ޓެކްނިކަލް ޑައިވިންއަށް ހުއްދަ ދިނުމަށްޓަކައި ގާނޫނެއް ހެދުމުގެ ވިސްނުމެއް ސަރުކާރުގައި އެބައޮތް ކަމަށާއި، ކަމާ ގުޅުންހުރި ފަރާތްތަކާ މަޝްވަރާކުރަމުން އަންނަ ކަމަށް، ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) މިއަދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބުދެއްވަމުން ތަރުޖަމާނު ވިދާޅުވީ، 'ޓެކްނިކަލް ރެކްރިއޭޝަން ޑައިވިން'އަށް ގާނޫނެއް ހެދުމުގެ ވިސްނުމެއް ސަރުކާރުން ގެންގުޅޭ ކަމަށާއި، އެކަމާ ގުޅުންހުރި މަޝްވަރާތައް މިހާރު ކުރަމުންދާ ކަމަށެވެ.
އެފަދައިން ވިދާޅުވެ ތަރުޖަމާނު ވަނީ ރާއްޖޭގައި ވަރަށް ކުޅަދާނަ އަދި ތަޖުރިބާ ހުރި ޑައިވަރުން ތިބިކަން ފާހަގަކުރައްވާފައެވެ.
"އަޅުގަނޑުމެން ރާއްޖޭގައި އެބަ ތިބި އިނގޭތޯ ހަމަ ވަރަށް ކުޅަދާނަ ވަރަށް ތަޖުރިބާކާރު ވަރަށް ކުރީއްސުރެ ހަރަކާތްތެރިވަމުން އަންނަ ޑައިވާސް. ވަރަށް މޮޅެތި ޑައިވާސް ތިބި ގައުމެއް ދެއްތޯ ރާއްޖެއަކީ،" އޭނާ ވިދާޅުވިއެވެ.
ރާއްޖޭގައި ޓެކްނިކަލް ޑައިވިން ގާނޫނެއް އަދި ނެތެވެ. ތަރުޖަމާނު ވިދާޅުވީ އެފަދަ ގާނޫނެއް ވުޖޫދުވެއްޖެނަމަ ކަނޑު އަޑީގެ ދިރާސާތައް ހަދަން އަންނަ ފަރާތްތަކާއި ޓެކްނިކަލް ރެކްރިއޭޝަން ޑައިވަރުން ޑައިވްކުރުމުގެ ތަޖުރިބާ ހުރި ބަޔަކަށް ނޫނީ އެކަން ނުކުރެވޭ ގޮތަށް، ހެދޭނެ ކަމަށެވެ.
ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ނޫސްވެރިންނަށް މައުލޫމާތު ދެއްވަނީ --- ފޮޓޯ: ރައީސް އޮފީސް
އެ ގާނޫނު ވުޖޫދުކުރަން މާ ލަހެއް ނުވާނެ ކަމަށް ތަރުޖަމާނު ވިދާޅުވި ނަމަވެސް، އެ ގާނޫނާ ގުޅުންހުރި ބިލު ރައްޔިތުންގެ މަޖިލީހަށް ސަރުކާރުން ފޮނުވާނެ ސީދާ ތާރީޚެއް ވިދާޅެއް ނުވެއެވެ.
ޓެކްނިކަލް ޑައިވިންއަށް ހުއްދަދިނުމަށްޓަކައި ގާނޫނެއް ހެދުމުގެ ވިސްނުމެއް އޮތްކަން ތަރުޖަމާނު ހާމަކުރައްވައިފައިވަނީ، ވ. އަތޮޅު އަލިމަތާ ކައިރީގައި އޮންނަ ކަނޑު ހޮހަޅައެއްގެ ތެރޭގައި ޑައިވިނަށް ގޮސް އުޅުނު އިޓަލީވިލާތުގެ ފަތުރުވެރިންތަކެއް މިދިޔަ ހަފުތާގެ ބުރާސްފަތި ދުވަހު މަރުވެފައި އޮއްވައި ފެނިފައި ވަނިކޮށެވެ.
މި ހިތާމަވެރި ހާދިސާގައި އިޓަލީވިލާތުގެ ފަސް ފަތުރުވެރިންގެ އިތުރުން، އެ ފަތުރުވެރިން ސަލާމަތްކުރުމަށް މަސައްކަތްކުރި ސާޖަންޓް ފަސްޓް ކްލާސް މުޙައްމަދު މަހުދީ ވަނީ ނިޔާވެފައެވެ.
މި މަހުގެ 14 ވަނަ ދުވަހު ހިނގި މި ހާދިސާގައި ގެއްލުނު މީހުންގެ ތެރެއިން ދެ މީހެއްގެ ހަށިގަނޑު ކަނޑުގެ އަޑިން ނެގީ މިމަހުގެ 19 ވަނަ ދުވަހެވެ. އަދި ބާކީ ތިބި ދެ މީހުންގެ ހަށިގަނޑު ނަގާފައި ވަނީ މި މަހުގެ 20 ވަނަ ދުވަހެވެ.
މި މީހުންގެ ހަށިތައް ފެނިފައި ވަނީ އެމީހުން ޑައިވް ކުރި ކޭވްގެ ތެރެއިންނެވެ. މި އޮޕަރޭޝަންގައި އެމްއެންޑީއެފް ކޯސްޓްގާޑާއި، ފުލުހުންގެ އިތުރުން އިޓަލީ ސަރުކާރުން ހަމަޖެއްސި ފިންލެންޑުގެ ތަޖުރިބާކާރު ތިން ޑައިވަރުން ބައިވެރިވިއެވެ.
ސަރުކާރުން ވަނީ މި ހާދިސާގައި މަރުވި އިޓަލީވިލާތުގެ ފަތުރުވެރިން އަނބުރާ ގައުމަށް މިއަދު ފަތިހު ފޮނުވައިލާނެކަން އިއްޔެ ހާމަކޮށްފައެވެ.