އެމެރިކާގެ ތަޢުލީމީ ދާއިރާގައި އެންމެ ފުޅާކޮށް ބޭނުންކުރާ އޮންލައިން ޕްލެޓްފޯމް ކަމަށްވާ "ކެންވަސް" އަށް ދިން ސައިބާ ހަމަލާއެއްގެ ސަބަބުން، ހާވަޑް، ކޮލަމްބިއާ އަދި ސްޓެންފޯޑް ފަދަ ދުނިޔޭގެ ނަންމަޝްހޫރު ޔުނިވަސިޓީތަކުގެ ކިޔެވުމަށް ބޮޑެތި ހުރަސްތަކެއް ކުރިމަތިވެއްޖެއެވެ.
މި މަހުގެ ހަތްވަނަ ދުވަހު ދިން މި ހަމަލާއާ ގުޅިގެން އެތައް ސަތޭކަ ތަޢުލީމީ މުއައްސަސާއެއްގެ ދަރިވަރުންނާއި މުދައްރިސުންނަށް ސިސްޓަމް ބޭނުންކުރުމުގައި ދަތިތަކާ ކުރިމަތިވިއިރު، މިއީ ގިނަ ޔުނިވަސިޓީތަކުގެ ފައިނަލް އިމްތިހާންތައް ކުރިއަށްދާ ދުވަސްވަރު ކަމުން މިކަމުގެ ނުތަނަވަސްކަން ވަނީ ވަރަށް ބޮޑަށް އިތުރުވެފައެވެ.
ކެންވަސް ހިންގާ "އިންސްޓްރަކްޗާ" ކުންފުނިން ހާމަކޮށްފައިވާ ގޮތުގައި، މި މަހުގެ ކުރީކޮޅުން ފެށިގެން އެ ކުންފުންޏަށް އަމާޒުކޮށް ޖިނާއީ ގްރޫޕަކުން ދަނީ ހަމަލާތައް ދެމުންނެވެ. މި ހަމަލާގައި ދަރިވަރުންގެ ނަމާއި، އީމެއިލް އެޑްރެހާއި، ސްޓޫޑެންޓް އައިޑީ ނަންބަރުގެ އިތުރުން ސިސްޓަމް މެދުވެރިކޮށް ބަދަލުކޮށްފައިވާ މެސެޖުތައް ލީކުވެފައިވާކަން އެ ކުންފުނިން ވަނީ ކަށަވަރުކޮށްދީފައެވެ. ނަމަވެސް، މިހާތަނަށް ބެލިބެލުމުން ދަރިވަރުންގެ ޕާސްވޯޑް، އުފަން ތާރީޚް ނުވަތަ މާލީ މުޢާމަލާތްތަކާ ގުޅޭ އެއްވެސް މަޢުލޫމާތެއް ހެކަރުންގެ އަތްދަށަށް ގޮސްފައިވާކަމުގެ ހެއްކެއް ފެންނާކަށް ނެތެވެ.
މި ހަމަލާގެ ޒިންމާ އުފުލާފައިވަނީ "ޝައިނީހަންޓާސް" ނަމަކަށް ކިޔާ ހެކަރުންގެ ގްރޫޕަކުންނެވެ. އެމީހުން ވަނީ ބައެއް ޔުނިވަސިޓީތަކުގެ ލޮގިން ޕޭޖަށް ބަދަލުތައް ގެނެސް، ކެންވަސް ސިސްޓަމް ހެކްކޮށްފައިވާ ކަމުގެ މެސެޖުތައް އާންމުކޮށްފައެވެ. އަދި މިހިނގާ މެއި މަހުގެ 12 ވަނަ ދުވަހުގެ ކުރިން ވަކި އަދަދެއްގެ ފައިސާ ނުދީފިނަމަ، ވަގަށް ނަގާފައިވާ ހުރިހާ މަޢުލޫމާތެއް އާންމުކުރާނެ ކަމުގެ އިންޒާރު ވެސް އެ ގްރޫޕުން ވަނީ ދީފައެވެ.
ސައިބާ ސެކިއުރިޓީ މާހިރުން ބުނާ ގޮތުގައި މި ހަމަލާ ދީފައިވަނީ "ދަ ކޮމް" ނެޓްވޯކާ ގުޅުން އޮންނަ ނުރައްކާތެރި ގްރޫޕްތަކަކުންނެވެ. މި ގްރޫޕްތަކުން މިހާރު ހަމައެކަނި ޓެކްނިކަލް ގޮތުން ސިސްޓަމްތަކަށް ވަނުމުގެ ބަދަލުގައި، މީހުންނަށް ބިރުދެއްކުމާއި، ފޯނުން ގުޅައި އިންޒާރު ދިނުން ފަދަ "މާފިއާ" ސްޓައިލްގެ އުކުޅުތައް ބޭނުންކުރަމުންދާކަން ވަނީ ފާހަގަކުރެވިފައެވެ.
މިއީ ޑޭޓާ ވަގަށް ނެގުމަށްފަހު އެ ފަރާތްތަކަށް ނުފޫޒު ފޯރުވުމަށް ބޭނުންކުރާ އާ ގޮތްތަކެއް ކަމަށް ރިސާޗަރުން ބުނެއެވެ.
މި ހާދިސާގެ ސަބަބުން އެމެރިކާގެ 6,000 އަށް ވުރެ ގިނަ ތަޢުލީމީ މުއައްސަސާއަށް އަސަރުކޮށްފައިވާއިރު، މިއީ އެއް ސިސްޓަމަކަށް މުޅި ދާއިރާ ބަރޯސާވެފައި އޮތުމުން ކުރިމަތިވި ބޮޑު ނުރައްކަލެއްގެ ގޮތުގައި މާހިރުން ސިފަކުރެއެވެ. ކެންވަސް މެދުވެރިކޮށް އެސައިންމަންޓް ހުށަހެޅުމާއި އިމްތިހާންތައް ހެދުން މެދުކެނޑުމުގެ ސަބަބުން، ދަރިވަރުންގެ ތަޢުލީމީ ކަންކަމަށް ވަނީ ވަރަށް ބޮޑު ގޮންޖެހުމެއް ކުރިމަތިވެފައެވެ.
އެ ކުންފުނިން މިހާރު ދަނީ ސިސްޓަމްތައް އާންމު ހާލަތަށް ގެނައުމަށާއި ހަމަލާގެ ފުރިހަމަ ތަހުގީގެއް ހިންގުމަށް މަސައްކަތް ކުރަމުންނެވެ.
މި ހާދިސާއާ ގުޅިގެން ދިވެހިރާއްޖޭގެ އެއްވެސް ޔުނިވަސިޓީއަކަށް ނުވަތަ ކޮލެޖަކަށް ސީދާ ނުރައްކަލެއް ކުރިމަތިވެފައިވާ ކަމުގެ ރިޕޯޓެއް މިހާތަނަށް ލިބިފައެއް ނުވެއެވެ.
އޭގެ އެންމެ ބޮޑު ސަބަބަކީ ރާއްޖޭގެ މަތީ ތަޢުލީމުދޭ މުއައްސަސާތަކުން ކިޔަވައިދިނުމުގައި މައިގަނޑު ގޮތެއްގައި ބޭނުންކުރަނީ ކެންވަސްގެ ބަދަލުގައި "މޫޑުލް" ނުވަތަ "ގޫގުލް ކްލާސްރޫމް" ފަދަ އެހެން ލާނިން މެނޭޖްމަންޓް ސިސްޓަމްތަކަށް ވުމެވެ. އެހެންކަމުން، އެމެރިކާގެ ކެންވަސް ނެޓްވޯކަށް އަމާޒުކޮށް ދިން މި ހަމަލާގެ ސަބަބުން ރާއްޖޭގެ ދަރިވަރުންގެ މަޢުލޫމާތެއް ލީކުވުމުގެ ނުވަތަ ކިޔެވުމަށް ބުރޫއެރުމުގެ ފުރުޞަތެއް މިވަގުތަކު ނެތެވެ.