ޓެކްނޮލޮޖީގެ ދުނިޔޭގައި އެންމެ އުހުގައި އޮތް ގޫގުލް ކުންފުނިން އެންމެ ފަހުން ބޭއްވި އައިއޯ ކޮންފަރެންސްގައި، އެ ކުންފުނީގެ ސާޗް އިންޖީނަށް ބޮޑެތި ބަދަލުތަކެއް ގެނެސް "ގޫގުލް ސާޗަކީ މިހާރު އޭއައި ސާޗް" އެއްގެ ގޮތުގައި ވަނީ އިޢުލާންކޮށްފައެވެ.
މި ބަދަލާއެކު އާންމުކޮށް މީހުން ހޯދާ މައުލޫމާތުތަކުގެ ޚުލާސާ އޭއައި (އާޓިފިޝަލް އިންޓެލިޖެންސް) މެދުވެރިކޮށް ސާޗް ނަތީޖާގެ އެންމެ ކުރިން ދައްކައި ދޭނެއެވެ. ނަމަވެސް މި ނިންމުމާއެކު ޓެކްނޮލޮޖީ ދާއިރާގެ މާހިރުންނާއި ލިޔުންތެރިންގެ މެދުގައި ވަނީ އިންޓަނެޓުގެ މުސްތަޤުބަލާ މެދު ބޮޑެތި ކަންބޮޑުވުންތަކެއް އުފެދިފައެވެ.
ގޫގުލްގެ މިބަދަލުގެ ސަބަބުން އެހެން ސައިޓްތަކަށް ވަންނަ މީހުން މަދުވާނެކަމަށް ބެލެވޭ ----
މި އާ ބަދަލުގެ ސަބަބުން ގޫގުލް ސާޗް ބޭނުންކުރާ މީހުންނަށް މައުލޫމާތު ހޯދާ ވެބްސައިޓުތަކަށް ވަނުމުގެ ބަދަލުގައި، ހުރިހާ ޖަވާބެއް ގޫގުލްގެ ޕޭޖުން ސީދާ ލިބިގެންދާނެއެވެ. މީގެ ނަތީޖާއެއްގެ ގޮތުން އަސްލު މައުލޫމާތު އުފައްދާ ވެބްސައިޓުތަކާއި ނޫސްތަކަށް ވަންނަ މީހުންގެ އަދަދު ވަރަށް ބޮޑަށް މަދުވެގެންދާނެ ކަމަށް ބެލެވެއެވެ.
ގިނަ މީޑިއާތަކަކީ ސާޗް ރިޒަލްޓުން ލިބޭ ވިޒިޓަރުންގެ މައްޗަށް ބިނާވެގެން ހިންގާ ތަންތަނަށް ވުމުން، މި ބަދަލުގެ ސަބަބުން ބައެއް މަޤްބޫލު ޓެކް އަދި ގޭމިން ވެބްސައިޓުތައް މިހާރުވެސް ބަންދުކުރަން ޖެހި، ގިނަ ނޫސްވެރިންގެ ވަޒީފާ ވަނީ ގެއްލިފައެވެ.
މިކަމުގައި އުފެދޭ އެންމެ ބޮޑު ސުވާލަކީ ވެބްސައިޓުތައް ހުއްޓުމަކަށް އައިސް، އާ މައުލޫމާތު ލިޔާނެ ބަޔަކު ނެތް ދުނިޔެއެއްގައި ގޫގުލްގެ އޭއައި އަށް އިތުބާރު ހުރި މައުލޫމާތު ލިބޭނީ ކިހިނެއްތޯ އުފެދޭ ސުވާލެވެ.
ގޫގުލް އިން މިހާރުވެސް މައުލޫމާތު ހޯދުމަށް ރެޑިޓް ފަދަ އާންމުން ޚިޔާލު ބަދަލުކުރާ ފޯރަމްތަކާއި ޔޫޓިއުބް ފަދަ ޕްލެޓްފޯމްތަކަށް ވަރަށް ބޮޑަށް ބަރޯސާވެއެވެ. ނަމަވެސް ޕްރޮފެޝަނަލް ނޫސްވެރިން ލިޔާ މައުލޫމާތާއި، އާންމު ފަރާތްތަކުން ސޯޝަލް މީޑިއާގައި ހިއްސާކުރާ ޚިޔާލުތަކުގެ ތަފާތު ދެނެގަތުމަކީ އޭއައި އަށް އަދިވެސް އޮތް ގޮތް ނޭނގޭ ބޮޑު ގޮންޖެހުމެކެވެ.
މާހިރުން އިންޒާރު ދޭ ގޮތުގައި މި ބަދަލުގެ ސަބަބުން ދޮގު މައުލޫމާތު ފެތުރުމުގެ ފުރުސަތު ވަރަށް ބޮޑަށް ހުޅުވިގެންދާނެއެވެ. ނުބައި ނިޔަތެއްގައި ސިސްޓަމް "ގޭމް" ކުރަން އުޅޭ ފަރާތްތަކުން ގިނަ އަދަދެއްގެ ފޭކް އެކައުންޓްތައް ހަދައިގެން ވަކި ބްރޭންޑެއް ނުވަތަ ވަކި ޚިޔާލެއް ކުރިއަރުވަން މަސައްކަތް ކުރުމުން، ގޫގުލްގެ އޭއައި އަށް އެއީ ތެދު މައުލޫމާތު ކަމަށް ހީވެ، އާންމުންނަށް އެ މައުލޫމާތު ނަތީޖާގެ ގޮތުގައި ދެއްކުމަކީ އެކަށީގެންވާ ކަމެކެވެ.
ޚާއްޞަކޮށް ސިއްހީ، މާލީ އަދި ސަލާމަތީ ކަންކަމާ ގުޅޭ ސުވާލުތަކަށް މިފަދަ ނުބައި މައުލޫމާތު ދެއްކިއްޖެނަމަ އޭގެ ނުރައްކާ އާންމުންނަށް ވަރަށް ބޮޑުވާނެއެވެ.
މި ޙާލަތުން ސަލާމަތްވުމަށްޓަކައި މައުލޫމާތު ހޯދާ އާންމު ފަރާތްތަކުން ސާޗް އިންޖީނުތަކަށް އެކަނި ބަރޯސާވުން ހުއްޓާލަންޖެހޭ ކަމަށް މި ދާއިރާގެ މީހުން ދެކެއެވެ. އޭގެ ބަދަލުގައި، އިތުބާރު ހުރި ނޫސްތަކާއި ވެބްސައިޓުތަކަކީ ކޮބައިކަން އަމިއްލައަށް ދެނެގަނެ، ސީދާ އެ ސައިޓުތަކަށް ޒިޔާރަތްކޮށްގެން މައުލޫމާތު ހޯދުމުގެ އާދަ އަށަގަންނުވަން ޖެހެއެވެ.
އޭރުން އިންޓަނެޓުގައި ހުރި އަސްލު މައުލޫމާތު އުފައްދާ ފަރާތްތައް ދެމިއޮތުމަށް އެހީތެރިވެދެވި، ސައްހަ މައުލޫމާތު ލިބުން ކަށަވަރު ކުރެވޭނެއެވެ.