މިދިޔަ ރޯދަމަހު ދުވާލު ގަޑީގައި ސިނގިރޭޓު ބުއި ދެ މީހަކު ގޭބަންދުކުރަން ހުކުމްކޮށްފިއެވެ.
މިދިޔަ ރޯދަމަހު ދުވާލު ގަޑީގައި ސިނގިރޭޓު ބުއި މައްސަލައާ ގުޅިގެން ގޭބަންދުކުރަން ހުކުމެއް އިއްވީ ހދ. ކުޅުދުއްފުށީ ދެ ފިރިހެނުންގެ މައްޗަށެވެ. އެއީ، ރޯދަމަހު ދުވާލު ކުޅުދުއްފުށީ ފުއްޓަރު މަގުގައި ހުރި މިދިލި ގަހެއްގެ ދަށުގައި ތިބެ ސިނގިރޭޓް ބުއި މައްސަލައެވެ.
މި މައްސަލައިގައި ހޯމަ ދުވަހު އިއްވާފައިވަނީ 27 ދުވަހުގެ ހުކުމެކެވެ. އެކަމަކު، ކޯޓުން ވަނީ އެ ހުކުމް، އެއް މަހާއި 24 ދުވަހުގެ ގޭބަންދަށް ބަދަލުކޮށްދީފައެވެ.
މިދިޔަ ރޯދަމަހު މާލެ ސަރަހައްދުން ރޯދަ ނުހިފައިގެން އެކި ފަހަރު މަތިން މީހުން ހައްޔަރުކޮށް، ބަންދު މުއްދަތު ޖަހައިފައިވެއެވެ. އޭގެ ތެރެއިން ވެސް ބައެއް މީހުންގެ މައްޗަށް ދައުވާކުރިއެވެ.
ރަމަޟާން މަހު ދުވާލު އިރު އޮއްސުމުގެ ކުރިން، ޝަރުޢީ އުޒުރެއް ނެތި އާންމު ތަންތަނުގައި ކައިބޮއެ ހެދުމަކީ ގާނޫނުލްއުގޫބާތުގެ ދަށުން ކުށެކެވެ. ދިވެހިރާއްޖޭގެ ގާނޫނުލްއުގޫބާތުގެ 611 ވަނަ މާއްދާގެ (ހ) ގެ (2) ވަނަ ނަންބަރުގައި ބަޔާންކޮށްފައިވާ ގޮތުގައި، އިސްލާމީ ޝަރީޢަތުގައި ރޯދަ ހިފުން ވާޖިބުވެގެންވާ މީހަކު، ރަމަޟާން މަހުގެ ދުވާލު ވަގުތެއްގައި އެއްވެސް ޝަރުޢީ އުޒުރެއް ނެތި އާންމު ތަނެއްގައި ކެއުމާއި، ބުއިމާއި ނުވަތަ ދުންފަތުގެ އިސްތިޢުމާލުކުރުމަކީ ކުށެކެވެ.
ގާނޫނުލްއުގޫބާތުގެ 611 ވަނަ މާއްދާގެ (ށ) ގައިވާ ގޮތުން އެއީ ޖުނަޙްގެ ތިންވަނަ ދަރަޖައިގެ ކުށެކެވެ.
ޖުނަޙްގެ ތިންވަނަ ދަރަޖައިގެ ކުށަކަށް ދެވޭނެ އަސާސީ އަދަބަކީ އެއް މަހާއި ހަ ދުވަހުގެ ޖަލު ހުކުމެކެވެ. ނަމަވެސް، ކުށުގެ ހާލަތަށް ރިއާޔަތްކޮށް އަދަބުގެ މިންވަރު ބަދަލުވުމުގެ ފުރުސަތު އޮވެއެވެ. އަދި، ޖަލު އަދަބުގެ ބަދަލުގައި ޖޫރިމަނާ ނުވަތަ މުޖުތަމައަށް ފައިދާ ހުރި މަސައްކަތްކުރުން ފަދަ އަދަބެއް ކަނޑައެޅުމުގެ އިޚުތިޔާރު ފަނޑިޔާރަށް ލިބިގެންވެއެވެ. މީގެ އިތުރުން، އިސްލާމް ދީނުގެ ޙުރުމަތް ކެނޑުމުގެ އަމަލެއްގެ ގޮތުގައި ބަލައި، ދީނީ އެއްބައިވަންތަކަން ހިމާޔަތްކުރުމުގެ ގާނޫނުގެ ދަށުން ވެސް ފިޔަވަޅު އެޅިދާނެއެވެ.