަރުވީ ފަރުބަދައަށް އެރުމަށްފަހު ފައިބަނިކޮށް ދިމާވި ސިއްހީ މައްސަލަތަކެއްގައި ކަމަށް އާއިލާއިން ވަނީ ބުނެފައެވެ.
މި މަހުގެ 21 ވަނަ ދުވަހު ތިވާރީ ފަރުބަދައިގެ އެންމެ އުހަށް އެރިއިރުވެސް އޭނާގެ ހާލަތު ހުރީ ވަރަށް ގޯސްކޮށް ކަމަށާއި އޭނާގެ ސިއްހީ ހާލަތު މާ ބޮޑަށް ގޯސްވީ 8,790 މީޓަރު އުސްމިނުގައި އޮންނަ 'ހިލަރީ ސްޓެޕް' ނަމަކަށް ކިޔާ ނުރައްކާތެރި ސަރަހައްދުގައި ކަމަށް އެ އާއިލާއިން މީޑިއާތަކުގައި ބުނެފައިވެއެވެ.
ހައިދަރުއާބާދުގެ އައިޓީ ކުންފުންޏެއްގެ ސީނިއާ ޑިރެކްޓަރެއްގެ މަގާމުގައި ހުރި ތިވާރީ ފަރުބަދަތަކަށް އަރަން ފެށީ އޭނާގެ އުމުރުން 30ގެ އަހަރުތަކުގައެވެ. އޭނާއަކީ އާއިލާއަށް ވަފާތެރި، މަޖާ މިޒާޖެއްގެ މީހެއްގެ ގޮތުގައި އާއިލާއިން ސިފަކުރެއެވެ.
އޭނާގެ ހަށިގަނޑު ފަރުބަދަމަތީގައި ބޭއްވުމަށް ނިންމި ނިންމުމަކީ އޭނާގެ އަނބިމީހާއާއި ދެ ދަރިންނަށް ވަރަށް އުނދަގޫ ނިންމުމެކެވެ. ނަމަވެސް، މިގޮތަށް ނިންމި އެއް ސަބަބަކީ ހިމާލިޔާއަށް އޭނާގެ ހިތުގައި އޮތް ލޯތްބާއި އެތަނަށް އޭނާ ކުރާ ގަދަރުގެ ސަބަބުން ކަމަށް އާއިލާއިން ވަނީ ބުނެފައެވެ.
މީގެ އިތުރުން، ހަށިގަނޑު ތިރިއަށް ގެނައުމުގައި ކުރިމަތިވާނެ ބޮޑެތި ގޮންޖެހުންތަކަކީ ވެސް މި ނިންމުން ނިންމަން ޖެހުނު މުހިންމު ސަބަބެއް ކަމަށް ތިވާރީގެ އާއިލާއިން ބުނެފައިވެއެވެ.
އިންޑިއާގެ ނޫސްތަކުގައި ބުނެފައިވާ ގޮތުގައި ފަރުބަދައިގެ އެހާ އުސް ހިސާބަކުން ހަށިގަނޑު ތިރިއަށް ގެނައުމަކީ ގާތްގަނޑަކަށް 15 ވަރަކަށް ދުވަސް ހޭދަވާނެ ބުރަ މަސައްކަތެކެވެ.
މައުންޓް އެވަރެސްޓްގައި މަރުވި އިންޑިއާގެ ދެ ރައްޔިތުން ކަމަށްވާ ސަންދީޕް އަދި އަރުން ކުމާރު ތިވާރީއާ ބެހޭ މައުލޫމާތު އޭޝިއާނާ ނޭޕާލް ޓްރެކްސްއިން އާއްމުކޮށްފައި--ފޮޓޯ/ފޭސްބުކް
"ގަނޑުފެންތަކުގެ ސަބަބުން، އޭނާގެ ހަށިގަނޑު ނެގުމަށްޓަކައި ޓީމަކުން ޖެހޭނީ ގަނޑުފެންގަނޑު ކޮށައި ކޮންނަން. މައިނަސް 63 ޑިގްރީގައި ހަށިގަނޑު ހަރުވެފައި ހުރުމުގެ ސަބަބުން، އެ ނެގުމުގެ ތެރޭގައި ހަށިގަނޑު ކުދިކުދިވެ، ކަށިތައް ބިންދައިގެން ދިއުމުގެ ފުރުސަތު ބޮޑު. ހަށިގަނޑު ފެނުމުން، އެ ފިލާގަނޑެއްގައި ބަނދެގެން ހަތަރު ވަނަ ކޭމްޕް އިން އެއް ނަމްބަރުގެ ކޭމްޕަށް ދަމާފައި ގެންނަން ޖެހޭނީ. އަހަރެމެން ބޭނުމެއް ނޫން އޭނާގެ ހަށިގަނޑަށް އެފަދަ އިހާނެތި ގޮތެއް ވާކަށް،" އާއިލާގެ ފަރާތުން މީޑިއާއަށް މައުލޫމާތުދިން މީހަކު ބުނެފައިވެއެވެ.
ތިވާރީގެ އާއިލާގެ މި ނިންމުން މިހާރު ވަނީ މި ދަތުރު އިންތިޒާމުކުރި "ބޫޓްސް އެންޑް ކްރެމްޕަންސް" ކުންފުންޏަށް އަންގާފައެވެ.
މީގެ ތިން އަހަރު ކުރިން ތިވާރީ އެވަރެސްޓަށް އަރަން ކުރި ފުރަތަމަ މަސައްކަތް، ހުއްޓާލަން ޖެހުނީ 7,200 މީޓަރު އުސްމިނަށް ދެވުނުތަނާ އޭނާގެ ހާލަތު ގޯސްވުމުގެ ސަބަބުންނެވެ.
ނަމަވެސް މިފަހަރު، ބަލިވެ އުޅޭތީ އެނބުރި ކޭމްޕަށް ދިއުމަށް ޝާޕާ ގައިޑުން ލަފާދިން ނަމަވެސް، އޭނާ ބޭނުންވީ ކޮންމެހެންވެސް ފަރުބަދައިގެ އެންމެ އުހަށް އެރުމަށެވެ.
ތިވާރީއާ އެކު މި ދަތުރުގައި ބައިވެރިވި ސަންދީޕް އާރޭ ވެސް ވަނީ އެވަރެސްޓްގައި މަރުވެފައެވެ. އަންދްރަޕްރަދޭޝްއަށް ނިސްބަތްވާ ނަމަވެސް ބެންގަލޫރުގައި ދިރިއުޅެމުންދިޔަ އާރޭ ވެސް މަރުވީ ފަރުބަދައިގެ އެންމެ އުހަށް އެރުމަށްފަހު ފައިބަނިކޮށް ދިމާވި ސިއްހީ މައްސަލަތަކެއްގައި ދެ ވަނަ ނަމްބަރު ކޭމްޕް ކައިރީގައެވެ.
ބުނެވޭ ގޮތުގައި ދުނިޔޭގައިވާ އެންމެ އުސް ހިސާބަކީ އެވަރެސްޓް ފަރުބަދަ ހިމެނޭ ހިސާބެވެ. އަދި މިއީ ދުނިޔޭގައިވާ އެންމެ އުސް ފަރުބަދަ ވެސް މެއެވެ. އޭގެ އުސްމިނުގައި 8848 މީޓަރު ހުރެއެވެ. މި ފަރުބަދަ އޮންނަނީ ނޭޕާލް އަދި ޗައިނާ ވަކިކޮށްދޭ ބޯޑަރު ގައެވެ.