ސައުދީ ޕްރޯ ލީގަށް ބަދަލުވުމަކީ ކްރިސްޓިއާނޯ ރޮނާލްޑޯގެ ކުޅުމަށް އެއްވެސް ބަދަލެއް އައި ކަމެއް ނޫން ކަމަށާއި، އޭނާ އަދިވެސް ހުރީ ކުރީގެ ފޯރީގައި ކަމަށް ޕޯޗުގަލްގެ ގައުމީ ޓީމުގެ ކޯޗު ރޮބާޓޯ މާޓިނޭޒް ބުނެފިއެވެ.
ރިޔާދުގައި ކުރިއަށްދިޔަ ސްކައުޓިންގ މިޝަނެއްގައި، އަލް ނަސްރު އާއި އަލް ހިލާލް ބައްދަލުކުރި މެޗު ބަލާލުމަށްފަހު މާޓީނޭޒް ބުނީ، އުމުރުން 41 އަހަރުގެ ރޮނާލްޑޯގެ ކިބައިގައި އަދިވެސް މޮޅުވުމުގެ ބޮޑު ޝައުގުވެރިކަމެއް އެބަހުރި ކަމަށާއި އޭނާގެ ފިޒިކަލް ފިޓްނަސް ހުރީ ވަރަށް މަތީ ފަންތިއެއްގައި ކަމަށެވެ.
މާޓިނޭޒް ފާހަގަކުރި ގޮތުގައި، ސައުދީ ލީގަށް ބަދަލުވި ފަހުންވެސް ރޮނާލްޑޯ ދައްކަމުންދާ ކުޅުމަށް ބަލާއިރު، އޭނާގެ ފެންވަރު ދަށަށް ދިޔަކަމުގެ އެއްވެސް ނިޝާނެއް ނުފެނެއެވެ.
މި ސީޒަނުގައި އަލް-ނަސްރަށް 26 ގޯލު ޖަހައިދީ، އެ ޓީމު ލީގުގެ ކުރީގައި ބޭއްވުމަށް ރޮނާލްޑޯ މުހިންމު ދައުރެއް އަދާކުރަމުންދާއިރު، މާޓިނޭޒް ބުނީ ރޮނާލްޑޯއަކީ އަދިވެސް ގައުމީ ޓީމަށް ނުހަނު ބޭނުންތެރި ކުޅުންތެރިއެއް ކަމަށެވެ.
އެތައް ކާމިޔާބީއެއް ހޯދާފައިވީ ނަމަވެސް، ރޮނާލްޑޯގެ ކިބައިގައި ހުރި ކުޅުމުގެ ފޯރިއާއި ބަނޑުހައިހޫނުކަން ފެނިފައި އޭނާ ހައިރާންވާ ކަމަށްވެސް ކޯޗު ބުންޏެވެ.
ނަމަވެސް، ރޮނާލްޑޯއަކީ ޓީމުގެ ކެޕްޓަން ކަމަށް ވީނަމަވެސް، ގައުމީ ޓީމުން ޖާގަ ހޯދުމުގައި އޭނާވެސް އެހެން ކުޅުންތެރިންނެކޭ އެއްފަދައިން މަތީ މިންގަނޑުތަކަށް ފެތެންޖެހޭނެ ކަމަށާއި، ހަމައެކަނި ކުރީގެ ކާމިޔާބީތަކަށް ބަލައިގެން ޓީމުން ޖާގަ ކަށަވަރު ނުވާނެ ކަމަށް މާޓީނޭޒް ވަނީ ހަނދާންކޮށްދީފައެވެ.
ދުނިޔޭގެ އެންމެ މޮޅު ކުޅުންތެރިންގެ ތެރޭގައި ހިމެނޭ ރޮނާލްޑޯ، އަލް ނަސްރު ކްލަބާ ގުޅުނީ 2022 ވަނަ އަހަރުގެ ޑިސެމްބަރު މަހުގެ ފަހުކޮޅުގައެވެ. މިއީ ފުޓްބޯޅައިގެ ތާރީޚުގައިވެސް ކުޅުންތެރިއަކަށް އެންމެ ބޮޑު މުސާރައެއް ލިބޭ ގޮތަށް ސޮއިކުރި އެއް އެއްބަސްވުމެވެ. އޭނާ އެ ކްލަބާ ގުޅުނީ އިނގިރޭސިވިލާތުގެ މެންޗެސްޓާ ޔުނައިޓެޑާއެކު ހެދި އެއްބަސްވުން ބާތިލުކުރުމަށްފަހުއެވެ.
އަލް ނަސްރަށް ބަދަލުވި ފަހުން ރޮނާލްޑޯ އަންނަނީ އެ ޓީމުގައި ގިނަ ގޯލުތަކެއް ޖަހައި، ތަފާތު ރެކޯޑުތައް މުގުރަމުންނެވެ. އުމުރުން ދުވަސްވީ ނަމަވެސް، އޭނާގެ ފިޓްނަސް އާއި ގޯލު ޖެހުމުގެ ގާބިލުކަން ހުރި ގޮތުން ގިނަ ބައެއްގެ ސަމާލުކަން ވަނީ ލިބިފައެވެ.
އޭނާގެ ސަބަބުން ސައުދީ ޕްރޯ ލީގަށް ބައިނަލްއަގުވާމީ ބޮޑު ސަމާލުކަމެއް ލިބި، ދުނިޔޭގެ ފެންވަރުގެ އެހެން ގިނަ ކުޅުންތެރިންތަކެއްވެސް އެ ލީގާ ގުޅުމަށް މަގުފަހިވިއެވެ.
ސައުދީގައި ކުޅެމުންދިޔަ ނަމަވެސް، ރޮނާލްޑޯއަކީ އަދިވެސް ޕޯޗުގަލް ގައުމީ ޓީމުގެ ކެޕްޓަނެވެ. އޭނާ އަންނަނީ ބައިނަލްއަގުވާމީ މައިދާނުގައި އެންމެ ގިނަ ގޯލު ޖެހި ކުޅުންތެރިޔާގެ ރެކޯޑު ދަމަހައްޓަމުންނެވެ.